ހަނދާނަށް އަންނަނީ ވެރިކަމާ ހަވާލުވެ ހުވާ ކުރެއްވި ދުވަހު ބޮޑު ދިދަ ކައިރީގައި ހުންނަވައިގެން ރައީސް ޑރ މުޙައްމަދު މުޢިއްޒު ދެއްވެވި ތަޤްރީރެވެ. ހަނދާނަށް އަންނަނީ ޗައިނާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު އެނބުރިވަޑައިގެން އެއަރޕޯޓުގައި ހުންނަވާ ރައީސް ދެއްކެވި ވާހަކަފުޅެވެ. މި ދެވާހަކަފުޅުގެ ތެރެއިން ވެސް ބޮޑަށް ހަނދާނަށް އަންނަނީ އިންޑިއާ އާއި ގުޅޭ ގޮތުން ސީދާ ކޮށާއި ނުސީދާކޮށް ދެއްކެވި ވާހަކަފުޅުތަކެވެ. ފަލަ ރަތް ރޮނގެއް ދަންމަވާލެއްވި ވާހަކަފުޅެވެ. ދެން އެހެން ގައުމަކަށް އެ ރޮނގު ހުރަސް ނުކުރެވޭނެ ކަމަށް ވިދާޅުވި ވާހަކަފުޅެވެ. ވަކި ގައުމަކަށް ބަރޯސާ ވެގެން އޮންނަން ނުޖެހޭނެ ކަމަށް ވިދާޅުވި ވާހަކަފުޅެވެ. އެހެން ބައެއްގެ އުނގަށް ނުވެއްޓި އަމިއްލަ ފައިމައްޗަށް ތެދުވަނީ ކަމަށް ވިދާޅުވެ ދެއްކެވި ވާހަކަފުޅެވެ.
ދިވެހިރާއްޖެ އޮންނަ ކަނޑަށް ވަކި ގައުމެއްގެ ނަން ކިޔަން ނުޖެހޭނެ ކަމަށާއި ވަކި ގައުމެއްގެ ބެކްޔާޑުގައި ރާއްޖެ އޮންނަން ނުޖެހޭނެ ކަމަށާއި، ވަކި ގައުމަކުން އެކަނި ބޭސްފަރުވާ ކުރަން ނުޖެހޭނެ ކަމަށާއި، ވަކި ގައުމަކުން ކާޑުގެ ބާވަތްތައް ގެންނަން ނުޖެހޭނެ ކަމަށް ވިދާޅުވެ، ކޯފާވެ ހުންނަވައިގެން ދެއްކެވި ވާހަކަފުޅުތަކެވެ. ދެން ހަނދާނަށް އަންނަނީ އަވައްޓަރި އިއްޑިއާ އާއި އެކު ދެވެހިރާއްޖެއިން ވެފައި ހުރި އެއްބަސްވުންތައް ރިވިއު ކުރުމުގެ ވާހަކަ ވެރިކަމުގެ ކުރީ ކޮޅު ދައްކަމުންދިއަ ދިއުމެވެ. ޚާއްސަ ކޮށް އިންޑިއާއި އެކު 100ށް ވުރެ ގިނަ އަސްކަރީ އެއްބަސްވުން އޮތް ކަމަށާއި، އެ އެއްބަސްވުން ރިވިއުކޮށް ބަދަލުތައް ގެންނާނެ ކަމަށް ބުނެ ސަރުކާރުން ދައްކަވަމުން ގެންދިއަ ވާހަކަތަކެވެ. ރާއްޖޭގެ ކަނޑުގެ އަޑި ކުރަހަން އިންޑިއާ އަށް ދީފައި އޮތް ހައިޑްރޯގްރަފީ އެއްބަސްވުން ގައުމުގެ ސިޔާދަތަށް ގެންލުންވާ ކަމަށް ބުނެ، އުވާލި އުވާލުމެވެ.
އެކަމަކު ކަންތައްތައް ބަދަލުވެގެން އައި ގޮތް ދެކިބަލާށެވެ. މިހާރު ރައީސް މުޢިއްޒު އެހުންނެވީ ފުރަމާނަ ދަތުރުފުޅެއްގައި އިންޑިއާގައެވެ. ރަސްމީ އިއްޒަތުގައި އެމަނިކުފާނަށް މަރުހާބާ އެދަންނަވަނީ އެ ވިދާޅުވާ އިންޑިއާ ސަރުކާރުގެ އިސްވެރިންނެވެ. ބައްދަލުކުރައްވަމުން އެގެންދަވަނީ ރައީސް މުޢިއްޒުގެ ސަރުކާރުގެ ސިޔާސީ ބޭފުޅުން އެމީހަކަށް ކުރުދޮށިން ދިން އަދި އެމީހެއްގެ ކާޓޫން ކުރަހައިގެން އުޅުނު އިންޑިއާގެ ބޮޑުވަޒީރު ނަރެންދްރަ މޯދީއާއި އެވެ. މަޝްވަރާތަކަށްފަހު ދެއްވި ޖޮއިންޓް ސްޓޭޓްމެންޓުގައި ވިދާޅުވަމުން އެގެންދަވަނީ އިންޑިއާ އަތުން އަތުލެއްވި ހައިޑްރޯގްރަފީ ދާއިރާއިން ގުޅުން ބަދަހި ކުރުމުގެ މަޝްވަރާތައް ކުރިއަށް ގެންދެވުނު ވާހަކައެވެ. ރާއްޖެ އޮންނަ ކަނޑަށް އިންޑިއަން އޯޝަން ކިޔާތީ ކަންބޮޑުވެވަޑައިގެންނެވި، އިންޑިއާ ކަނޑުގެ ސަލާމަތާ ރައްކާތެރިކަމަށް ދެ ގައުމު ގުޅިގެން މަސައްކަތް ކުރުމުގެ މަޝްވަރާތައް ކުރިއަށް ގެންދެވުނު ވާހަކަ އެވެ. މިކަމާ ގުޅުންހުރި އެއްބަސްވުންތަކެއް ވެވުނު ވާހަކަ އެވެ.
