ރިސޯޓްތަކުން ދައުލަތަށް ދައްކަންޖެހޭ ކުއްޔާއި، ޓެކްސްތައް ދައްކާ ދިވެހި ޒުވާނުންގެ މުސާރަ ދެނީ ޑޮލަރުން ކަމަށާއި، ދެން ހުރި އެއްޗެއް ސަރުކާރަށް މާރުކުރުމަށް ނޭންގޭނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ޕީއެންއެފް ފްރަންޓް އޮފީސް ޖަލްސާގައި ރައީސް ޔާމީން ވިދާޅުވީ ސަރުކާރުގެ ބޮޓުންތައް، ތިން ހަތަރު ފެމުނެއް ލާރިކާލާ ވާހަކަ ދައްކާއިރު، އެހާ އިހުތިރާމް ކުޑަކޮށް ދެއްކޭ ނުދެއްކޭ ވާހަކަ ނޭނގޭކަމަށެވެ. ދިވެހިން މިހާ ދުވަސްވަންދެން ދިރިއުޅުނީ ކޮން ބައެއް ކުރި މަސައްކަތުންތޯ ރައީސް ޔާމީން ސުވާލު އުފެއްދެވިއެވެ. އަދި ވެރިކަމުގައި ތިބި މީހުން ރައްޔިތުންނާއި ހަމައަށް އައިސް އެމީހުން ބޭނުންވާ ސުވާލެއް ކުރަން ޕެނަލްއެއްގައި ތިބެއްޖެއްޔާ އެމީހުން ބަރަހަނާ ވާނެ ކަމަށެވެ. އެއީ އެމީހުން ނަގާފައި ހުރި ފައިސާގެ ވާހަކަ ދެއްކީމާ ފަޟީހަތްވާނެތީ ކަމަށް ރައީސް ޔާމިން ވިދާޅުވިއެވެ.
ޔާމީން ވިދާޅުވީ ހުޅުމާލެއިން އަނެއްކާވެސް 9 ބިމެއް ވިއްކާލާ ވާހަކަ ދައްކާއިރު، އެ ވިއްކާނީ ނުއަގުގައި ކަމަށާއި، އެ ފައިސާ ދާނީ ކޮންމެވެސް މީހެއްގެ ޖީބަށް ކަމަށެވެ.
ރިސޯޓްތަކުގެ މީހުންނަށް ޑޮލަރު މާރުކުރަން އަންގާއިރު، ރިސޯޓްތަކުން ދައުލަތަށް ދައްކަންޖެހޭ ހުރިހާ ފައިސާއެއް ދައްކަނީ ޑޮލަރުން ކަމަށާއި، އޭގެ ފަހުން ވިޔަފާރީގެ ފައިދާގެ ގޮތުގައި ހުންނަ ފައިސާއިން ބޮޑު ހަރަދެއް ކުރަންޖެހެނީ އެމީހުން ހަދާފައި ހުންނަ އިންވެސްޓްމަންޓްތަކަށް ކަމަށް ރައީސް ޔާމީން ވިދާޅުވިއެވެ.
އިންވެސްޓްމަންޓްތަކަށް އެމީހުން ބޯރޯކޮށްފައި ހުރި ދިވެހިރާއްޖޭގެ ބޭންކަކުން ދިވެހި ފައިސާއަކުން ނޫނޭ. ރާއްޖެއިން ބޯރޯކޮށްފައި ހުރިއްޔާވެސް ހުންނާނީ ޑޮލަރުން. ގިނަ ފައިސާ ބޯރޯ ކޮށްފައި ހުރީ ބޭރުގެ ބޭންކުތަކުން. މަދުވާނެ ކުރީގެ ރިސޯޓްތައް ފިޔަވައި، ފަހުން މި 10 އަހަރު ތެރޭގައި ހެދި ރިސޯޓްތައް ލޯނުދައްކައިވެސް ނުނިމޭނެ. އަދިވެސް އެ ދަނީ ލޯނު ދައްކަމުން. އަދިވެސް އަޅުގަނޑުމެން ބޭނުންވަނީ އިތުރު ރިސޯޓްތައް ރާއްޖޭގައި ހެދިގެން އެއަރޕޯޓުގެ ބޭނުން ހިފާކަމުގައިވާނަމަ އިތުރު ރިސޯޓާއި އިތުރު ގެސްޓްހައުސް ހެދެންޖެހޭ. މިހާރު އިންޑަސްޓްރީގެ ކުރިމަރާލާކަމުގައިވާނަމަ ނުކުންނާނެ ނަތީޖާއަކީ އެއަރޕޯޓުގެ ބޭނުން ފުރިހަމައަށް ނުހިފޭނެ. އަދި ސަރުކާރަށް ލިބޭ އާމްދަނީ ކުޑަވާނެ.ކުރީގެ ރައީސް އަބްދުﷲ ޔާމީން
ރައީސް ޔާމީން ވިދާޅުވީ ރިސޯޓުތަކުގެ އިންވެސްޓްމަންޓަށް ބޮރޯކުރި ލާރި ނަގަފައިހުރީ ބޭރު ފައިސާއިންކަން ސަރުކާރަށް ނޭނގެނީތޯ ސުވާލު އުފައްދަވާފައެވެ. އަދި ދައުލަތުން ނަގާފައި ހުރި ލޯނުތަކަށް ބޭރު ފައިސާއިން ދައްކާގޮތަށް، ރިސޯޓް އިންޑަސްޓްރީގައި ވެސް ލޯނު ދައްކަނީ ބޭރު ފައިސާއިން ކަމަށެވެ.
