މޯލްޑިވްސް ކަރެކްޝަން ސާވިސްގެ ބެލުމުގެ ދަށުގައި ހުއްޓާ މަރުވި ށ. ފުނަދޫ ޒަމާނީވިލާ، އުމުރުން 45 އަހަރުގެ މުހައްމަދު ޖަމީލް އަށް އަނިޔާކޮށްފައިވާ ކަމަށް ގައިދީންނާއި ހަވާލާދީކަމަށް ބުނެ ދައްކަމުންދާ ވާހަކަ އަކީ ހަގީގަތާއި ޚިލާފު ދޮގު ވާހަކަތަކެއް ކަަމަށް ކަރެކްޝަންސް އިން ބުނެފިއެވެ.

ހޮނިހިރު ދުވަހު ބޭއްވި ނޫސްވެެރިންގެ ބައްދަލުވުމުގައި އެސިސްޓެންޓް ކޮމިޝަނަރ އޮފް ޕްރިޒަންސް މުހައްމަދު އާސިފްް ވިދާޅުވީ އެ ސާވިސް ބެލުމުގެ ދަށުގައި ހުރި އެއްވެސް ގައިދީއަކަށް ގަސްތުގައި އަނިޔާކޮށްފައި ނުވާނެކަމުގެ ޔަޤީންކަން ދޭ ކަމަށެވެ.

ޖަމީލު މަރުވުމުގެ ކުރިން އޭނާ އަށް އަނިޔާކޮށްފައިވާ ކަމަށް ބައެއް ގައިދީންނާއި ހަވާލާދީ އާއްމުން ދިޔައީ ތުހުމަތުކުރަމުންނެވެ. އެކަމާއި ގުޅިގެން ރާއްޖެ ޓީވީ އިން ކުރި ސުވާލަކަށް ޖަވާބުދެއްވަމުން އާސިފް ވިދާޅުވީ ޖަމީލް ނިޔާވިކަން އެނގުނު ވަގުތު އޭނާ ހުންނެވީ ޖަލުގައި ކަމަށެވެ. އަދި ޖަމީލާއި އެއް ގޮޅިއެއްގައި ތިބި ގައިދީންނާއި ވެސް މި މައްސަލަ އާއި ގުޅިގެން ސުވާލުކޮށްފައިވާ ކަމަށް އާސިފް ވިދާޅުވިއެވެ. އިންސްޕެކްޓަރ އޮފް ކަރެކްޝަންސްގެ ފަރާތުން އެ މީހުންގެ ބަޔާންތައް ނެގުމުގެ މަސައްކަތް ވެސް ދަނީ ކުރިއަށް ކަމަށް އާސިފް ވިދާޅުވިއެވެ. ގައިދީންނާއި ހަވާލާދީ ކަމަށް ބުނެ ފަތުރަމުން ދަނީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށް އޭނާ ވަނީ ވިދާޅުވެފައެވެ. އަދި މިފަދަ މައުލޫމާތުތައް ނުފެތުރުމަށް އޭނާ ވަނީ ޢިލްތިމާސްކުރައްވާފައެވެ.

އެހެންނަމަވެސް ޖަމީލް ނިޔާވި ފަހުން 4 ގަޑި އިރު އޭނާ އަށް އެޓެންޑް ނުވެ ދިއުމަކީ އުނދަނގޫވެވަޑައިގަންނަވާ ކަމެއް ކަަމަށް އާސިފް ވަނީ ވިދާޅުވެފައެވެ.

މާފުށި ޖަލުގައި ޝަރީއަތް ނިމެންދެން ބަންދުކޮށްފައި ހުއްޓާ ނިޔާވި ށ. ފުނަދޫ ޒަމާނީވިލާ، އުމުރުން 45 އަހަރުގެ މުހައްމަދު ޖަމީލްގެ ހަށިގަނޑުގައި ހުރީ ބަޔަކު އަނިޔާކޮށްފައި ހުރި ކަމުގެ ނިޝާންތަކެއްކަމަށް ޑޮކްޓަރުންނަށްވެސް ބެލެވިފައިނުވާކަމަށް ފުލުހުން ވަނީ ބުނެފައެވެ. ފުލުހުން ބުނީ ހަށިގަނޑު ބެލިއިރު އެޗްއާރްސީއެމް އަދި އެންއައިސީންވެސް އެތަނުގައި ތިބި ކަމަށެވެ. އޭނާގެ ހަށިގަނޑުގައި ހުރީ ބަޔަކު އަނިޔާކޮށްފައި ހުރި ކަމުގެ ނިޝާންތަކެއްކަމަށް ޑޮކްޓަރުންނަށްވެސް ބެލެވިފައިނުވާކަމަށް ފުލުހުން ބުނެއެވެ.