ބިހުރޯޒުކަމަނާ މިސްކިތުގެ ތެރޭގައި ގޮތްނޭނގޭ އެއްޗެއް އޮވެގެން ސިފައިން ހަރަކާތްތެރި ވެއްޖެ

މާލޭގެ ރަށްދެބައިމަގުގައި ހުންނަ ބިހުރޯޒުކަމަނާ މިސްކިތުގެ ތެރޭގައި ގޮތްނޭނގޭ އެއްޗެއް އޮވެގެން ސަލާމަތީ ބާރުތަކުން ހޯމަދުވަހުގެ ރޭ ހަރަކާތްތެރި ވެއްޖެއެވެ.

މިކަމާ ގުޅިގެން އެމްއެންޑީއެފުން ބުނީ ބިހުރޯޒުކަމަނާ މިސްކިތުގެ ތެރޭގައި ގޮތްނޭނގޭ އެއްޗެއް އޮތްކަމުގެ ރިޕޯޓް ލިބިގެން ފުލުހުންނާއި ގުޅިގެން އެތަނަށް ގޮސް އެމްއެންޑީއެފުން ބަލައި ފާސްކޮށްފައި ވާކަމަށެވެ. މިގޮތަށް ބަލައި ފާސްކުރުމުގައި ނުރައްކާ ޒާތުގެ އެއްވެސް އެއްޗެއް ފެނިފައި ނުވާކަމަށް ވެސް އެމްއެންޑީއެފުން ބުނެއެވެ.

މި ސަރަހައްދުން ގޮވާ ޒާތުގެ އެއްޗެއް ފެނިފައި ނުވި ނަމަވެސް، ސަރަހައްދު ވަނީ ބަންދު ކޮށްފައެވެ. އަދިވެސް ސަލާމަތީ ބާރުތަކުން ގެންދަނީ އެހިސާބުގައި ހަރަކާތްތެރި ވަމުންނެވެ.

ބިހުރޯޒުކަމަނާ މިސްކިތް ހުންނަނީ ރައީސް މުހައްމަދު ނަޝީދު އުޅުއްވާ ގަލޮޅު ކެނެރީގެ ހުންނަ ކޮށީގައެވެ. ޕޯޗުގީޒުންގެ އަތްދަށުން ރާއްޖެ ސަލާމަތް ކުރެއްވި އުތީމު ބޮޑު ތަކުރުފާނުގެ ޒިޔާރަތް ހުންނަނީވެސް އެ މިސްކިތުގެ ހަރިންމަ ތެރޭގައެވެ.

ބިހުރޯޒުކަމަނާ މިސްކިތުގެ ތެރޭގައި ގޮވާ އެއްޗެއް އޮތްކަމުގެ ރިޕޯޓު ލިބިގެން ސަލާމަތީ ބާރުތަކުން ހަރަކާތްތެރި ވެފައިވަނީ ރައީސް މުހައްމަދު ނަޝީދަށް ދިން ހަމަލާއަށްފަހު މާލެ ސަރަހައްދުގެ ސަލާމަތީ ކަންކަން ވަރުގަދަކޮށްފައިވަނިކޮށެވެ.