ބާރުލާފަ ހޯމް މިނިސްޓަރ އަލީ އިހުސާން ރާއްޖޭގަ ކޮރަޕްޝަން ނައްތާލާ ވާހަކަ ދައްކަވާ ކަމަށާއި މީޑިއާގައި ސުރުހީ ހެދުމުގެ ބަދަލުގައި އެ މަސައްކަތް ކުރެއްވުން މާ ރަނގަޅުވާނެ ކަމަށް ކުރީގެ ރައީސް އަބްދުﷲ ޔާމިން ވިދާޅުވެއްޖެއެވެ.
ކޮރަޕްޝަންއާއެކު ތަރައްގީއަށް ހުރަސްއެޅި، ވެރިކަން ބަލިކަށިވެގެންދާ ކަމަށާއި، މިކަން ހުއްޓުވުމަށް މިހާރަށްވުރެ ބޮޑަށް މަސައްކަތް ކުރަންޖެހޭ ކަމަށް ހޯމް މިނިސްޓަރު އަލީ އިހުސާން ވަނީ ދާދިފަހުން ވިދާޅުވެފައެވެ. އެ މަނިކުފާނު އެފަދައިން ވިދާޅުވެފައި ވަނީ އެންޓި ކޮރަޕްޝަން ލޯ އެންފޯސްމަންޓު އޭޖެންސީޒް އިން ދަ އޯއައިސީ މެންބަރު ސްޓޭޓްސްގެ 02 ވަނަ މިނިސްޓަރުންގެ ބައްދަލުވުމުގައި ވާހަކަ ދައްކަވަމުންނެވެ. މިނިސްޓަރ ވަނީ ކޮރަޕްޝަނާ ދެކޮޅަށް ކުރާ މަސައްކަތުގައި އައު އީޖާދުތަކާއި ޓެކްނޮލޮޖީއަކީ މުހިންމު ވަސީލަތެއް ކަމަށް ވިދާޅުވެފައެވެ. މިނިސްޓަރު އިހުސާން ވިދާޅުވީ ކޮރަޕްޝަނާ ދެކޮޅަށް ކުރާ ހުރިހާ މަސައްކަތެއްގައިވެސް ރާއްޖެ ދެމިއޮންނާނެ ކަމަށާއި ދެމެހެއްޓެނިވި ތަރައްގީ ހޯދުމަށާއި، ރައްޔިތުންގެ ދުޅަހެޔޮކަން ހިމާޔަތްކުރުމަށް ކޮރަޕްޝަނާ ދެކޮޅަށް މަސައްކަތް ކުރާނެ ކަމަށެވެ. އިހުސާންގެ އެ ވާހަކަތަކަށް އިޝާރާތްކުރައްވަ ރައީސް ޔާމީން ވަނީ އިޚުލާސްތެރިކަމާއި އެކު މަސައްކަތް ކުރާ ނަމަ އެ މަސައްކަތް ފުލުހުންނާއި ހަވާލު ނުކުރަނީ ކިއްވެތޯ ސުވާލު ކުރައްވާފައެވެ. އަދި ސަރުކާރުގެ ހުރި ކޮރަޕްޝަންގެ މައްސަލަތައް ނުބެލިގެން އުޅޭ ސަބަބާއި މެދު ރައީސް ޔާމީން ވަނީ ސުވާލު އުފައްދަވާފައެވެ. ކޮރަޕްޝަންގެ ވާހަކަދައްކާތާ އެތައް ދުވަހެއް ވެފައިވާ ކަމަށާއި މި ސަރުކާރުގެ ވެސް ކޮރަޕްޝަންގެ އެތައް މައްސަލަ އެއް އެބަހުރި ކަމަށް ރައީސް ޔާމީން ވިދާޅުވިއެވެ.
އޯ.އައި.ސީއަކީ ކޮރަޕްޝަން ހުއްޓުވުމުގައި ބެސްޓް ޕްރެކްޓިސްތައް ޙިއްސާކުރުމަށް އޮތް ބާރުގަދަ ޕްލެޓްފޯމެއްކަން ފާހަގަަކުރައްވައި މިނިސްޓަރު އިހުސާން ވިދާޅުވީ ގައުމުތަކުގެ މެދުގައި ހަރުދަނާ އެއްބާރުލުމެއް ލިބިގެން ނޫނީ، މިމަސައްކަތް ކާމިޔާބު ނުކުރެވޭނެ ކަމަށެވެ. އަދި ވިދާޅުވީ މިމަސައްކަތްތަކާއެކު ސަރަހައްދީ ގުޅުންތައް އުފެދި، މުއައްސަސާތައް ހަރުދަނާކޮށް، ކޮރަޕްޝަން ހުއްޓުވުމަށް ހުރި ގޮންޖެހުންތަކަށް ހައްލު ލިބޭނެ ކަމަށެވެ. މީގެ އިތުރުން މިނިސްޓަރު އިހުސާން ވިދާޅުވީ ކޮރަޕްޝަނުގެ ސަބަބުން މުޖުތަމައުގެ އިޖުތިމާއީ ފޭރާން ވީދި، ތަރައްގީއަށް ހުރަސްއެޅުމުގެ އިތުރުން ވެރިކަން ބަލިކަށިވެގެންދާ ކަމަށެވެ. މިނިސްޓަރު އިހުސާން ވިދާޅުވީ މުސްލިމު ގައުމުތައް އިސްލާމީ އަޤީދާއިން ލާޒިމުކުރާ ގޮތަށް ހާމަކަން ބޮޑު، އަދުލު އިންސާފުވެރިކަމާއި އިތުބާރުގެ މައްޗަށް އުސޫލުތައް ދެމެހެއްޓުމަކީ ވާޖިބެއް ކަމަށެވެ.