އަދި ދައުލަތަށް ޑޮލަރު މާރުކުރާކަމުގައިވާނަމަ ދައުލަތުން ދޭނީ 15.42 ރޭޓުގައި ކަމަށާއި، މިއަދު ބާޒާރުގައި ޑޮލަރު އުޅެނީ 19.50ށް ކަމަށެވެ. އަދި ސަރުކާރަށް ޑޮލަރު މާރުކޮށްފައި ރިސޯޓްތަކުން ލޯނުތަކަށް ދައްކަން ޑޮލަރު ހޯދަންޖެހޭނީ ކަޅުބާޒާރުން ބޮޑު އަގުގައި ކަމަށެވެ.
މިއީ ކޮންކަހަލަ ދެކޮޅުޖެހޭ ކަމެއް. މިއީ ދެކޮޅު ޖެހޭކަމެއް ނޫން. މި ފައިސާއަކީ މި މީހުންގެ އަމިއްލަ ފައިސާ. މީހެއްގެ އަމިއްލަ އެއްޗެއް ދެން ސަރުކާރަކަށް އެންގޭނީ ކިހިނެއްތޯ. ސަރުކާރުން ނަގަންޏާ ޓެކްސް ނަގާ. ޓެކްސް ބޮޑުކުރޭ. ސަރުކާރަކަށް ނޭންގޭނެ ފައިސާ ދޭން. ދޭށޭ މިބުނާ ބަހުގެ މާނައަކީ މާރުކުރުމުގައި އެހާ އަގުގެ ތަފާތެއް އުޅޭތީ. މިއީ ކުރެވޭނެ ކަމެއް ނޫން. އެހެންވީމަ ބޮޑެތި ވިޔަފާރިވެރިން މިކަމާއި ދެކޮޅު ހަދަނީ. އެމީހުން އަދިވެސް ބޭނުންވޭ ރާއްޖޭގައި އިންވެސްޓްކުރަން. ދެން ދިވެހި ސަރުކާރަށް ހިޔާލަށްވެސް ނާންނަނީ އެމީހުންގެ ވަސީލަތްތައް ބޭނުންކޮށްގެން ޒުވާނުނަށް ދީފައި އޮތް ވަޒީފާތައް. ކިތައްހާސް ވަޒީފާ އެބައޮތްތޯ.ކުރީގެ ރައީސް އަބްދުﷲ ޔާމީން
ރައީސް ޔާމީން ވިދާޅުވީ ބޭންކް އޮފް މޯލްޑިވްސްއަށް ނަގުދު ފައިސާއިން ޑޮލަރު އެޅުމަކީ ހަމައެކަނި ރިސޯޓް ދާއިރާގެ ކޮންޓްރިބިއުޝަނެއް އޮތްކަމަށް ދެކޭ ގޮތްކަމަށް ސަރުކާރަށް ގަބޫލުކުރެވޭ ކަމަށެވެ. ނަމަވެސް ދިވެހި ޒުވާނުންނަށް ދޭ ފައިސާއަކީ ވެސް ކޮންޓްރިބިއުޝަނެއް ކަމަށެވެ.
އެމްއެމްއޭއަށް ޑޮލަރުގެ ތާށިކަމެއް އުޅެނީ ސަރުކާރުގެ މާލީ ސިޔާސަތު، ފައިސާ ނުވަތަ ބަޖެޓަށް ހޭދަކުރާ ގޮތް ގޯސްވެގެން ކަމަށެވެ. ނަމަވެސް އެއިންކަމެއް އިސްލާހުކަމަށް ސަރުކާރުން ބޭނުން ނުވާ ކަމަށެވެ.
