ފެބްރުވަރީ 13 ގައި ދީފައިވާ ޑެލިވަރީ ފާސްތައް ފިޔަވާ އެހެން ހުރިހާ ފާސްތައް ބާތިލުކޮށްފިން: ފުލުހުން
ޑެލިވަރީ ކުރުމުގެ ހުއްދަ ކެފޭ ރެސްޓޯރަންޓްތަކަށް މެންދަމު 3:00 އާ ހަމައަށް ލިބިގެންދާނެ
ފުލުހުން އާންމުން ހުއްޓުވާ ސުވާލުކުރަނީ
ފެބުރުވަރީ 13 ގައި ދީފައިވާ ހުރިހާ ފާސްތަކެއް މިހާރުވާނީ ކެންސަލް ކޮށްފައި ކަމަށާއި މިހާރު ބޭނުން ކުރެވޭނީ އޭރު ދީފައި ހުރި ޑެލިވަރީ ފާސްތައް އެކަނި ކަމުގައި ޗީފް ސްޕްރިންޓެންޑެންޓް އޮފް ޕޮލިސް ޢަބްދުﷲ ޝަރީފް ވިދާޅުވެއްޖެއެވެ.
ޗީފް ސްޕްރިންޓެންޑެންޓް އޮފް ޕޮލިސް ޢަބްދުﷲ ޝަރީފް އެހެން ވިދާޅުވީ ހެލްތު އިމަރޖެންސީ އޮޕަރޭޝަން ސެންޓަރުން ދަރުބާރުގޭގައި އާދިއްތަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ. ޢަބްދުﷲ ޝަރީފް އިތުރަށް ވިދާޅުވީ، ޑެލިވަރީ ކުރުމުގެ ހުއްދަ ކެފޭ ރެސްޓޯރަންޓްތަކަށް މެންދަމު 3:00 އާ ހަމައަށް ލިބިގެންދާނެ ކަމަށެވެ. އަދި ފިހާރަތަކުން ޑެލިވަރީ ކުރުމުގެ ހުއްދައަށް ޕޯޓަލް މެދުވެރިކޮށް އެދުމުން ރޭގަނޑު 12:00 އާ ހަމައަށް ޑެލިވަރީ ކުރުމުގެ ހުއްދަ ލިބިގެންދާނެ ކަމަށެވެ. އަދި ގޭހާއި ފެން ޑެލިވަރީ ކުރުމުގެ ހުއްދަވެސް ހަމަޖެހިފައިވާ ވަކި ގަޑިތަކެއް ވަންދެން ލިބިގެންދާނެ ކަމަށާއި ޓެކްސީ ސެންޓަރުތަކަށް ވެސް ވަކި އަދަދަކަށް ހުއްދަ ދީފައިވާނެ ކަމުގައި ވިދާޅުވިއެވެ. ޓެކްސީއަށް އަރާ މީހާ އަކީ ފުލުހުންގެ ޕޯޓަލް މެދުވެރިކޮށް ހުއްދަ ލިބިގެން ޓެކްސީއަށް އަރާ މީހެއްތޯ ބަލައިދިނުމަކީ އެ ޓެކްސީއެއްގެ ޒިންމާއަކަށް ހަދައިދިނުމަށާއި ދަމުނަމާދަށް މިސްކިތަށްދާނަމަ ފައިމަގުގައި ދިއުމަށް ފުލުހުން ވަނީ އިލްތިމާސް ކޮށްފައެވެ.
އޭގެ އިތުރުން، ފެރީގެ ޚިދުމަތާއި ބަސް ދަތުރުތަކުގެ ޚިދުމަތް ވެސް ބަދަލުކޮށްފައިވާ ކަމަށާއި ބަސް ދަތުރުގެ އެންމެ ފަހު ދަތުރު މިހާރު އޮންނާނީ ރޭގަނޑު 9:00 އާ ހަމައަށް ކަަމަށް ޝަރީފް ވިދާޅުވިއެވެ. އެހެންކަމުން އޮފީސްތަކުގެ މަސައްކަތްތަކާއި އެހެނިހެން ކަންކަން ހަމަޖެއްސުމުގައި ވެސް 9:00 އާ ހަމައަށް މަސައްކަތްތައް ނިމޭނެގޮތަށް މަސައްކަތްތައް ބައްޓަން ކުރުމަށް ވަނީ އެދިވަޑައިގެންފައެވެ.
ޕާކުތަކާއި ކުޅިވަރު ކުޅޭ ތަންތަނާއި ޖިމްތައް ވެސް ބަންދުވާނެ ކަމަށާއި، މަގުމައްޗަށް ނިކުމެވޭ ގަޑިތަކުގައި ގިނަ އަދަދެއްގެ މީހުން އެއްތަނަކަށް ޖަމާވާ މަންޒަރު ފެންނަމުންދާ ކަމަށާއި ގިނަ އަދަދަކަށް ކުޑަކުދިން ވެސް މަގުމައްޗަށް ނެރޭ މަންޒަރު ފެންނަ ކަމަށާއި ކުޑަކުދިން މަގުމައްޗަށްނެރެ މީހުން ގިނަވާ ތަންތަނުގައި އެ ކުދިން ނުގެންގުޅުމަށް ބެލެނިވެރިންނަށް އޭނާ ވަނީ އިލްތިމާސް ކުރައްވާފައެވެ. އަދި މާރުކޭޓާއި ބާޒާރުމަތީގައި ވެސް ގައިދުރު ކަމެއްނެތި މާސްކުނާޅައި ބިދޭސީންނާއި ދިވެހިންވެސް އުޅެމުންދާ ކަމަށާއި އެހެންކަމުން އެކަން އެގޮތަށް ނުކުރުމަށް ވެސް ޝަރީފް އިލްތިމާސް ކުރެއްވިއެވެ.
ޝަރީފް އިތުރަށް ވިދާޅުވީ ހެލްތު ޕްރޮޓެކްޝަން އެޖެންސީގެ އެންގުންތައް ތަންފީޒުކުރުމަށްޓަކައި، ފުލުހުންގެ އިދާރީ މަސައްކަތްތައް ވަކިގޮތަކަށް ބަދަލުކޮށްފައިވާ ކަމަށާއި، ހާއްސަކޮށް މާލެ ސަހަރައްދުގައި ވީހާވެސް ގިނަ ފުލުުހުން މަގުމައްޗަށް ނެރެގެން މަސައްކަތް ކުރަމުންދާ ކަމަށެވެ.
