މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެންމެ ފަހުން ނެރުނު ތަފާސްހިސާބުތަކުން ދައްކާގޮތުން، ސެޕްޓެމްބަރު މަހު ރާއްޖޭގެ ރަސްމީ ރިޒާވް ވަނީ ފާހަގަކޮށްލެވޭ ވަރަށް ދަށަށް ގޮސްފައެވެ.

އެމްއެމްއޭ އިން ހާމަކޮށްފައިވާ މައުލޫމާތައް ބަލާއިރު، ރަސްމީ ރިޒާވް މީގެ ކުރީ މަހާ އަޅާބަލާއިރު 72 މިލިއަން ޑޮލަރު ވަނީ އުނިވެފައެވެ.

އޯގަސްޓް މަހުގެ ނިޔަލަށް ޤައުމުގެ ރަސްމީ ރިޒާވް ހުރީ 443.88 މިލިއަން ޑޮލަރުގައެވެ.

މިއީ ޖުލައި މަހާ އަޅާބަލާއިރު 48.45 މިލިއަން ޑޮލަރުގެ އިތުރުވުމެކެވެ. ނަމަވެސް، 24 ސެޕްޓެމްބަރުގެ ނިޔަލަށް ރިޒާވް ވަނީ 371.22 މިލިއަން ޑޮލަރަށް ދަށަށް ގޮސްފައެވެ.

އޯގަސްޓް މަހު 61 މިލިއަން ޑޮލަރަށް އިތުރުވެފައިވާ ބޭނުންކުރެވޭ ރިޒާވް މިހާރު ވަނީ 49 މިލިއަން ޑޮލަރަށް ދަށަށް ގޮސްފައެވެ. ރިޒާވުން ބޮޑު އެއްޗެއް އުނިވެފައިވަނީ 2026 ގައި މުއްދަތު ހަމަވާ 500 މިލިއަން ޑޮލަރުގެ ސުކޫކް ބޮންޑުގެ 25 މިލިއަން ޑޮލަރުގެ ކޫޕަން ޕޭމަންޓެއް ދެއްކުމާ ގުޅިގެން ކަމަށް ބެލެވެއެވެ.

މި ފައިސާ ދެއްކީ ހޯމަ ދުވަހުއެވެ.

ރާއްޖެއިން 2025 ވަނަ އަހަރު 600 މިލިއަން ޑޮލަރު އަދި 2026 ވަނަ އަހަރު 1 ބިލިއަން ޑޮލަރަށްވުރެ ގިނަ އަދަދެއްގެ ބޭރުގެ ދަރަނި އަދާކުރަން ޖެހެއެވެ. މި މާލީ ޒިންމާތަކާ ގުޅިގެން، ބައިނަލްއަޤްވާމީ ކްރެޑިޓް ރޭޓިންގ އޭޖެންސީތަކުން ވަނީ ކަންބޮޑުވުން ފާޅުކޮށްފައެވެ.

މޫޑީސް އިން ވަނީ ރާއްޖޭގެ ކްރެޑިޓް ރޭޓިންގ CAA1 އިން CAA2 އަށް ދަށްކޮށްފައެވެ. އަދި ފިޗް އިން ވަނީ ރޭޓިންގ +CCC އިން CC އަށް ބަދަލުކޮށްފައެވެ.

ކްރެޑިޓް ރޭޓިން ދަށްކޮށްފައިވަނީ ދަރަނި ނުދެއްކިދާނެ ކަމުގެ ރިސްކް އިތުރުވަމުންދާތީއެވެ.