ހަމަލާގެ ތަހުގީގު ކުރިއަށްދާ ގޮތާމެދު ހިތްހަމަޖެހޭ - އެމްޑީޕީ
8 މެއި 2021 | ހޮނިހިރު 14:32
އެމްޑީޕީގެ ސްޕޯކްސް ޕާސަން އަދި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ
ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް ހަމަލާދިން މައްސަލާގައި ތަހުގީގު ކުރިއަށްދާ ގޮތާއިމެދު ހިތްހަމަޖެހޭ ކަމަށް މޯލްޑިވިއަން ޑިމޮކްރޮޓިކް ޕާޓީ (އެމްޑީޕީ) އިން ބުނެފައެވެ.
ރާއްޖެއެމްވީއަށް ދެއްވި އިންޓަވިއުއެއްގައި އެމްޑީޕީގެ ސްޕޯކްސް ޕާސަން އަދި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހްމީ ވިދާޅުވީ ޖިނާއީ ތަހުގީގު ކުރާ ފަރާތްތަކުން މައްސަލައިގެ ތަހުގީގު ބާރަށް ކުރަމުން ގެންދާ ކަމަށާއި ޕާޓީއާ އަދި ރައްޔިތުންގެ މަޖިލީހާ ވެސް އެ މައުލޫމާތު ހިއްސާ ކުރައްވަމުން ގެންދަވާ ކަަމަށެވެ. މި މައްސަލައިގެ ތަހުގީގު ހިނގަމުންދާ ގޮތް އެޕާޓީން ގާތުން ބަލާނެ ކަމަށެވެ.
ރައީސް ނަޝީދަށް ދިން ހަމަލާއާ ގުޅިގެން ސޯޝަލް މީޑިއާގައި އެކި ފަރާތްތަކުން ޝުއޫރުތައް ހިއްސާ ކުރަމުންދާއިރު ތަހުގީގަށް ހުރަސް ނޭޅޭ ގޮތަށް އަމަލުތައް ބެހެއްޓެވުމަށް އިމްތިޔާޒް ފަހުމީ ވަނީ އިލްތިމާސް ކުރައްވާފައެވެ. އިމްތިޔާޒް ވިދާޅުވީ މި މައްސަލައިގެ ތަހުގީގު ވީހާވެސް އަަވަހަކަށް ނިންމާ، މި މައްސަލައިގެ ހިމެނޭ މީހުން އިންސާފުގެ ކުރިމައްޗަށް ގެނައުމަކީ އެ ޕާޓީން އެދޭ ގޮތް ކަމަށެވެ.
ރައީސް ނަޝީދަކީ ވެސް ދުނިޔޭގެ އެތައް ބައެއްގެ ލޯބި ލިބިފައިވާ މީހަކަށްވާއިރު ނަޝީދަށް އަމާޒުކޮށް ބުރާސްފަތި ދުވަހުގެރޭ ދިން ނިރުބަވެރި ހަމަލާގެ ޚަބަރުތައް ދުނިޔޭގެ މީޑިއާތަކުން ވަނީ ކަވަރުކޮށްފައެވެ. މި ޚަބަރު އެންމެ ފުރަތަމަ ކަވަރު ކޮށްފައިވަނީ އަލްޖަޒީރާއިންނެވެ. އަލްޖަޒީރާއިން މި ޚަބަރު ގެނެސްދީފައިވަނީ ކުއްލި ޚަބަރެއްގެ ގޮތުގައެވެ. މި ހަމަލާ ކުށްވެރިކޮށް ބައިނަލްއަގުވާމީ މަސްރަހުގައި ގިނަ އަދަދެއްގެ ބަޔަކު ޓުވީޓު ކޮށްފައިވާއިރު، މިހަމަލާ ކުށްވެރިކޮށް އަވައްޓެރި ބައެއް ގައުމުތަކުން ވެސް ވަނީ ނޫސް ބަޔާންތައް ނެރެފައެވެ.
