މަސައްކަތް ކުރުވުމަށްފަހު ޓްވިޓަރއިން ދައްކަންޖެހޭ ބިލްތަކެއް ނުދައްކައިގެން، އޮސްޓްރޭލިއާގެ ޕްރޮޖެކްޓް މެނޭޖްމަންޓް ފަރމަކުން ޓްވިޓަރއާ ދެކޮޅަށް ދައުވާކުރުމަށް ނިންމައިފިއެވެ.

އެކުންފުނިން ވަނީ ހަތަރު ގައުމެއްގައި ޓްވިޓަރއިން ކުރި މަސައްކަތްތަކުގެ ބިލްތައް ނުދައްކައިގެން، ހަސަތޭކަ ފަސްދޮޅަސް ފަސް މިލިއަން ޑޮލަރު ހޯދުމަށް ކޯޓަށް ގޮސްފައެވެ. ސިޑްނީގައި ހުންނަ މި ކުންފުނިން ޓްވިޓަރއާ ދެކޮޅަށް ދައުވާ ކުރުމަށް މައްސަލަ ހުށަހަޅާފައިވަނީ، އެމެރިކާގެ ޑިސްޓްރިކްޓް ކޯޓު ފޮރ ދަ ނޮދަރން ޑިސްޓްރިކްޓް އޮފް ކެލިފޯނިއާއަށެވެ.

މި ކުންފުނިން ބުނާގޮތުގައި 2022 ވަނަ އަހަރާއި 2023 ވަނަ އަހަރުގެ ކުރީކޮޅު، ލަންޑަނާއި ޑުބްލިންގައި ސެންސަރުތަކެއް ހަރުކޮށްފައިވާކަމަށާއި، ސިންގަޕޫރުގެ އޮފީސް އެއްކޮށް ނިންމާފައިވާއިރު ސިޑްނީގައި ހުރި ޓްވިޓަރގެ އޮފީހެއް އެއްކޮށް ހުސްކޮށްފައިވާކަމަށެވެ. އެމަސައްކަތްތަކަށް ޓްވިޓަރއިން އެކުންފުންޏަށް ފަސްސަތޭކަ ސާޅީސް ހަހާސް ޑޮލަރާއި، ފަސްދޮޅަސް އެއްހާސް ތިން ސަތޭކަ ޑޮލަރު ދައްކަން ޖެހޭކަމަށެވެ.

ކުންފުނިން ބުނިގޮތުގައި، އެ ކުންފުނިން ޝަރީއަތުގައި އެދެނީ ގެއްލުމުގެ ބަދަލު ޝަރީއަތުން ނިންމާގޮތަކަށް ހޯދުމަށާއި، ގާނޫނީ އެހީތެރިކަން ހޯދުމަށް ދާ ޚަރަދު، ހޯދެން އޮތް އެންމެ ބޮޑުކޮށް ހޯދުމަށެވެ.

މެއި މަހުގެ ތެރޭގައި ކުރީގެ ޕަބްލިކް ރިލޭޝަންސް ފަރމަކުން ވަނީ ނުދައްކާ ބިލްތަކެއް ހުރެގެން ޓްވިޓަރއާ ދެކޮޅަށް ދައުވާކޮށްފައެވެ. އަދި މިއަހަރުގެ ކުރީކޮޅު އެމެރިކާގެ ކުންފުންޏަކުންވެސް ވަނީ، ނުދައްކައި ހުރި ބިލްތަކަކަށް 1.9 މިލިއަން ޑޮލަރު ހޯދުމަށް އެދި ކޯޓަށް ހުށަހަޅާފައެވެ.