"މެންބަރަކު ގުޅުއްވި، ވިދާޅުވީ ރައީސަށް ބައްލަވައްޗޭ"

ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދީފައިވާ ޓެރަރިސްޓް ހަމަލާއާ ގުޅޭ މައުލޫމާތު ޑިފެންސް މިނިސްޓަރ މާރިޔާ އަހުމަދު ދީދީއާ ހިއްސާ ކުރެވުނު ކަމަށް ވަނީ އަޑުފެތުރިފައެވެ. އެގޮތުން އާންމުންގެ މީހަކު އެމްޑީޕީގެ ޕާލިމެންޓްރީ ގްރޫޕްގެ މެންބަރަކަށް އެ މައުލޫމާތު ދިނުމުން ޑިފެންސް މިނިސްޓަރު މާރިޔާ އަހްމަދު ދީދީއަށް އެ މައުލޫމާތު ހިއްސާކޮށްފައިވާ ކަމަށް ބައެއް ނޫސްތަކުންވެސް ވަނީ ރިޕޯޓު ކޮށްފައެވެ.

ރާއްޖެއެމްވީއަށް އެނގިފައިވާ ގޮތުގައި ރައީސް ނަޝީދުގެ ފުރާނަ ދުއްވާލަން ބަޔަކު މަސައްކަތް ކުރާ ކަމަށް އާންމު މީހަކު ދިން މައުލޫމާތެއްގެ މައްޗަށް ބިނާކޮށް މިނިސްޓަރ މާރިޔާއަށް ގުޅުއްވީ ރައްޔިތުންގެ މަޖިލީހާއިި އެ މަޖިލީހުގެ 241 ކޮމިޓީގެ މެންބަރެކެވެ. އޭނާ ވަނީ މިނިސްޓަރަށް ފޯނުން ގުޅުއްވައި 3 މިލިއަން ޑޮލަރަށް ރައީސް ނަޝީދަށް ބަޔަކު ހަމަލާއެއް ދިނުމަށް ރާވަމުންދާ ކަމުގެ މައުލޫމާތު ލިބިފައިވާކަން ހިއްސާ ކުރައްވާފައެވެ. އެކަމާ ގުޅިގެން މިނިސްޓަރ މާރިޔާ ވަނީ ރައީސް ނަޝީދުގެ ސެކިއުރިޓީއާ ގުޅޭ ކަންކަން އެމްއެންޑީއެފުން ބަލަމުންދާނެ ކަމަށް ވިދާޅުވެ އެކަމަކީ ޖިނާއީ ކަމަކަށް ވުމުން މެންބަރުވެސް އެކަން ފުލުހުންނަށް އެންގެވުމަށް ތަކުރާރުކޮށް އެދިވަޑައިގެންފައެވެ.

މި މައުލޫމާތު ކަށަވަރު ކުރުމަށް ރާއްޖެއެމްވީން ގުޅާލުމުން މިނިސްޓަރ މާރިޔާ ވަނީ އެކަން ކަށަވަރު ކޮށްދެއްވާފައެވެ.

މިނިސްޓަރ އިތުރަށް ވިދާޅުވީ، އެ މައުލޫމާތު ލިބިވަޑައިގަތް އިރުވެސް ރައީސް ނަޝީދުގެ ސެކިއުރިޓީ ކަންކަން އޮތީ އެންމެ މަތީ ދަރަޖަކަމަށްވާ "ކްރިޓިކަލް ރިސްކް ލެވެލް" އަށް ޖައްސާފައި ކަމަށެވެ. އަދި އެމަނިކުފާނުގެ ސެކިއުރިޓީ ދަރަޖަ "ހައި ރިސްކް" އިން ކްރިޓިކަލް ރިސްކަަށް ބަދަލުކުރީވެސް މީގެ 2 މަހެއްހާ ދުވަސް ކުރިން ކަމަށް މިނިސްޓަރ ވިދާޅުވިއެވެ.

މާރިޔާ މިހެން ވިދާޅުވެފައިވާއިރު، ރައީސް ނަޝީދުގެ ގެކޮޅު ހުންނަ ނީލޯފަރު ހިނގުމުގައި ގިނަ އަދަދެއްގެ ސައިކަލު ޕާކުކޮށްފައި ހުންނާތީ އެމަނިކުފާނަށް ސެކިއުރިޓީ ފޯރުކޮށްދިނުމަށް ދަތިތަކެއް ހުރުމާއި، އެއީ ނުރައްކަލެއް ކުރިމަތިވެދާނެ ކަމެއްކަމަށް ގަބޫލު ކުރެވިގެން އެ މަގު ހުސްކޮށްދިނުމަށް އެދި އެމްއެންޑީއެފުން ވަނީ ސިޓީ ކައުންސިލުގައިވެސް އެދިފައެވެ.