ރައީސް އިބްރާހީމް މުޙައްމަދު ސާލިޙްގެ ވެރިކަމުގައި އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމުކުރުމުގެ މަޝްވަރާތައް ކުރިއަށް ގެންދާތީ އެކަމާ ދެކޮޅަށް އިހުތިޖާޖް ކުރެއްވުމަށްފަހު މިއަދު ދައްކަވާތީ މި އިވެނީ އެބުނާ ކޮންސިއުލޭޓެއް އެޅުމަށް މަޝްވަރާ ކުރެވުނު ވާހަކަ އެވެ. ރާއްޖެ ކުޑައަކަސް ބުލީ ނުކުރެވޭނެ ކަމަށް ބުނި އިންޑިއާ އާއި އެކު 400 މިލިއަން ޑޮލަރުގެ ކަރަންސީ ސްވޮޕް އެއްބަސްވުމެއްގައި ސޮއިކުރެއްވި މަންޒަރެވެ.
އިންޑިއާއަށް ފުރާ ވަޑައިގަންނަވަމުން ބީބީސީ އަށް ރައީސް މުއިއްޒު ދެއްވި އިންޓަރވިއުގައި ރާއްޖެ އައިއެމްއެފް ޕްރޮގްރާމަކަށް ދާން ނުޖެހޭނެ ކަމަށް ވިދާޅުވިއެވެ. ސަބަބަކަށް ވިދާޅުވީ އިންޑިއާއިން އެހީތެރިވެދޭނެ ކަމަށެވެ. އިންޑިއާ އަށް ރާއްޖޭގެ މާލީ ހާލަތު އެގޭ ކަމަށް ވިދާޅުވި އެވެ. އިންޑިއާ އަށް ދެރަވާނެ ކަމެއް ނުކުރާނެ ކަމަށް ވިދާޅުވި އެވެ. އެހެން ގައުމަކާ އެކު ހަދާ އެއްބަސްވުމެއްގެ ސަބަބުން ވިޔަސް އިންޑިއާގެ ސަލާމަތަށް ނުރައްކާވާނެ ކަމެއް ނުކުރައްވާނެ ކަމަށް ވިދާޅުވި އެވެ. މިއަދު މޯދީގެ އަރިހުގައި ހުންނަވައިގެން ރައީސް އެ ވިދާޅުވަނީ އިންޑިއާ އަކީ ރާއްޖޭގެ އިގްތިޞާދީ، އުމްރާނީ އަދި އިޖްތިމާއީ ކުރިއެރުމުގެ މުހިންމު ބައިވެރިއެއް ކަމަށެވެ.
ސުވާލަކީ މިކަން ކުރިން އެނގިވަޑައިނުގަތީ ކީއްވެތޯއެވެ. ރާއްޖެ ބަނގުރޫޓްވިޔަ ނުދީ ސަލާމަތް ކޮށްދޭންވެސް އޮތީ ހަމަ އިންޑިއާކަން މިއަދު އެނގިވަޑައިގަތީ ކީއްވެތޯއެވެ. ހައިޑްރޯގްރަފީގެ ދާއިރާއިން އިންޑިއާ އެކު ގުޅުން ބަދަހި ކުރަންޖެހޭކަން އެދުވަހު ވިސްނިވަޑައި ނުގަތީ ކީއްވެތޯއެވެ. މިއިން އެއްވެސް ކަމަކުން ރާއްޖޭގެ މިނިވަންކަމަކަށް އިސްތިގުލާލަކަށް ސިޔާދަކަށް ނުރައްކަލެއް ނެތްކަން ކުރިން ވިސްނިވަޑައިނުގަތީ ތޯއެވެ. ނުވަތަ ރަނިލް އަރިހުގައި ވިދާޅުވި ގޮތަށް އެއީ ހަމަ އިންތިޚާބު ކާމިޔާބު ކުރައްވަން ޖެއްސެވިހާ ސްޓަންޓްތޯއެވެ. ރައީސް ވިދާޅުވީ ރަނގަޅަށެވެ. އިންޑިއާ އަކީ ރާއްޖޭގެ އިގްތިޞާދީ، އުމްރާނީ އަދި އިޖްތިމާއީ ކުރިއެރުމުގެ މުހިންމު ބައިވެރިއެކެވެ. އެކަމަކު އިންޑިއާ އަޓްއެވެ.
