ރައީސް ނަޝީދަށް ހަމަލާ ދިން މީހުންނާ ގާނޫނު އަރާ ހަމަކުރާނެ – ރައީސް ސާލިހު
ހަމަލާގެ ފަހަތުގައި ތިބި މީހުން އިންސާފުގެ ކުރިމައްޗަށް ގެނެވޭނެ ކަމަށް ވިދާޅުވި
ރައީސް ސާލިހު ވާހަކަފުޅު ދައްކަވަނީ
ކުރީގެ ރައީސް މުޙައްމަދު ނަޝީދަށް އަމާޒުކޮށް ނިރުބަވެރި ހަމަލާ ދިން މީހުންނާއި ގާނޫނު އަރާ ހަމަ ކުރާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ބުދަ ދުވަހުގެ ރޭ ގައުމާ މުޚާތަބު ކުރައްވަމުން ރައީސް ސާލިހު ވިދާޅުވީ، މި މަހުގެ ހަވަނަ ދުވަހުގެ ރޭ އިރާކޮޅު، މާލޭގައި ދިން ޓެރަރިސްޓް ހަމަލާއަކީ ރައްޔިތުންގެ ހިތްތަކަށް ބިރުވެރި ކަމާއި ނުތަނަވަސްކަން ވެރިކުރުވި ހަމަލާއެއް ކަމަށެވެ. އެ ހަމަލާއަކީ އެއްވެސް ވަރަކަށް ބަލައި ގަނެވޭނެ ހަމަލާއެއް ނޫން ކަމަށާއި، އެއީ ކުޑަ ނަމަވެސް އިންސާނިއްޔަތު ކަމެއް ހުރި މީހަކު ކުރާނެ ކަމެއް ނޫން ކަމަށް ވިދާޅުވިއެވެ.
ޓެރަރިސްޓް ހަމަލާގައި ބައިވެރިވި މީހުންގެ ތެރެއިން ތިން މީހުން ގާނޫނުގެ ބާރުގެ ދަށަށް ގެނެވިފައިވާކަން ފާހަގަކުރައްވައި ރައީސް ވިދާޅުވީ، މިނިވަން ތަހުގީގަކަށް ފަހު، އެމީހުން އިންސާފުގެ ކުރިމައްޗަށް ގެނެވޭނެ ކަމަށާއި އެމީހުން އެކުރި އަމަލުތަކަށް ޒިންމާ ކުރެވޭނެ ކަމަށެވެ.
ރައިސް ވިދާޅުވީ މީ ހަމައެކަނި އެތިން މީހުންނާ ހަމައިން ނިމޭނެ ކަމެއް ނޫން ކަމަށެވެ. އޭގެ ފަހަތުގައި ތިބި މީހުން އިންސާފުގެ ކުރިމައްޗަށް ގެނެވޭނެ ކަމަށް ވެސް ވިދާޅުވިއެވެ.
ރައީސް ގެ ޚިތާބުގައި، މާލޭގައި ދިން ޓެރަރިސްޓް ހަމަލާގައި ބޮޑެތި ޒަޚަމްތަކެއް ލިބިވަޑައިގެންނެވި، ރައީސް ނަޝީދަށާއި، ސިފައިންނާއި އާންމުންނަށް އަވަސް ޝިފާއެއް ދެއްވުން އެދި ދުއާ ކުރެއްވިއެވެ.
