ޤަވާއިދާއި ޚިލާފަށް ސެލޫން ހިންގައިގެން ބިދޭސީންތަކެއް ޑީޕޯޓްކޮށްލީ ރަނގަޅަށް ކަމަށާއި އެ މީހުން ޑީޕޯޓްކޮށްލީ ވިސާ އާއި ޚިލާފުވިކަން ޝައްކެއް ނެތް މިންވަރަށް ޔަގީންވުމުން ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ.
އިހުސާން އެފަދައިން ވިދާޅުވީ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައެވެ. އިހުސާން އެފަދައިން ވިދާޅުވެފައި މި ވަނީ ރާއްޖޭގައި ބިއުޓީ ސެލޫން ހިންގަނިކޮށް އިމިގްރޭޝަނުން ޑީޕޯޓް ކުރި ބިދޭސީން ޑީޕޯޓް ކުރީ ރަނގަޅަށް ނޫން ކަމަށް ބުނެ ބައެއް އާއްމުން އެކަމާއި މެދު ފާޑުކިޔަމުންދާ ދަނޑިވަޅެއްގައެެވެ. އިހުސާން ވިދާޅުވީ އިމިގްރޭޝަނުން މިހާރު ކުރިއަށް ގެންދާ އޮޕަރޭޝަންތަކުގައިކުށްތަކަށް އަރައިގަންނަ މީހުންނަށް ޚާއްސަ ފޯކަސް އެއް ބަހައްޓާ ކަމަށެވެ. އަދި ރާއްޖޭގައި ގަވައިދާ ހިލާފަށް އުޅޭ މީހުންގެ ތެރެއިން ވިޔަފާރި ކުރާ މީހުން ހިފާ ހައްޔަރުކޮށް ޑީޕޯޓްކުރަމުންދާ ކަމަށް އޭނާ ވަނީ ވިދާޅުވެފައެވެ،
އޭނާ ވިދާޅުވީ ޑީޕޯޓްކޮށްލި ބިދޭސީން ޑީޕޯޓްކޮށްލުމުގެ ކުރިން ބަލަން ޖެހޭ ކަންކަން ބަލާފައިވާނެ ކަމަށެވެ. އަދި މި މައްސަލައިގައި ހިމެނޭ ސެލޫން އިން ހިދުމަތް ހޯދުމަށް ފަހު ފައިސާ ދައްކަން މައުލޫމާތާ އެކު ބަހައްޓާފައި ހުރި ބޯޑުގައި ހިމަނާފައިވާ އެކައުންޓު ނަންބަރަކީ ސެލޫން ހިންގަމނުން އައި ރިޒް އާއި ޕާސަނަލް ގުޅުމެއް ބާއްވައިގެން އުޅުނު ރާއްޖޭގައި މަސައްކަތް ކުރާ އެހެން ބިދޭސީއެއްގެ އެކައުންޓް ކަމަށް އިހުސާން ވިދާޅުވިއެވެ. މި މައްސަލައިގައި އެ ބިދޭސީ މީހާ ދިން ބަޔާނަށް ބަލާއިރު، އެކަމަށް ބިދޭސީ މީހާ އެއްބަސްވެސް ވެފައިވާ ކަމަށް އިހުސާން ވިދާޅުވިއެވެ.
ރިޓްޒް ސެލޫންއަކީ ދިވެހިންގެ މެދުގައި މަޤުބޫލު ސެލޫނެކެވެ.
ރާއްޖޭގައި ފުޅާ ދާއިރާއެއްގައި ގަވާއިދާ ހިލާފަށް ސެލޫންގެ ވިޔަފާރި ހިންގަމުން ދިޔަ ދެމީހަކު ހައްޔަރުކޮށް ޑީޕޯޓުކޮށްލީ ނިމިދިޔަ ހަފްތާގެ ތެރޭގައެވެ.
އެކަން ހާމަކޮށް މޯލްޑިވްސް އިމިގްރޭޝަނުން އެކްސްގައި ހިއްސާކޮސްފައިވާ ޕޯސްޓެއްގައި ބުނެފައި ވަނީ ގަވާއިދާ ހިލާފަށް ސެލޫން ހިންގަމުންދިޔަ މައްސަލައިގައި ޑީޕޯޓު ކޮށްފައި ވަނީ ދެ ސެލޫން އެއް ހިންގުމުގައި އުޅުނު މީހުންނާއި އެ ސެލޫންތައް ހިންގުމުގައި އިސްކޮށް ތިބި މީހުން ކަމަށެވެ. އެގޮތުން އެ ދެ ސެލޫނަކުން ޖުމުލަ ހަ މީހުން ޑީޕޯޓްކޮށްފައިވާ ކަމަށް އިމިގްރޭޝަނުން ވަނީ ބުނެފައެވެ. ޑީޕޯޓްކޮށްފައިވާ މީހުންގެ ތެެރެއިން ހަތަރު ބިދޭސީންނަކީ ރިޓްޒް ބިއުޓީ ސެލޫންގެ ނަމުގައި ހިންގި ސެލޫންގެ މީހުންނެވެ. އެ ސެލޫން ހިންގުމުގައި އިސްކޮށް ހުރި ރަޖަނީ ޝްރެސްތާ (ރިޒް) ވެސް ވަނީ ހައްޔަރުކޮށްފައެވެ. އިމިގްރޭޝަނުން ބުނީ އެ 5 މި މީހުން އިމިގިރޭޝަނުގެ ބެލުމުގެ ދަށަށް ގެންދިޔައީ އޯގަސްޓު 11 ގައި ކަމަށެވެ. އަދި އެ އެންމެން ވެސް އޭގެ ދެ ދުވަސް ފަހުން ޑީޕޯޓު ކޮށްފައިވާ ކަމަށް އިމިގުރޭޝަނުން ވަނީ ބުނެފައެވެ.
އޭގެ ފަހުން މިމަހުގެ 18 ގައި ކުރިއަށް ގެންދިޔަ އޮޕަރޭޝަނެއްގައި ސުޝްމިތާ ދައުގޮދާ (ސުޒޫ)ވަނީ ހައްޔަރުކޮށްފައެވެ. އޭނާ ޑީޕޯޓްކުރީ އަންގާރަ ދުވަހު ކަމަށް އިމިގްރޭޝަނުން ވަނީ ބުނެފައެވެ. ގަވާއިދާ ހިލާފަށް އުޅޭ ބިދޭސީން ހޯދުމަށްޓަކާ ކުރިއަށް ގެންދާ ރެއިޑް އޮޕަރޭޝަންގެ ޓާސްކް ފޯސްގެ ކޮމްޕޮޒިޝަން އަށް ބަދަލުގެނެސް ބައެއް އިތުރު އިދާރާތައް ޓާސްކް ފޯސް އަށް އިތުރުކުރަން ސަރުކާރުން ވަނީ ނިންމާފައެވެ.
