ޓެރަރިޒަމްގެ ކުށްތަކާއި ހައްދު ފަހަނައަޅާ ދިއުމުގެ ކުށްކުށަށް ހިތްވަރުދޭ ސިވިލް ސަރވިސްގެ މުވައްޒަފުންނާމެދު ފިޔަވަޅު އަޅާނެކަމަށް ސިވިލް ސަރވިސް ކޮމިޝަނުން އަންގައިފިއެވެ.

ސިވިލް ސަރވިސް ކޮމިޝަންގެ ރައީސް މުހައްމަދު ނާސިހު ސޮއިކުރައްވައި ނެރުއްވާފައިވާ ސަރކިއުލަރއެއްގައި ވަނީ ޓެރަރިޒަމް މަނާކުރުމުގެ ގާނޫނުގައި ބަޔާންކޮށްފައިވާ އެއްވެސް އަމަލެއް ކުރުން ނުވަތަ އެފަދަ ކަމަކަށް ހިތްވަރުދޭ އަމަލެއް ކޮށްފިނަމަ، ދިވެހި ސިވިލް ސަރވިސްގެ ގާނޫނާއި ގަވާއިދާ އެއްގޮތްވާ ގޮތުގެމަތިން މައްސަލަ ބަލައި އިދާރީ ފިޔަވަޅު އަޅާނެކަމަށެވެ. މި ސަރކިއުލަރގައި ބަޔާންކޮށްފައިވާ ކަންކަމުގެ ތެރޭގައި ޓެރަރިޒަމްގެ އަމަލެއް ކުރުމާއި ކުރަން އުޅުމާއި އެފަދަ ކަމެއް ކުރުމުގައި އެހީތެރިވެދިނުމާއި އެއްވެސް ސިފައެއްގައި އެފަދަ އަމަލެއްގައި ބައިވެރިވުން ނުވަތަ ސީދާ ގޮތުންނާ ނުސީދާގޮތުންވިއަސް، ޓެރަރިޒަމްގެ ގާނޫނުން މަނާކުރާކަމަށް ހިތްވަރުދޭ އަމަލެއް ކުރާނަމަ އެމައްސަލައެއް ބެލުން ހިމެނެއެވެ.

މީގެތެރޭގައި މީޑިއާގެ ވަސީލަތްތަކާއި އެނޫންވެސް ވަސީލަތްތައް މުވައްޒަފުން ބޭނުންކުރުމުގައާއި މުޖުތަމައުގައި އުޅޭ އުޅުމުގައިވެސް ޓެރަރިޒަމްގެ އަމަލުތަކަށް ހިތްވަރުދޭ ކަންކަން ހިމެނެއެވެ. ޓެރަރިޒަމްގެ އަމަލުތަކަށް ހިތްވަރުދިނުމުގެ ގޮތުން ބޭނުންކުރާފަދަ ބަސްތައް ބޭނުންކުރުމާއި އެފަދަ ފޮޓޯއާއި ވީޑިއޯ އާއްމުކުރުމާއި ޓެރަރިސްޓް ޖަމާތްތަކަށް ތާއީދުކުރާކަން ދޭހަވާފަދަ އެއްވެސް އަމަލެއް ސިވިލް ސަރވިސް މުވައްޒަފުން ނުހިންގުމަށް ވަނީ އަންގަވާފައެވެ.

ސަރކިއުލަރގައި ހިމެނޭ ކަންކަމަށް ހުރިހާ މުވައްޒަފުންވެސް އަމަލުކުރަމުން ގެންދިއުމާއި، ސަރިކިއުލަރއާ ޚިލާފުވާ ސިވިލް ސަރވިސް މުވައްޒަފުންނާމެދު ސިވިލް ސަރވިސްގެ ގާނޫނާ އެއްގޮތަށް މައްސަލަ ބަލައި އިދާރީ ފިޔަވަޅު އަޅާނެކަމަށް ކޮމިޝަނުން ވަނީ ވިދާޅުވެފައެވެ. ޓެރަރިޒަމަށް ހިތްވަރުދޭ ގޮތަށް އެކި ޕްލެޓްފޯމްގައި ވާހަކަދައްކާ ފަރާތްތައް ހޯދައި އެފަދަ މީހުންނާމެދު، ފިޔަވަޅު އަޅާނެކަމަށް ފުލުހުންވެސް ވަނީ މީގެ ކުރިން ހާމަކޮށްފައެވެ.

ސިވިލް ސަރވިސް ކޮމިޝަނުން ޓެރަރިޒަމަށް ހިތްވަރުދޭ މުވައްޒަފުންނާމެދު ފިޔަވަޅު އަޅާނެކަމަށް ބުނެފައި މިވަނީ، ކުރީގެ ރައީސް އަދި މަޖިލީހުގެ ނަޝީދަށް އަމާޒުކޮށް މިދިޔަ ބުރާސްފަތި ދުވަހުގެރޭ ދިން ނިރުބަވެރި ހަމަލާއާ ގުޅިގެން މިފަދަ އަމަލުތަކެއް ފެނިފައިވާތީ، އެ މީހުން ހޯދައި ފިޔަވަޅު އަޅާނެކަމުގެ އިންޒާރު ފުލުހުން ދީފައިވާ ދަނޑިވަޅެއްގައެވެ. މި މައްސަލަގައި 3 މީހަކު ފުލުހުން ހައްޔަރުކޮށްފައިވާއިރު، އިތުރު ބަޔަކުވެސް މިކަން ހިންގުމުގައި އުޅުނުކަމަށް ބެލެވި "ޕަރސަން އޮފް އިންޓްރެސްޓް"ގެ ގޮތުގައި އިތުރަށް ބަލަމުންދާކަމަށް ފުލުހުން ބުނެއެވެ.

ފިތުރު އީދުގެ ތަހުނިޔާ ފޮނުއްވަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ދެއްވި ޚިތާބުގައިވެސް ވަނީ މިފަދަ މައްސަލަތައް ސީރިއަސް މައްސަލަތަކުގެ ގޮތުގައި ސަރުކާރުން ބަލަމުންދާނެކަމަށް ވިދާޅުވެފައެވެ. އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ނިރުބަވެރި ހަމަލާ ދިން މީހުންނާ ގާނޫނު އަރާ ހަމަ ކުރާނެކަމުގައި ވިދާޅުވިއެވެ.