ވިހި ވަނަ ރައްޔިތުންގެ މަޖިލީހުގައި ރައްޔިތުންގެ މެންބަރުން މަސައްކަތް ކުރަމުންދަނީ ބިރުން ތިއްބަވާގެން ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު އަބްދުއްރަހްމާން ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު އަބްދުއްރަހްމާން ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގެ ސުޕަ މެޖޯރިޓީ އޮތް ރައްޔިތުންގެ މަޖިލީހުގައި ޕީއެންސީގެ މެންބަރުން މަސައްކަތް ކުރަމުންދަނީ ބިރުން ތިއްބަވާގެން ކަމަށާއި، އެބޭފުޅުންނަށް މިނިވަންކަމާއެކު ވާހަކަ ދެއްކެވުމުގެ ފުރުސަތު ނެތް ކަމަށެވެ.
މެންބަރު އަބްދުއްރަހްމާން ވިދާޅުވީ މިސަރުކާރުން ވަރަށް ބޮޑަށް މެންބަރުން ކޮންޓްރޯލް ކުރާ ކަމަށާއި، ނަމަވެސް މެންބަރުންނަކީ ރައްޔިތުންގެ މަންދޫބުން ކަމަށްވާއިރު، ކޮންޓްރޯލް ކުރެވިގެންވާނެ ކަމަށް ގަބޫލުނުކުރާ ކަމަށެވެ. އަދި ވިދާޅުވީ މިސަރުކާރުން ކޮމެޓީތަކަށް ވެސް ނުފޫޒު ފޯރުވާ ކަމަށެވެ.
އެންޓި ޑިފެކްޝަން ގާނޫނަށް އިޝާރާތް ކުރައްވައި މެންބަރު އަބްދުއްރަހްމާން ވިދާޅުވީ މި ގާނޫނުގެ ސަބަބުން މެންބަރުންގެ ޝުއޫރުފާޅު ކުރުމަށް ދަތިތަކެއް އެބަހުރި ކަމަށެވެ. މި ގާނޫނު ބާތިލް ކުރުމަށް މަޖިލީހަށް ބިލު ހުށަހެޅުމަށް ޕީއެންސީގެ މެންބަރުން އެދޭ ކަމަށް މެންބަރު އަބްދުއްރަހްމާން ވިދާޅުވިއެވެ. މެންބަރު އަބްދުއްރަހްމާން ވިދާޅުވީ ސަރުކާރުގެ ނުފޫޒާއެކު ޕީއެންސީގެ މެންބަރުން މަސައްކަތް ކުރަމުންދާއިރު، ގޮނޑި ގެއްލިދާނެ ކަމުގެ ބިރު ވެސް އެބަ އޮތް ކަމަށެވެ. އަދި ޕާޓީ ވަކިކޮށްފިނަމަ ގޮނޑި ގެއްލޭނެ ކަމަށާއި، އެއީ ވަރަށް ބޮޑު ބިރެއް ކަމަށް މެންބަރު އަބްދުއްރަހްމާން ވިދާޅުވިއެވެ.
ރައްޔިތުންގެ މެންބަރުން އަޅުގަނޑު އެއްގޮތަކަށް ވެސް ގަބޫލެއް ނުކުރަން. އެއްވެސް ގޮތަކަށް ކޮންޓްރޯލް ކުރެވިގެންވާނެ ކަމަކަށް. ކޮންމެ ގޮތެއް ވިޔަސް އަޅުގަނޑުގެ ވަރަށް ގާތް އަހުން ކޮލިކުން މިތިބެނީ. އަޅުގަނޑު ގާތުގައި ގިނަ ބޭފުޅުން ޝަކުވާ ކުރާނީ. އަޅުގަނޑު މިއީ އެއްވެސް ސްޓޭންޑެއް ނުނަގައި ކޮންމެ ކޮޅަކަށް ވެސް ހުރެވޭ މީހާ ވީމަ. އަޅުގަނޑަށް ސީދާ އެބޭފުޅުން ރިކުއެސްޓް އެބަކުރޭ އެންޓި ޑިފެކްޝަން ގާނޫނު ބާތިލް ކުރަން ބިލެއް ލައިދޭށޭ. އައްދު ސްޕްރީމްކޯޓަށް ލައިދޭށޭ. ތިމަންނަމެން އައްދުއަށް ތާއީދުކުރާނަމޭ. ވޯޓު ވެސްދޭނަމޭ. ދެން އަޅުގަނޑު އެބޭފުޅުން ގާތުގައި ދެންނެވިން އަޅުގަނޑު ތިބިލު ލައިފާނަމޭ. އެކަމަކު އަޅުގަނޑު ފަހަތަށް ބަލާއިރު ތީގެން އެއްވެސް ބޭފުޅެއް ނުހުންނާނެ.ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު އަބްދުއްރަހްމާން
އެންޓި-ޑިފެކްޝަން ގާނޫނަކީ، ދިވެހިރާއްޖޭގައި ހިންގަމުންދާ މަލްޓި-ޕާޓީ ސިސްޓަމްގެ ދަށުން، ވަކި ސިޔާސީ ޕާޓީއެއްގެ ޓިކެޓްގައި ވާދަކޮށްގެން ރައްޔިތުންގެ މަޖިލީހަށާއި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމަށް ޤާއިމުކޮށްފައިވާ ސިޓީ ކައުންސިލްތަކަށާއި، އަތޮޅު ކައުންސިލްތަކަށާއި، ރަށު ކައުންސިލްތަކަށާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް އިންތިޚާބުވުމަށްފަހު، އެ އިންތިޚާބުވި ދައުރުގެ ތެރޭގައި، އިންތިޚާބުވި ޕާޓީގެ މެންބަރުކަމުން އެ މީހަކު ވަކިކޮށްފިނަމަ، ނުވަތަ އަމިއްލައަށް ވަކިވެއްޖެނަމަ، ނުވަތަ އެހެން ޕާޓީއެއްގެ މެންބަރަކަށް ވެއްޖެނަމަ، ނުވަތަ އަމިއްލަ ގޮތުން އިންތިޚާބުވެފައިވާ މެންބަރަކު އެ މީހަކު އިންތިޚާބުވި ދައުރުގެ ތެރޭގައި ސިޔާސީ ޕާޓީއެއްގެ މެންބަރަކަށް ވެއްޖެނަމަ އެފަދަ މެންބަރެއްގެ ގޮނޑިއާމެދު އަމަލުކުރާނޭ ގޮތް ކަނޑައެޅުމާއެކު، އެފަދައިން ގޮނޑި ހުސްވާ ހާލަތްތަކުގައި ބައި-އިލެކްޝަން ބޭއްވުމާގުޅޭ އުސޫލުތަކާއި އިޖުރާއަތުތައް ބަޔާންކުރުމުގެ ގާނޫނެވެ.
