ފުރަތަމަ ދުވަހު މަނިކުފާނު ވެރިކަމަށް ފައިނަންގަވާފައި ދެއްކެވި ވާހަކަފުޅު އަޑު އަހާލީމައި ހިތަށް އަރާނެއެވެ. ވެރިކަމަށް ކުރީގެ ރައީސް އަބްދުﷲ ޔާމީނަށް ހަމަ ފުރުސަތު ލިބިވަޑައިގެންނެވި ފަދަ ތާއެވެ. މަނިކުފާނަކީ ޔާމީނުގެ ހިޔަނިފުޅުކަމަށް ސިފަކުރެއްވީމުއެވެ. ލެއްވިހައި ރާގަކަށް ހުޝާމަދާއި ތައުރީފުވެސް ކުރެއްވީމުއެވެ. ކޮންމެ ޕޯޑިއަމެއްގައި، ކޮންމެ މައިކެއްގެ ކައިރީގައިވެސް ފުރަތަމަ ދައްކަވަނީ ޔާމީންގެ ވާހަކައެވެ.
މަނިކުފާނަށް ތާއީދުކުރާ އަރިސް ކުދިންކޮޅު މަނިކުފާނުގެ ނަންފުޅަށްވުރެ ގިނައިން ކިޔަނީ ޔާމީންގެ ނަންފުޅެވެ. މަނިކުފާނުގެ ޚިދުމަތުގެ ވާހަކައަށްވުރެ ބާރަށް ދައްކަނީ ޔާމީންގެ ޚިދުމަތުގެ ވާހަކައެވެ. ޚުދު މަނިކުފާނުވެސް ދެއްކެވީ އޭރުގެ ވެރިކަމުގައި އެންމެ އަރިހުގައި ހުންނެވި ވާހަކައާއި، ތަރައްގީގެ މަޝްރޫއުތަކުގައި ހިއްސާ އޮންނާނެކަމުގެ ވާހަކައެވެ. ޚިޔާލާއި ފިކުރު އެއްގޮތް ވާހަކައެވެ. އަމުދުން ތާއީދުކުރައްވާ ކަންކަން ނިކަން އެއްގޮތްކަމުގެ ވާހަކައެވެ. މަނިކުފާނުގެ ފޮޓޯފުޅަށްވުރެ ބޮޑުކޮށް އިިދިކޮޅު ލީޑަރު އަބްދުﷲ ޔާމީނުގެ ފޮޓޯފުޅު ޖައްސަވައިގެން ކެމްޕެއިން ފެއްޓެވީ، އެންމެ ބޮޑު ކާމިޔާބީއަކީ ޔާމީންގެ އަަރިސް ބޭފުޅަކަށް ވެވަޑައިގަތުން ކަމުގައި ވިދާޅުވަމުންނެވެ.
ޔާމީން ސަރުކާރުގެ ކޮންކްރީޓް ތަރައްގީގެ ކިރިޔާވެސް ކަމެއް ހިނގާފައި އޮތިއްޔާ އެކަމުގެ ކްރެޑިޓް ފަތުގައި ނަންފުޅު އޮންނާނެ ވާހަކަ ތަފާތު އެކި މޭރުމަށް ވިދާޅުވީމުއެވެ. އަދި ކްރެޑިޓް ލިބޭނެފަދަ އެއްވެސް ކަމެއް އެ ވެރިކަމުގައި ހިނގާފައި އޮތިއްޔާ، އެ ވާހަކަފުޅެއް ތަކުރާރު ކުރައްވަމުއެވެ. އޭރުގެ ވެރިކަމުގެ ހައުސިންގއާއި އުމްރާނީ ސިޔާސަތުތަކުން ފެށިގެން ގޮސް، އެންމެ އަސާސީ ކަންކަމަށްވެސް ކްރެޑިޓް ނެންގެވެން އޮތް ކަމެއްގެ ކުނޑި ފުކެއްވެސް ދޫކޮށެއް ނުލައްވަމުއެވެ.
އެކަމަކު އޭރުގެ ސަރުކާރުގެ އަނިޔާވެރިކަމޭ ހަމަ ބުނާއިރަށް ވިދާޅުވަނީ ނޫނޭ "ހޯހޯ މިއީ ޔާމީނެއް ނޫން"ކަމަށެވެ. އޭރުގެ ކޮރަޕްޝަންގެ ޒިންމާ ނަންގަވަންވާނެ ނޫންތޯއޭ ދެންނެވުމުން، މަނިކުފާނުގެ އަައުވާނުންގެ ރައްދެއްނެތެވެ. އޭރު ގާނޫނާ ޚިލާފަށް ކުރި ކަންކަމާމެދު މަނިކުފާނަށް ސުވާލު ނުދެންނެވޭނެ ކަމަށް ހަރު އަޑުފުޅުން ވިދާޅުވެއެވެ. އޭރު ވެރިކަމުގައި ހިނގި ނޭއްގާނީ ކަމަކާމެދު ޖަވާބުދެއްވުމަށް ގޮވާލާ ހިސާބުން ވިދާޅުވަނީ މަނިކުފާނަކީ ޔާމީން ނޫންކަމަށެވެ. އެ ވެރިކަމުގައި އުސޫލުން ބޭރުން ކޮށްފައިވާ ކަންކަމުގެ ޒިންމާ ނަންގަވަން ޖެހިވަޑައިގަންނަވާނެ ކަމަށް ދެންނެވުމުން ވިދާޅުވަނީ، އެއީ ތިމަންމަނިކުފާނުގެ ވެރިކަން ނޫންކަމަށެވެ. ސުވާލުތަކުގެ ކުރިމައްޗަށް ނުކުމެވަޑައިގެން ޒިންމާ ނަންގަވަންވުމުން، އެ ވެރިކަމާ ގުޅުމެއް ނެތެވެ. ޔާމީނާ މަނިކުފާނާ އެއީ އެ ހިސާބުން ދެ ޝަޚުސެކެވެ. އެކަމަކު ތައުރީފާއި ހުޝާމަދު ހޯއްދެވުމުގައި އެކަން މުޅިން ތަފާތެވެ.
