ލިސްޓަކީ ގާނޫނީ ބުރަދަން ހުރި ލިސްޓެއް ނޫން - ވަކީލު ނިޝާން
ގާނޫނީ ބުރަދަން ލިބޭނީ ކޯޓު މަރުހަލާ ނިމުމުން
މަޝްހޫރު ގާނޫނީ ވަކީލު މުހައްމަދު ނިޝާން އިބްރާހީމް
މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) ތެރެއިން ހިންގި ކޮރަޕްޝަނުގެ ފައިސާ ލިބުނު މީހުން ކަމަށް ބުނާ ލިސްޓަކީ ގާނޫނީ ބުރަދަނެއް ހުރި ލިސްޓެއް ނޫން ކަމަށް މަޝްހޫރު ގާނޫނީ ވަކީލު މުހައްމަދު ނިޝާން އިބްރާހީމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން ގާނޫނީ ވަކީލު ނިޝާން ވިދާޅުވީ އެ ލިސްޓަކީ ގާނޫނީ ބުރަދަނެއް ހުރި ލިސްޓެއް ނޫން ކަމަށާއި ގާނޫނީ ބުރަދަން ލިބޭނީ ކޯޓު މަރުހަލާ ނިމުމުން ކަމަށެވެ.
ނިޝާން ވިދާޅުވީ އެސެޓް ރިކަވަރީ ކޮމިޝަނަކީ ޖިނާއީ ތަހުގީގު ހިންގުމުގެ ބާރު އޮތް ކޮމިޝަނެއް ކަމަށާއި އެގޮތުން އެ ކޮމިޝަނަށް ވަރަށް ގިނަ ބާރުތައް ދީފައިވާ ކަމަށެވެ. އެހެން އެކަން އޮއްވައި ރައްޔިތުންގެ މަޖިލީހުން ޚިޔާނާތުގެ ލިސްޓު އާންމުކުރުން އެއީ އެންމެ ރަނގަޅު ކަމެއް ނޫން ކަމަށާއި މި ލިސްޓުގައި ހިމެނޭ ބައެއް މީހުންނަކީ ކުށްވެރިން ނޫން ކަމަށް ވިދާޅުވިއެވެ.
ޖިނާއީ ތަހުގީގު ކުރަމުން އަންނަ ދަނޑިވަޅެއްގައި މިގޮތަށް ލިސްޓު އާންމުކުރާއިރު މި ލިސްޓުގައި ހިމެނޭ ބައެއް ފަރާތްތަކަށް އޭނާ އެކަމުގައި ޝާމިލްވާކަން ވެސް އެނގިފައިވަނީ ލިސްޓު އާންމުކުރުމުން ކަމަށާއި އެހެން ކަމުން އެއީ އެ ފަރާތްތަކުގެ ކުރިމަގަށް އެޅިދާނެ ހުރަހެއް ކަމަށް ނިޝާން ވިދާޅުވިއެވެ.
ނިޝާން އިތުރަށް ވިދާޅުވީ މި ލިސްޓު އާންމު ކުރުން އެއީ ތަހުގީގަށް އެޅޭނެ ހުރަހެއް ކަމަށާއި ލިސްޓު އާންމު ކުރުމާއެކު ހެކި ނައްތާލުމަށް ކުށްކުރާ ފަރާތަށް ފަސޭހަވާނެ ކަމަށެވެ. އެހެން ކަމުން މިއީ ހެކި ނައްތާލުމަށް ހުޅުވިގެންދިޔަ ދޮރެއް ކަމަށް ވިދާޅުވިއެވެ. މިފަދަ މައްސަލަތަކުގެ ތަހުގީގު ނިންމުމަށް ވަރަށް ގިނަ ދުވަސް ނަގާނެ ކަމަށާއި މިކަހަލަ ކަންކަމުގައި އާންމުންނާއި ހިސާބަށް ގެނަސްދޭން ވާނީ ސައްހަ މައުލޫމާތު ކަމަށްވެސް ވިދާޅުވިއެވެ.
