ހާލު ސީރިއަސްވެ، ވެންޓިލޭޓަރުގައި ފަސް މީހަކަށް ފަރުވާ ދެނީ

ހާލު ސީރިއަސްވެ، ވެންޓިލޭޓަރުގައި ފަސް މީހަކަށް ފަރުވާ ދެމުންދާ ކަމަށް ހެލްތު އެމަޖެންސެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.

ބުދަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒު ވިދާޅުވީ ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި ހަ މީހަކަށް ފަރުވާ ދެމުންދާ ކަމަށެވެ. އޭގެ ތެރެއިން ތިން މީހަކަށް ފަރުވާ ދެމުންދަނީ ވެންޓިލޭޓަރުގައި ކަމަށް މަބްރޫކް ވިދާޅުވިއެވެ. އަދި ދަރުމަވަންތަ ހޮސްޕިޓަލްގެ 17 ވަނަ ފަންގިފިލާގައި ފަސް މީހަކަށް، 16 ވަނަ ފަންގިިފިލާގައި 6 މީހަކަށް ފަރުވާ ދެމުންދާ ކަމަށް މަބްރޫކް ވިދާޅުވިއެވެ.

ހުޅުމާލެ މެޑިކަލް ފެސިލިޓީއަށް އަލިއަޅުއްވާލައްވަމުން މަބްރޫކް ވިދާޅުވީ އެފެސިލިޓީގައި 222 މީހަކަށް ވޯޑުގައި ފަރުވާ ދެމުންދާ ކަމަށެވެ. މަބްރޫކް ވިދާޅުވީ 8 މީހަކަށް އައިސީޔޫގައި ފަރުވާ ދެމުންދާއިރު، އައިސީޔޫގައި ފަރުވާ ދޭ މީހުންގެ ތެރެއިން ދެ މީހަކު އޮތީ ވެންޓިލޭޓަރުގައި ކަމަށެވެ. އަދި ވިދާޅުވީ ހުޅުމާލޭ މެޑިކަލް ހޮސްޕިޓަލްގައި މިވަގުތު ފަސް މީހަކަށް ފަރުވާ ދެމުންދާ ކަމަށެވެ.

މީގެ އިތުރުން މަބްރޫކް ވިދާޅުވީ އަތޮޅުތެރޭގައި ގާއިމުކޮށްފައިވާ ފެސިލިޓީތަކަށް ބަލާއިރު، އައްޑޫ ސިޓީގައި އެކަކު، ބ. އޭދަފުށީގައި ދެ މީހަކު، ށ. ފުނަދޫގައި ހަތް މީހަކު އަދި ލ. ގަމުގަައި ހަ މީހަކަށް ފަރުވާ ދެމުންދާ ކަމަށެވެ.

މަބްރޫކް ވިދާޅުވީ އައިސޮލޭޝަންގައި މިވަގުތު ޖުމްލަ 305 މީހަކު އައިސޮލޭޝަންގައި އެބަ ތިބި ކަމަށެވެ. އެއީ ވެލިދޫ އައިސޮލޭޝަންގައި 89 މީހުން، ފަރުކޮޅު އައިސޮލޭޝަންގައި 87 މީހުން، ހިޔާ އައިސޮލޭޝަން ފެސިލިޓީގައި 107 މީހުން، އަދި ހޮރައިޒަން އައިސޮލޭޝަން ފެސިލިޓީގައި 22 މީހުން ކަމަށް މަބްރޫކް ވިދާޅުވިއެވެ.

ރާއްޖެއަށް ކުރިމަތިވި ކޮވިޑް-19ގެ ހަތަރުވަނަ ރާޅާއެކު ކޮންމެ ދުވަހަކު ދަނީ ގިނަ ބަޔަކު ބައްޔަށް ޕޮޒިޓިވްވަމުންނެވެ. ހާލަތު ގޯސްވެފައިވާތީ މިހާރު ބަލި ކޮންޓްރޯލް ކުރުމުގެ ގޮތުން ވަނީ ހަރުކަށި ފިޔަވަޅުތަކެއް އަޅާފައެވެ. އަދި ހޮސްޕިޓަލްތަކުގެ އެނދުތައް ފުރިދާނެ ކަމުގެ އިންޒާރު ވެސް ޑޮކްޓަރުން ވަނީ ދީފައެވެ.