އިތުބާރު ހުރި މަސްދަރަކުން ރާއްޖެއެމްވީއަށް މައުލޫމާތު ދީފައިވާ ގޮތުން، ރައީސް ނަޝީދުގެ ސަލާމަތީ ކަންކަމާ ގުޅޭގޮތުން މިނިސްޓަރ މާރިޔާ އާއި ޗީފް އޮފް ޑިފެންސް ފޯސް އަދި އިންޓެލިޖެންސްގެ ވެރިޔާވެސް ވަނީ މީގެ ކުރިން ރައީސް ނަޝީދާ ބައްދަލު ކުރައްވައި، އެމަނިކުފާނުގެ ސަލާމަތީ ކަންކަމާ ގުޅޭގޮތުން ލަފާވެސް އަރުވާފައެވެ.

މި ހާދިސާގެ މައުލޫމާތު އާންމު ފަރާތަކުން ކުރިން އެމްއެންޑީއެފަށް ހިއްސާ ކޮށްފައިވާކަމަށް ބައެއް ނޫސްތަކުން ރިޕޯޓު ކޮށްފައިވަނީ މެންބަރުގެ މި ފޯން ކޯލާއި ގުޅުވައިގެން ކަމަށް ބެލެވެއެވެ. ނަމަވެސް ރާއްޖެއެމްވީން އެކަމާ ގުޅޭގޮތުން ސުވާލުކޮށްލުމުން މާރިޔާ ވިދާޅުވީ، މެންބަރު ދެއްކެވީ ސީދާ އެ ހަމަލާގެ ވާހަކައެއް ނޫން ކަމަށާއި، އަދި އެކަމުގެ މައްޗަށް ބިނާކޮށް އެފަދަ ވާހަކައެއް ދެއްކޭނެކަމަށް ގަބޫލުފުޅު ނުކުރައްވާ ކަމަށެވެ. ރައީސް ނަޝީދަށް އެރޭ ދިން ހަމަލާއާ ގުޅޭ އެއްވެސް "ކްރެޑިބަލް، އެކްޝަނަބަލް، އިންޓެލިޖެންސެއް" ލިބިވަޑައިގެންފައި ނުވާކަން ފާހަގަ ކުރައްވައި މިނިސްޓަރ ވިދާޅުވީ، އޭރުވެސް ދިޔައީ ރާއްޖޭގައި ދެވޭ އެންމެ ހައިލެވެލް ސެކިއުރިޓީ އެމަނިކުފާނަށް އަރުވަމުން ކަމަށެވެ.

ޓެރެރިޒަމް ހުއްޓުވުމާއި، މަނާކުރުމުގެ ގާނޫނުގައި ވާގޮތުން، ޓެރަރިޒަމްގެ އަމަލެއް ހިންގަން އުޅޭކަމުގެ އެއްވެސް މައުލޫމާތެއް އެއްވެސް ފަރާތަކަށް ލިބި އެކަން ފުލުހުންނަށް ނޭންގުމަކީ ކުށެއްކަމަށް ވާއިރު، ރާއްޖެއެމްވީއާ ވާހަކަ ދެއްކެވި ގާނޫނީ ބައެއް ބޭފުޅުން ވިދާޅުވީ، މެންބަރަކަށް އެފަދަ މައުލޫމާތެއް ލިބިވަޑައިގަތުމާއެކު، އެކަން ފުލުހުންނަށް ރަސްމީކޮށް ހުށައަޅުއްވަން ވާނެ ކަމަށެވެ. އަދި އެ މެންބަރަކީ މަޖިލީހުގެ 241 ކޮމިޓީގެ މެމްބަރަކަށްވާއިރު، އެކަން ކޮމިޓީއަށް ހުށައަޅުއްވައިގެން، ޑިފެންސް މިނިސްޓަރާއި އެމްއެންޑީއެފްގެ އިސް ބޭފުޅުން ކޮމިޓީއަށް ހާޒިރުކޮށް ސުވާލު ކުރަން ވާނެ ކަމަށްވެސް ބައެއް ގާނޫނީ ބޭފުޅުން ފާހަގަ ކުރެއްވިއެވެ.