ސިއްރު ކޮމިޓީ އެއް ބާއްވާ، އީސީ އާއި އޭސީސީގެ ބައެއް މެމްބަރުން ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީން ނިންމައިފިއެވެ.
އާދިއްތަ ދުވަހު ބޭއްވި އެ ކޮމިޓީގެ ބައްދަލުވުން ސިއްރުކުރަން ނިންމީ އެ ކޮމިޓީގައި ކުރިއަށް ގެންދާ މަސައްކަތުގެ އެޖެންޑާ ވެސް ހާމަ ކުރުމަކާއި ނުލައެވެ. ކޮމިޓީ ފެށުމާއި އެކު މެމްބަރުންގެ ހާޒިރީ އާއްމުކުރުމަށްފަހު، މުގައްރިރު ވަނީ ބައްދަލުވުން ކުރިއަށް ގެންދާނެ ގޮތެއް ނިންމުމަށް އެދިލައްވާފައެވެ. މިއީ މަޖިލީހުގެ އާއްމުކޮށް ކޮމިޓީ ހިންގާ އުސޫލާއި ޚިލާފަށް ކުރިކަމެއްކަން ފާހަގަކޮށްލެވެއެވެ. ކޮމިޓީގެ މަސައްކަތްތައް ސިއްރުކުރަނީ ޤައުމީ ސަލާމަތަށް ނުރައްކާވާ ހާލަތުގައި އާއި މީހެއްގެ އަބުރަށް އުނިކަން އައުން ފަދަ ހައްސާސް މައްސަލަތަކުގައި އެކަންޏެެވެ. އެ ހާލަތުގައި ވެސް ކޮމިޓީ ސިއްރުކުރާ ސަބަބު ސާފުކޮށް ކޮމިޓީ އިން ބަޔާންކޮށްދެއެވެ. ނަމަވެސް އާދިއްތަ ދުވަހު އަމަލުކުރީ މި ހުރިހާ އުސޫލަކާއި ޚިލާފަށެވެ.
ކެލާ ދާއިރާގެ މެންބަރު އަބްދުﷲ ޝަރީފު ހުށަހަޅުއްވާ، ކޮލަމާފުށީ ދާއިރާގެ މެންބަރު އިބްރާހިމް ދީދީ ތާއީދުކުރައްވައިގެން ކޮމިޓީ ބައްދަލުވުން ސިއްރު ކުރުމަށް ފަހު ކޮމިޓީގައި ކުރިއަށް ގެންދިޔައީ މިނިވަން މުއައްސަސާތަކުގެ މެމްބަރުންތަކެއް ވަކި ކުރުމުގެ މަސައްކަތެވެ. އެގޮތުން ރާއްޖެ އެމްވީ އަށް މައުލޫމާތު ދެއްވި ކޮމިޓީގެ މެމްބަރަކު ވަނީ އޭސީސީގެ ނައިބު ރައީސް އަބްދުއްސަލާމްގެ އިތުރުން އޭސީސީގެ މެމްބަރު ތޯހާ މުހައްމަދު މަޤާމުން ވަކިކުރުމަށް އާދިއްތަ ދުވަހު ނިންމިކަން ހާމަކުރައްވާފައެވެ. މީގެ އިތުރުން އިލެކްޝަންސްގެ ނައިބު ރައީސް އަލީ ނަޝާތު ވަކިކުރުމަށް ވެސް އެ ކޮމިޓީގައި ނިންމާފައިވެއެވެ. ހަމައެހެންމެ އީސީގެ މެންބަރުން ޑރ. މުހައްމަދު ޒާހިރު އަދި މުހައްމަދު އާސިފް ވަކިކުރުމަށް ވެސް އާދިއްތަ ދުވަހު ވަނީ ނިންމާފައެވެ.
އީސީގެ ނައިބު ރައީސާއި ބައެއް މެމްބަރުން ވަކިކޮށްފައި މި ވަނީ ސުލޫކީ މިންގަނޑާ ހިލާފަށް އަމަލުކޮށްފައިވާ ކަމަށް ތުހުމަތުކޮށް މިނިވަން މުއައްސަސާތަކުގެ ކޮމިޓީއަށް ފޮނުވާފައިވާ މައްސަލަ އަކާއި ގުޅިގެންނެވެ. އޮކްޓޯބަރު 22, ގައި އެ މައްސަލަ މަޖިލީހަށް ހުށަހަޅާ މި ހިސާބަށް އައި އިރު ވެސް އެ މީހުންނާއި މެދު ބަލަމުންދާ ސުލޫކީ މައްސަލަ އެއް ވެސް ސާފެއް ނޫނެވެ.
އާދިއްތަ ދުވަހު ސިވިލް ސަރވިސް ކޮމިޝަން ސީއެސްސީގެ ރައީސް މުހައްމަދު ނާސިހު ވަކިކުރުމުގެ މައްސަލަ ވެސް ބެލިއެވެ. އެހެންނަމަވެސް ކޮމިޓީގައި ނިންމީ އޭނާ ވަކި ނުކުރުމަށެވެ. އެ ކޮމިޓީގައި ކޮމިޓީން ނިންމީ ނާސިހު ވަކިނުކުރުމަށެވެ.
މިފަދަ ނިންމުމެއް ނިންމާފައި މި ވަނީ އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން، (އީސީ) ގެ ރައީސާއި ނައިބު ރައީސް، ރައީސުލްޖުމްހޫރިއްޔާ އައްޔަން ކުރައްވާގޮތަށް ބަދަލުކުރަން ޤާނޫނުތަކަށް ބަދަލު ގެނެސްފައިވާ ދަނޑިވަޅެއްގައެވެ.
