ނަތީޖާ ލަސްވެފައިވާ ސާމްޕަލްތަކާއެކު 1091 މީހަކު ޕޮޒިޓިވް: މަބްރޫކް
9 މެއި 2021 | އާދީއްތަ 18:56ބެކްލޮގް ވެފައިވާ ސާމްޕަލްތަކާ ނުލައި 760 މީހުން ޕޮޒިޓިވް
މަޖީދީމަގުގައި ކޮވިޑަށް ޓެސްޓު ކުރުމަށް ސާމްޕަލް ނަގަނީ،
ނަތީޖާ ނުލިބި ލަސްވެފައިވާ ސާމްޕަލްތަކާއެކު އާދީއްތަ ދުވަހު 1091 މީހަކު ޕޮޒިޓިވްވެފައިވާ ކަމަށް ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.
އާދީއްތަ ދުވަހުގެ ރޭ ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒު ވިދާޅުވީ މިއަދު ރަޖިސްޓަރީ ކުރެވިފައިވާ ޖުމްލަ ކޭސްތަކުގެ އަދަދަކީ 1091 ކަމަށެވެ. އޭގެ ތެރެއިން މާލެ ސަރަހައްދުން 933، މީހުން ދިރިއުޅޭ ރަށްރަށުން 147، ހިންގަމުންދާ ރިސޯޓުތަކުން 6، ސަފާރީތަކުން 3، ހަދަމުންދާ ރިސޯޓުތަކުން ދެ މީހުން ޕޮޒިޓިވްވެފައިވާ ކަމަށް މަބްރޫކް ވިދާޅުވިއެވެ.
މަބްރޫކް ވިދާޅުވީ 1091 މީހަކު ޕޮޒިޓިވްވެފައިވާ ކަމަށް ރިޕޯޓު ކުރެވިފައިވަނީ ނަތީޖާ ނުލިބި ލަސްވެފައިވާ ސާމްޕަލްތައްވެސް ހިމަނައިގެން ކުރި މަސައްކަތުގެ ތެރެއިން ކަމަށެވެ.
ބެކްލޮގް ވެފައިވާ ސާމްޕަލްތަކާ ނުލައި އާދީއްތަ ދުވަހު ޕޮޒިޓިވްވި ރޭޓަށް އަލިއަޅުއްވާލައްވަމުން މަބްރޫކް ވިދާޅުވީ ކޭސްތަކުގެ އަދަދު އިތުރު ކަމަށެވެ. އެގޮތުން ހޮނިހިރު ދުވަހުގެ 6:00ން އާދިއްތަ ދުވަހުގެ އިރުއޮއްސި 6:00ށް ނެގުނު ސާމްޕަލްގެ ތެރެއިން 760 މީހަކު ޕޮޒިޓިވްވެފައިވާ ކަމަށް މަބްރޫކް ވިދާޅުވިއެވެ.
މީގެ އިތުރުން މަބްރޫކް ވިދާޅުވީ ހޮސްޕިޓަލްގައި ކޮވިޑް-19ށް ފަރުވާ ހޯދަމުންދާ 250 ބަލި މީހުން އެބަ ތިބި ކަމަށެވެ. މީގެ ތެރެއިން މާލެއާއި އަތޮޅުތެރޭގައި ގާއިމް ކުރެވިފައިވާ ފެސިލިޓީތަކުގައި 242 މީހަކަށް ވޯޑުގައި ފަރުވާ ދެމުންދާއިރު، ފަސް މީހަކަށް އައިސީޔޫގައި ފަރުވާ ދެމުންދާ ކަމަށެވެ. ވެންޓިލޭޓަރަށް ނުލި ނަމަވެސް އެފަސް މީހުންގެ ހާލަތު ނާޒުކް ކަމަށް މަބްރޫކް ވިދާޅުވިއެވެ. އަދި ވިދާޅުވީ ވެންޓިލޭޓަރުގައި ފަރުވާ ދެމުންދާ ތިން މީހަކު އެބަތިބި ކަމަށެވެ.
ރާއްޖެއަށް ކުރިމަތިވި ކޮވިޑް-19ގެ ހަތަރުވަނަ ރާޅާއެކު ކޮންމެ ދުވަހަކު ވެސް ގިނަ ބަޔަކު ދަނީ ޕޮޒިޓިވްމުންނެވެ. މާލެސިޓީގެ އިތުރުން އަތޮޅުތެރެއިން ވެސް ކޭސްތައް އިތުރުވަމުންދާއިރު، މިވަގުތު މޮނިޓަރިންގައި 32 ރަށެއް އެބައޮތެވެ.
