ރަށު ފެންވަރުގެ ޚިދުމަތަށް ހޯރަފުށީ ދާއިރާގެ ކުރީގެ މެންބަރު ސަލީމް ވަރުގަދަ ރައްދެއް ދެއްވައިފި
އެއަރޕޯޓު ހެދީ ބަލި މީހުންނަށް ފަސޭހަ އަކަށް، ޒުވާނުންނަށް ވަޒީފާގެ ފުރުސަތުތައް ފަހި ކޮށްދިނުމަށް
'ހޯރަފުށި ދުވަސް' ފާހަގަކުރުމުގެ ހާއްސަ ރަސްމީ ޖަލްސާ ގައި ރައްޔިތުން މަޖިލީހުގެ ހޯރަފުށީ ދާއިރާގެ ކުރީގެ އަހުމަދު ސަލީމް ވާހަކަ ދައްކަވަނީ
ރަށު ފެންވަރުގެ ޚިދުމަތް ދިނުމާ ގުޅޭގޮތުން ރައީސް ޑރ.މުހައްމަދު މުއިއްޒު ދެއްކެވި ވާހަކަފުޅު ތަކަށް ރައްޔިތުން މަޖިލީހުގެ ހޯރަފުށީ ދާއިރާގެ ކުރީގެ މެންބަރު އަހުމަދު ސަލީމް ވަރަށް ވަރުގަދަ ރައްދެއް ދެއްވައިފި އެވެ.
ބުރާސްފަތި ދުވަހުގެ ރޭ ހޯރަފުށީގައި ބޭއްވި "ހޯރަފުށީ ދުވަސް" ޖަލްސާގައި ކުރީގެ މެންބަރު ސަލީމް ވިދާޅުވީ އެއަރޕޯޓު ހަދައި ތަރައްގީ ކުރީ ބަލި މީހުންނަށް ފަސޭހަ އަކަށް ކަމަށާއި، ޒުވާނުންނަށް ވަޒީފާގެ ފުރުސަތުތައް ފަހި ކޮށްދިނުމަށް ކަމަށެވެ. އެ ސަރަހައްދުގައި ވިޔަފާރިތައް ފުޅާކޮށް، ރިސޯޓުތައް ތަރައްގީ ކުރަން ބޭނުންވާ ކަމަށް އޭނާ ވިދާޅުވި އެވެ. ނަމަވެސް މިހާރު އެއްވެސް މަސައްކަތެއް ކުރިއަށް ނުދާ ކަމަށާއި، މަގުސަދު ހާސިލް ނުވާ ކަމަށް ސަލީމް ވިދާޅުވި އެވެ.
ރައީސްގެ ހިތްވަރުން އާޒިމްގެ މިންނަތް މަސައްކަތުން މުޅި ސަރުކާރުގެ އެއްބާރުލުމާ އެކު އަޅުގަނޑުމެންނަށް އެކަން އެ އޮތީ ކާމިޔާބު ކުރެވިފައި. އެކަމަކު ލައްކަ މަސައްކަތް އަދި އެބަހުރި ކުރަން. ކޮބައިތޯ އެއަރޕޯޓު ވަށައިގެން އަންނަން ޖެހޭ ތަރައްގީ. ކޮބައތޯ އެއަރޕޯޓު އެ އަރޕޯޓަކަށް ހެދުމަށްޓަކައި ހުޅުވެން ޖެހޭ ރިސޯޓު ތައް. ކޮބައިތޯ އެއާ ގުޅިގެން އަންނަން ޖެހޭ އިތުރު ވިޔަފާރި ތައް. އެކަންއެކަން ކުރަންވީ ވަގުތު މިއަދު އަޅުގަނޑުމެން ގުނަމުން މި ދަނީ. އެއާ އެކީގައި ނޫން ގޮތަކަށް އެއަރޕޯޓުގެ ހަގީގީ ފައިދާއެއް އަޅުގަނޑުމެންނަށް ނުފެންނާނެ އެނގޭތޯ. އެހެންވީމަ އަޅުގަނޑުމެން މި ދަންނަވަނީ ލައްކަ މަސައްކަތް ކުރަން އެބަ އޮތޭ.ރައްޔިތުން މަޖިލީހުގެ ހޯރަފުށީ ދާއިރާގެ ކުރީގެ އަހުމަދު ސަލީމް
ރާއްޖޭގެ ހުރިހާ ރަށެއްގެ ސިއްހީ މަރުކަޒުގެ ލެބޯޓްރީ ގައި، އެ ރަށެއްގެ ފެންވަރު ގައި ހުރިހާ ޓެސްޓު ތަކެއް ހެދޭނެ ކަމަށް ރައީސް މުއިއްޒު ވިދާޅުވެފައިވާތީ އެކަމަށް ރައްދު ދެއްވައި ސަލީމް ވިދާޅުވީ ރައްޔިތުންނަށް ބޭނުންވަނީ ބައިނަލް އަގުވާމީ ޚިދުމަތްތައް ކަމަށެވެ.
