ތިލަފުށީ ކުނިގޮނޑު އޮޔާ ދަނީ!
ތިލަފުށީ ކުނިގޮނޑު އޮޔާދާތީ އޭގެ އަސަރު ކައިރި ރަށްތަކާއި ރިސޯޓުތަކަށް ވެސް ވަނީ ފޯރާފައި
ތިލަފުށި ފަޅު ތެރެއަށް ކުނި އެޅިފައި ވަނިކޮށް
ތިލަފުށީ ކުނިގޮނޑު އޮޔާގޮސް، ސަރަހައްދުގެ މޫދު ކުނިން ތަޣައްޔަރު ވެއްޖެއެވެ.
ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑްގެ ބެލުމުގެ ދަށުގައިވާ ތިލަފުށީ ފަޅުތެރޭގައި ގިނަ އަދަދެއްގެ ކުނި ދައުރުވަމުންދާ ވީޑިއޯއެއް 'ރާއްޖެއެމްވީ' އަށް ވަނީ ލިބިފައެވެ.
މި ވީޑިއޯއަށް ބަލާއިރު، ތިލަފުށީ ފަޅުގެ ފެންމަތީގައި ގިނަ އަދަދެއްގެ ކުނި އޮޔާ ދާ ތަން ފެނެއެވެ. އަދި ފަޅުތެރެ ކުނިން ކިލަނބުވެފައިވާ ކަން ފާހަގަކުރެވެއެވެ. މަންޒަރުދުށް މީހުން މައުލޫމާތު ދޭގޮތުގައި، ކުނިތައް މިހާރު ވަނީ މުޅި ސަރަހައްދަށް ފެތުރިފައެވެ.
ތިލަފުށީ ކުނިގޮނޑު އޮޔާދާތީ، އޭގެ އަސަރު ކައިރި ރަށްތަކާއި ރިސޯޓުތަކަށް ވެސް ވަނީ ފޯރާފައެވެ. އެ ގޮތުން ތިލަފުއްޓާއި ކައިރި ރިސޯޓުތަކާއި ރަށްރަށަށް ގިނަ އަދަދެއްގެ ކުނި ލައްވަމުން ދާކަމަށް މައުލޫމާތު ލިބެއެވެ.
ތިލަފުށީގެ ކުނީގެ މައްސަލަ އާއި ކުނިގޮނޑުން ދުން އެރުމުގެ ޝަކުވާ އަކީ އާންމު ޝަކުވާއެކެވެ. ހަމައެކަނި މާލެއިން ދުވާލެއްގެ މައްޗަށް 500 ޓަނަށްވުރެ ގިނަ އަދަދެއްގެ ކުނި ތިލަފުއްޓަށް ގެންދެއެވެ. މީގެ ތެރެއިން 60 އިންސައްތައަކީ ކާބޯތަކެތީގެ ޒަރީއާއިން އުފެދޭ ކުންޏެވެ.
