ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި ކެނެޑާއާ ދެކޮޅަށް ކުޅޭ މެޗަކީ ވަރަށް އުނދަގޫ މެޗަކަށްވާނެ ކަމަށާއި، އެއީ ފައިނަލެއް ކަމަށް މޮރޮކޯގެ ކޯޗު ވަލީދު ބުނެފިއެވެ.
ކެނެޑާ މެޗަށް ނުކުންނައިރު ގްރޫޕް އެފްގައި މޮރޮކޯ އޮތީ ދެ ވަނައިގައެވެ. އެއީ ކުޅުނު ދެ މެޗުން ހަތަރު ޕޮއިންޓު ހޯދައިގެންނެވެ. އެއް ވަނައިގައި އޮތް އެންމެ ފަހުގެ ރަނަރަޕް ކްރޮއޭޝިޔާ އަށް ވެސް ލިބެނީ ހަތަރު ޕޮއިންޓެވެ. ތިން ވަނައިގައި އޮތް ބެލްޖިއަމަށް ލިބެނީ ތިން ޕޮއިންޓެވެ. ފުލުގައި ކެނެޑާ އޮތީ ޕޮއިންޓެއް ނުލިބިއެވެ. އެހެންކަމުން ކެނެޑާ މެޗު އެއްވަރުކޮށްލައިގެން ވެސް މޮރޮކޯ އަށް ދެ ވަނަ ބުރަށް ދެވޭނެއެވެ. އެ ޓީމު ބަލިވެއްޖެ ނަމަ، ދެން ޖެހޭނީ ކްރޮއޭޝިޔާ އަދި ބެލްޖިއަމް މެޗުގެ ނަތީޖާ އަށް އިންތިޒާރު ކުރާށެވެ.
މެޗުގެ ކުރިން އޮތް ޕްރެސްގައި ވާހަކަ ދައްކަމުން މޮރޮކޯގެ ކޯޗު ވަލީދު ބުނީ، އޭނާ އަށް ހީވާ ގޮތުގައި ކެނެޑާ މެޗު ވެގެންދާނީ ވަރަށް އުނދަގޫ މެޗަކަށް ކަމަށާއި، އެއީ ފައިނަލެއް ކަމަށެވެ. އަދި މޮރޮކޯ އިން ނުކުންނަން ޖެހެނީ އެއްވެސް ކަމެއް ގެއްލެން ނެތް ޓީމަކާ ދެކޮޅަށް ކަމަށެވެ. ވަލީދު ބުނީ ކެނެޑާ މިހާރު ވެސް އޮތީ މުބާރާތުން ކަޓައިފަ ކަމަށާއި، އެހެންކަމުން އެ ޓީމަށް މުހިންމު ވާނީ ޕޮއިންޓަކާއެކު މުބާރާތް ނިންމާލުން ކަމަށެވެ. އޭނާ ބުނީ މޮރޮކޯ ޓީމު އޮތީ ވަރަށް ބޮޑު ހިތްވަރަކާއެކު ކަމަށާއި، ކުޅުންތެރިންނަށް ބޮޑު ރެސްޓެއް ލިބުނު ކަމަށެވެ. އެހުރިހާ ކަމަކާއެކު ވެސް އުނދަގޫ މެޗަކަށް ތައްޔާރުވަމުން އަންނަ ކަމަށާއި ކެނެޑާ އަކީ އެ ގްރޫޕްގައި އޮތް ރަނގަޅު ޓީމެއް ކަމަށެވެ.
އިތުރަށް ވާހަކަ ދައްކަމުން ވަލީދު ބުނީ މޮރޮކޯ ޓީމުން ހާސިލްކުރަން ބޭނުންވަނީ ކޮންކަމެއްކަން އެނގޭ ކަމަށާއި، މޮރޮކޯ ޓީމު މުބާރާތުގައި އޮތް ސަބަބު ވެސް އެނގޭ ކަމަށެވެ. އޭނާ ބުނީ ފަހު މެޗުގައި ރެފްރީގެ އެންމެ ފަހު ކަށިގަނޑު ފުމެންދެން ދެކޭނީ މޮރޮކޯ ޓީމު އަނެއް ބުރަށް ނުދާ ކަމަށާއި، އެއްކަމެއް ވެސް ހާސިލްނުވާ ކަމަށެވެ.
އާން. މެޗަށްފަހު އަހަރަމެންނަށް އެނގޭ، ހާސިލްކުރަން ބޭނުންވާ ކަންތައް. މިތަނުގައި އަހަރަމެން މިތިބި ސަބަބު ވެސް އެނގޭ. އަހަރަމެން މިތިބީ ވަރަށް ހިތްވަރާއެކު، ރެފްރީ އެންމެ ފަހު ކަށިގަނޑު ފުމުމާ ހަމައަށް އަހަރަމެން އަނެއް ބުރަށް ކޮލިފައިނުވާނެކަމާއި، އެއްވެސް ކަމެއް ހާސިލްނުވާނެ، އެކަން އެނގޭ. ދެެކެނީ ވެސް އެގޮތަށް.ވަލީދު / މޮރޮކޯގެ ކޯޗު
މީގެ އިތުރުން ވަލީދު ބުނީ އަބަދުވެސް ގެންގުޅޭނީ އެންމެ ފުރަތަމަ ޕްލޭން ކަމަށެވެ. އޭނާ ބުނީ އަބަދުވެސް މެޗަށް ނުކުންނަނީ މޮޅުވާން ކަަމަށާއި، ކުރިއަށް އޮތް މެޗަށް އެހެން ވިސްނުމެއްގައި ދިޔުމަކީ ވަރަށް ބޮޑު ގޯހެއް ކަމަށެވެ. އަދި ކެނެޑާ އިން އެމީހުންގެ އަމިއްލަ ތާރީޚެއް ލިޔަން ބޭނުންވާނެ ކަަމަށާއި، އޭނާ ދެކޭ ގޮތުގައި އެމީހުންނަކީ މުބާރާތުގައި އެންމެ ރަނގަޅު ސްކޮޑު އޮތް އެއް ޓީމު ކަމަށެވެ. ވަލީދު ބުނީ ކެނެޑާ ޓީމުގައި މޮޅެތި ކުޅުންތެރިން ތިބި ކަމަށާއި، މޮރޮކޯ މެޗު އެމީހުން ފަސޭހަ ނުކުރާނެ ކަމަށެވެ. އެގޮތުން މުބާރާތް ނިންމާލުމުގެ ކުރިން ކެނެޑާއިން މަދުވެގެން އެއް ޕޮއިންޓު ބޭނުންވާނެކަން ފާހަގަކޮށް ވަލީދު ބުނީ، މޮރޮކޯ އިން އެކަމަށް އިހުތިރާމު ކުރާނެ ކަމަށެވެ.
މުބާރާތުގައި ކެނެޑާ އަދި މޮރޮކޯ ބައްދަލުކުރާ މެޗު ފަށާނީ ބުރާސްފަތި ދުވަހުގެ ރޭ ރާއްޖެ ގަޑިން 20:00 ގައެވެ.