ނަމަވެސް މި ސަރުކާރުގައި މިއަދު ވެސް ރައްޔިތުން އަޑު އަހަމުން ދަނީ ރަށު ފެންވަރުގެ ލެބޯޓްރީ ޓެސްޓު ހެދުމާއި، ރަށު ފެންވަރުގެ އިމްތިހާންތައް ބާއްވައި، ރަށުގެ ޚިދުމަތްތައް ދޭ ވާހަކަ ކަމަށް ސަލީމް ވިދާޅުވި އެވެ. އަދި މިގޮތް ރައްޔިތުން ބޭނުން ނުވާ ކަމަށާއި، ރަށުން ޚިދުމަތްތައް ފުޅާވެ ރައްޔިތުން ބޭނުންވާ ޚިދުމަތްތައް ލިބެން ޖެހޭ ކަމަށް އޭނާ ވިދާޅުވި އެވެ.
އަޅުގަނޑުމެންގެ ވަށައިގެން މިހުރި ގައުމުތަކުގައި ދެވޭ ޚިދުމަތް ހޯރަފުށީ ގައި ވެސް ތުރާކުނުގައި ވެސް އުލިގަމުގައި ވެސް ދެވުން އެއީ ރައްޔިތުން އެދޭ ގޮތް. އެ ކަމަށް އަޅުގަނޑުމެން މަސައްކަތް ކުރަން ޖެހޭނީ. ރަށު ފެންވަރުގައި ލެބޯޓްރީ ޓެސްޓެއް ނުހުންނާނެ. ރަށު ފެންވަރުގައި ބަލި މަޑުކަމެއް ވެސް ނުހުންނާނެ. އެހެންވީމަ އަޅުގަނޑު މި ދަންނަވަނީ މިއަދު އަޅުގަނޑުމެންނަށް މަޑު ކުރެވޭކަށް ނެތޭ ހޮސްޕިޓަލް އެދާ ސްޕީޑްގައި ކުރިއަށްދާ ތަން ބަލާކަށް. އެއަށްވުރެ އަތް މަތި އަވަސް ކުރަން ޖެހޭ. އަޅުގަނޑުމެންނަށް މިރަށުގެ ދަރިންނަށް މިރަށުގައި ތިބެ ޚިދުމަތް ލިބޭނެ މަގުތައް އަވަހަށް ތަނަވަސްވާން ޖެހޭ. ބައްލަވާ މިދިޔަ ދެ އަހަރެއްހާ ދުވަހުގެ ތެރޭގައި ކިތައް އާއިލާތޯ މިރަށުން އެ ދިޔައީ. ތަރައްގީ މިނާ އެއް މިންގަނޑަކީ އެރަށެއް އާބާދުވާ ނިސްބަވް ކަމަށް ވަންޏާ އަޅުގަނޑުމެން މިދަނީ ފަހަތަށް. ހަގީގަތް ގަބޫލު ކުރައްވާ. އަޅުގަނޑުމެން މިދަނީ ފަހަތަށް.ރައްޔިތުން މަޖިލީހުގެ ހޯރަފުށީ ދާއިރާގެ ކުރީގެ އަހުމަދު ސަލީމް
ސަލީމް ވިދާޅުވީ އެ ރަށަކުން އާއިލާތައް މާލެ އަށް ހިޖުރަ ކުރުމަކީ ރަށަށް ލިބޭ ވަރަށް ބޮޑު ގެއްލުމެއް ކަމަށެވެ. މި އުސޫލު ބަދަލު ނުކުރެވޭހާ ހިނދެއް ގައި ހަމަޖެހިގެން ތިބެވެން ނެތް ކަމަށާއި، ހާލަތު ބަދަލު ކުރަން ޖެހޭ ކަމަށް އޭނާ ވިދާޅުވި އެވެ.
