އެއްބާރުލުން ލިބިއްޖެނަމަ އިތުރު ފިޔަވަޅުތައް އަޅަން ނުޖެހޭނެ: ޑރ.ޝިހާމް
ފިޔަވަޅުތަކާއި އެއްގޮތަށް އަމަލުކޮށް، ގައިޑްލައިން ތަންފީޒުކޮށްފިނަމަ ބަލި ކޮންޓްރޯލް ކުރެވޭނެ
މަޖީދީ މަގު، ރެމްޑަމް ސާމްޕަލް ނެގުމުގެ ތެރެއިން
ހުރިހާ އެންމެންގެ އެއްބާރުލުން ލިބޭނަމަ ކޮވިޑް-19 ކޮންޓްރޯލް ކުރުމަށް މިހާރު އަޅާފައިވާ ފިޔަވަޅުތަކަށްވުރެ ހަރުކަށި ފިޔަވަޅުތައް އަޅަން ނުޖެހޭނެ ކަމަށް އައިޖީއެމްއެޗްގެ ކިޑްނީ އަދި އެތެރެހަށީގެ ބަލިތަކުގެ ޚާއްސަ ޑރ. އިބްރާހިމް ޝިހާމް ވިދާޅުވެއްޖެއެވެ.
އަންގާރަ ދުވަހުގެ ރޭ ހެލްތް އެމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ޑރ.ޝިހާމް ވިދާޅުވީ ކޮވިޑް-19 ކޮންޓްރޯލް ކުރުމަށް މިހާރު ހަރުކަށި ފިޔަވަޅުތަކެއް އެޅިފައިވާ ކަމަށެވެ. އަދި އިތުރު ފިޔަވަޅުތަކެއް އަޅަން ނުޖެހޭނެ ކަމަށް ގަބޫލުކުރަން ބޭނުންވާ މޭރުމަކުން ޑރ.ޝިހާމް ވާހަކަދެއްކެވިއެވެ.
ޑރ.ޝިހާމް ވިދާޅުވީ މިހާރު އަޅާފައިވާ ފިޔަވަޅުތަކާއި އެއްގޮތަށް އަމަލުކޮށް، ގައިޑްލައިން ތަންފީޒުކޮށްފިނަމަ ބަލި ކޮންޓްރޯލް ކުރެވޭނެ ކަމަށެވެ. އަދި ވިދާޅުވީ މިމަސައްކަތުގައި ބޭނުންވަނީ ރައްޔިތުންގެ ފުރިހަމަ އެއްބާރުލުން ކަމަށެވެ.
އިތުރަށް ތަފްސީލް ކޮށްދެއްވާ ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒު ވިދާޅުވީ ފިޔަވަޅުތައް ހަރުކަށި ކުރުން ގުޅިފައި އޮންނަނީ ކޭސްތައް ޕޮޒިޓިވްވަމުންދާ އަދަދަށް ކަމަށެވެ. މަބްރޫކް ވިދާޅުވީ ފިޔަވަޅުތައް އަޅަމުންދަނީ ހާލަތަށް ރިޔާއަތް ކުރުމަށްފަހު މަޝްވަރާގެ ތެރެއިން ކަމަށެވެ. އަދި ކުރިއަށް އޮތްތަނުގައި ވެސް އިތުރު ފިޔަވަޅުތައް އަޅަމުންދާނީ ކަމާބެހޭ ހުރިހާ ފަރާތްތަކާއި މެދު މަޝްވަރާ ކުރުމަށްފަހު ކަމަށެވެ.
މަބްރޫކް ވިދާޅުވީ ރާއްޖޭގެ ހާލަތު ގޯސްވުމާއި ގުޅިގެން ލޮކްޑައުންއަކަށް ދާން ޖެހިދާނެކަމުގެ ބިރު އޮތުމާއެކު އެކަމަށް ތައްޔާރުވަމުން އަންނަ ކަމަށެވެ. އަދި ކެޕޭސިޓީ އިތުރުކުރުމުގެ މަސައްކަތްތައް ވެސް ކުރަމުންދާކަން މަބްރޫކް ފާހަގަކުރެއްވިއެވެ.
