ރާއްޖެއަށް މިހާރު ކުރަމުންދާ ވިއްސާރައިގައި ހއ. ހޯރަފުއްޓަށް އުދައަރައި ބޮޑެތި ގެއްލުންތަކެއް ވެއްޖެއެވެ.
ހޯރަފުއްޓަށް އުދައަރާއި ބައެއް މީހުންގެ މުދަލާއި ތަކެއްޗަށް ވެސް ގެއްލުން ވެފައިވާއިރު މިކަމާ ގުޅޭ މައުލޫމާތު 'ރާއްޖެއެމްވީ'އާއި ހިއްސާ ކުރަމުން އެ ރަށު ކައުންސިލުގެ ރައީސް މުހައްމަދު ވަހީދު ވިދާޅުވީ އުދަ އެރުމުގެ ސަބަބުން މަގުތަކުގައި ފެންބޮޑުވެފައިވާ ކަަމަށެވެ. އަދި ރަށުގެ ދެކުނުގެ ހުރިހާ މަގެއްގައި، ޚާއްސަކޮށް ހެލްތް ސެންޓަރު ހުންނަ މަގުގައި ވަރަށް ބޮޑަށް ފެންބޮޑުވެފައިވާ ކަމަށް ވިދާޅުވިއެވެ.
އަދި މިހާރު ކުރަމުންދާ ވިއްސާރައިގައި ބައެއް ގޭގޭގެ ފުރާޅު އެއްލާލައިފައިވާ ކަމުގެ މައުލޫމާތު ލިބެމުން ދާކަމަށާއި އެއްގަމުގައި ހުރި ބައެއް އޮޑި ދޯނި ފަހަރާ ފައިބަރު ދޯނި މޫދަށް ފައިބައިފައިވާ ކަމަށެވެ. އަދި މި ދޯނިތަކަށް ވަރަށް ބޮޑެތި ގެއްލުން ތަކެއް ވެފައިވާ ކަމަށް ވަހީދު ވިދާޅުވިއެވެ.
މީގެ އިތުރުން ބުރާސްފަތި ދުވަހުގެ ރޭގެ މެންދަމު ވަގުތުގައި ރަންވޭއަށް ވެސް އުދައިގެ އަސަރު ވަރަށް ބޮޑަށް ކޮށްފައިވާ ކަމަށާއި އެއަަރޕޯޓަށް ދާ ހައިވޭއަށް ވެސް އުދައިގެ ސަބަބުން ބޮޑެތި އަސަރު ތަކެއް ކޮށްފައިވާ ކަމަށް ވިދާޅުވިއެވެ.
މި ހުރިހާ ކަމެއް ގާތުން ބަލައި، ރައްޔިތުންނަށް އެހީތެރިވުމަށް މަސައްކަތް ކުރަމުންދާއިރު، ޚާއްސަކޮށް ޒުވާނުންގެ އެއްބާރުލުން މިކަމަށް ލިބެމުން ދާކަން ވަހީދު ފާހަގަ ކުރެއްވިއެވެ. އެގޮތުން ގޭގެއަަށް ފެން ވަނުން ކޮންޓްރޯލް ކުރުމަށް ބަސްތާތައް ޖެހުމަށް ވެސް ގިނަ އަދަދެއްގެ ޒުވާނުންގެ އިތުރުން ރަށުގެ ހުރިހާ ރައްޔިތުން އެކުގައި މަސައްކަތް ކުރަމުން ދާ ކަމަށް ވެސް ވިދާޅުވިއެވެ.
ވަހީދު ވިދާޅުވީ އުދައެރުމާއެކު މިހާރު ކުރަމުންދާ ވިއްސާރައިގެ ސަބަބުން ބަލަންޖެހޭ އެންމެހާ ކަންކަން ބަލަމުން ދިއުމާއެކު ރައްޔިތުންނަށް އެހީވުމުގައި ރައްޔިތުންގެ މަޖިލީހުގެ ހޯރަފުށީ ދާއިރާގެ މެންބަރުގެ އެއްބާރުލުމާ އިރުޝާދު ލިބެމުންދާ ކަމަށެވެ. އަދި މެންބަރު މި ހުރިހާ ކަމެއް ގާތުން ބައްލަވަމުން ދާ ކަމަށެވެ.
ހޯރަފުށީގެ އިތުރުން އެ އަތޮޅު ތުރާކުނަށް ވެސް ވަނީ އުދައަރައި ރަށުގެ އެކި ސަރަހައްދުތަކުގައި ފެންބޮޑުވެފައެވެ. އަދި ރަށުގެ ބަނދަރަށް އުދަ އެރުމާއެކު ގަދަ ވައިގެ ސަބަބުން އޮޑިދޯނި ފަހަރަށް ގެއްލުން ވަމުން ދާ ކަމަށް އެ ރަށު ކައުންސިލްގެ ރައީސް އަލީ އަބްދުއްލަތީފް ވިދާޅުވިއެވެ. މީގެ އިތުރުން ހެލްތް ސެންޓަރުގެ ފުރާޅާއި މިސްކިތަށް ވެސް ބައެއް ކަހަލަ ގެއްލުންތައް ލިބިފައިވާ ކަމަށް ވިދާޅުވިއެވެ.
އަލީ ވިދާޅުވީ އުދައިގެ ސަބަބުން ރާއްޖޭގެ އެންމެ އުތުރުގެ ގޮތުގައި ފާހަގަ ކުރެވޭ ސަރަހައްދު މުޅިން އަޑިއަށް ގޮސްފައިވާ ކަމަށެވެ.
