އިންޓެލް މައުލޫމާތަކާ ގުޅިގެން ވީއައިއޭގެ ސެކިއުރިޓީ ލެވެލް މަތިކޮށްފި

އެމްއެންޑީއެފަށް ލިބުނު އިންޓެލް މައުލޫމާތަކާއި ގުޅިގެން ވެލާނާ އިންޓަރނޭޝަލް އެއަރޕޯޓް (ވީއައިއޭ) ގެ ސަލާމަތީ ކަންކަން ވަރުގަދަ ކޮށްފިއެވެ.

އެކަން އެމްއެންޑީއެފް ގެ މީޑިއާއިން ވަނީ ކަށަވަރު ކޮށްދީފައެވެ. އެމްއެންޑީއެފުން ބުނީ، ހުކުރު ދުވަހުން ފެށިގެން ވީއައިއޭގެ ސަލާމަތީ ކަންކަން ވަރުގަދަކޮށް، ސެކިއުރިޓީ ލެވެލް މަތިކޮށްފައިވަނީ ލިބުނު މައުލޫމާތަކާއި ގުޅިގެން ކަމަށެވެ. ނަމަވެސް އެކަމާ ގުޅޭ އިތުރު ތަފްސީލު ހާމަކޮށްފައެއް ނުވެއެވެ.

ކުރީގެ ރަޢީސް އަދި ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލައާ ގުޅިގެން ގްރޭޓަރ މާލެ ސަރަހައްދުގެ އިތުރުން، މުޅި ރާއްޖޭގެ ސެކިއުރިޓީ ވަރުގަދަކޮށް ސިފައިން ދަނީ ހަރަކާތްތެރިވަމުންނެވެ. އެކަމާ ގުޅޭގޮތުން އެމްއެންޑީއެފުން ބުނީ، އެ ހަމަލާއާ ގުޅިގެން ސިފައިން ހަތިޔާރާއެކު މާލެ ސަރަޙައްދުގެ ކަންކަން ބަލަމުންދާ ކަމަށެވެ. އަދި މުޅި ރާއްޖޭގައި ވެސް ސިފައިންގެ ސެކިއުރިޓީ އިތުރަށް ވަރުގަދަކޮށް، ޙަރަކާތްތެރި ވަމުންދާކަމަށް ބުނެފައިވެއެވެ.

މާލޭގައި ދިން ޓެރަރިސްޓް ހަމަލާގައި ރައީސް ނަޝީދުގެ އިތުރުން، އަރިހުގައި އެވަގުތު ތިބި ސިފައިންނާއި އާންމުންނަށްވެސް އެކި ވަރުގެ އަނިޔާ ލިބިފައިވެއެވެ.