ގެޓާފޭ ބަލިކޮށް އެތުލެޓިކޯއިން މޮޅަކާއެކު ސްޕެނިޝް ލީގު ފަށައިފިއެވެ.

ހޯމަ ދުވަހުގެ ރޭ ގެޓާފޭގެ ދަނޑުގައި ކުޅުނު މެޗު އެތުލެޓިކޯއިން ކާމިޔާބުކުރީ 3-0 އިންނެވެ.

މެޗު ފަށައިގެން 15 ވަނަ މިނެޓުގައި ޖާއޯ ފެލިކްސްގެ އެހީތެރިކަމާއެކު އެތުލެޓިކޯއަށް ލީޑު ނަގައިދިނީ އަލްވާރޯ މޮރާޓާއެވެ. އިތުރު ލަނޑު ޖެހުމަށް އެތުލެޓިކޯއިން މަސައްކަތް ކުރި ނަމަވެސް، ފުރަތަމަ ހާފުގައި އިތުރު ލަނޑެއް ކާމިޔާބެއް ނުކުރެވެއެވެ. އެ ޓީމުގެ އަނެއް ދެ ލަނޑު ފެނުނީ މެޗުގެ ދެ ވަނަ ހާފުގައެވެ.

އެތުލެޓިކޯގެ ދެ ވަނަ ލަނޑު މެޗުގެ 59 ވަނަ މިނެޓުގައި ވެސް މޮރާޓާ ޖެހީ ފެލިކްސްގެ އެހީތެރިކަމާއެކުއެވެ. އެ ޓީމުގެ ފަހު ލަނޑު ފެލިކްސްގެ އެހީތެރިކަމާއެކު އެންޓޮއިން ގްރީޒްމަން ޖެހީ 75 ވަނަ މިނެޓުގައެވެ.

ލީގުގައި ކޮންމެ ޓީމެއް ވެސް މިހާރު ވަނީ އެއް މެޗު ކުޅެފައެވެ. ލީގުގެ އެއް ވަނަ މަގާމުގައި އެތުލެޓިކޯ އޮތީ ތިން ޕޮއިންޓާއެކު، ފައިދާ ގޯލުންނެވެ. ދެ ވަނަ މަގާމުގައި ރެއާލް ބެޓިސް އޮތް އިރު، ތިން ވަނަ މަގާމުގައި އޮތީ ވިލަރެއާލްއެވެ. އޮސަސޫނާ ހަތަރު ވަނަ މަގާމުގައި އޮތް އިރު، އެންމެ ފަހުގެ ޗެމްޕިއަން ރެއާލް މެޑްރިޑު އޮތީ ފަސް ވަނަ މަގާމުގައެވެ. ވާދަވެރި ބާސެލޯނާ އޮތީ ފުރަތަމަ މެޗުން ލިބުނު އެއް ޕޮއިންޓާއެކު 11 ވަނައިގައެވެ.