ތަހުގީގަށް އެންމެ ބޮޑަށް އެހީވެވޭނީ ކައިރިން ހަމަލާ ފެނުނު މީހުންނަށް - ފުލުހުން
ހައްޔަރުކޮށްފައިވަނީ 21 އަހަރުގެ މުޖާޒް އަހުމަދު، މއ. ފޭރުގެ، އާއި ގއ. ކޮނޑޭއަށް އުފަން 32 އަހަރުގެ ތަހުމީން އަހުމަދް
ރައީސް ނަޝީދަށް ހަމަލާދިން ސަރަހައްދުގައި ފުލުހުން ހަރަކާތްތެރިވަނީ
ތަހުގީގަށް އެންމެ ބޮޑު އެހީތެރިކަމެއް ދެވޭނީ ރައީސް މުހައްމަދު ނަޝީދަށް ހަމަލާ އަމާޒުވި ވަގުތު އެ ސަރަހައްދުގައި ތިބި، އަދި މަންޒަރު ގާތުން ފެނުނު މީހުންނަށް ކަމަށް ފުލުހުން ބުނެފިއެވެ.
ބުރާސްފަތި ދުވަހުގެ ރޭ އިރާކޮޅު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާއި ގުޅިގެން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ފުލުހުން ވަނީ އެ މަންޒަރު ފެނުނު މީހުންގެ އެހީތެރިކަމާ އެއްބާރުލުމަށް އެދިފައެވެ. އެވަގުތު އެ ސަރަހައްދުން މައްސަލައާ ގުޅޭ އެއްވެސް ކަމެއް ފާހަގަ ވެފައިވާނަމަ ފުލުހުންނާ ހިއްސާ ކުރުމަށް އެދިފައިވެއެވެ.
ހާދިސާ ހިނގި ވަގުތުގެ ވީޑިއޯއެއް ވެސް ފުލުހުން ވަނީ އާއްމު ކޮށްފައެވެ. މީގެ އިތުރުން ހަމަލާއާ ގުޅިގެން ހޯދަން ބޭނުންވާ މީހެއްގެ ފޮޓޯ ވެސް އާއްމު ކޮށްފައިވާއިރު ފުލުހުން ބުނީ މި މީހާއަކީ ތަހުގީގަށް ބޭނުންވާ ވަރަށް މުހިއްމު މީހެއް ކަމަށާއި އޭނާގެ އެއްވެސް މައުލޫމާތެއް އެއްވެސް ރައްޔިތަކަށް އެނގޭނަމަ ވީހާ ވެސް އަވަހަށް ފުލުހުންނާ ހިއްސާ ކުރުމަށް އެދޭ ކަމަށެވެ.
މި ހަމަލާއާ ގުޅޭ ވީޑިއޯއާއި ފޮޓޯ އޮންލައިންކޮށް ހިއްސާ ކުރެވޭނެކަމަށްވެސް ފުލުހުން ވަނީ ބުނެފައެވެ. ފުލުހުން ވަނީ މި މައުލޫމާތު ހިއްސާ ކުރާ ފަރާތްތަކާއި ހިއްސާކުރާ މައުލޫމާތުގެ ސިއްރުކަން ހިފަހައްޓާނެކަމުގެ ޔަގީންކަން ދީފައެވެ. އަދި ފުލުހުންގެ ހޮޓްލައިން ނަންބަރު 9704000ށް ގުޅައި މައުލޫމާތު ހިއްސާ ކުރެވޭނެ ކަމަށްވެސް ބުނެފައިވެއެވެ.
ހަމަލާއާ ގުޅިގެން ހޮނިހިރު ދުވަހު ދެ މީހަކު ހައްޔަރު ކޮށްފައިވާއިރު ނޫސްވެރިންގެ ބައްދަލުވުމުގައި ފުލުހުން ވަނީ އެ ދެ މީހުންގެ ވަނަވަރު ވެސް އާއްމު ކޮށްފައެވެ. ފުލުހުން ބުނީ ޢެ ދެމީހުންނަކީ ވެސް މި މައްސަލައިގައި ތުހުމަތު ކުރެވޭ މީހުން ކަމަށެވެ. ދެ މީހުންނަކީ ވެސް އެކިއެކި ކުށުގެ ރިކޯޑުތައް އޮންނަ މީހުން ކަމަށް ފުލުހުން ވަނީ ހާމަ ކޮށްފައެވެ.
މައްސަލައާއި ގުޅިގެން ހައްޔަރުކޮށްފައިވަނީ 21 އަހަރުގެ މުޖާޒް އަހުމަދު، މއ. ފޭރުގެ، އާއި ގއ. ކޮނޑޭއަށް އުފަން 32 އަހަރުގެ ތަހުމީން އަހުމަދެވެ. ތަހުމީން އަހުމަދަކީ އައިއީޑީ ހަރުކުރެވިފައިވާ ސައިކަލުގެ ވެރިފަރާތް ކަމަށް ފުލުހުން ބުނެއެވެ. އަދި ތަހުގީގަށް ހައްޔަރުކުރި ދެ މީހުންނަކީ ވެސް ހަރުކަށި ފިކުރާ ގުޅުން ހުރި މީހުން ކަމަށް ފުލުހުން ބުނެއެވެ.
ތަހުގީގު ކުރިއަށް ދާ ގޮތުގެ މައުލޫމާތު ހިއްސާ ކުރަމުން ފުލުހުން ބުނީ މި ހަމަލާގެ ތަހުގީގަށް އޮސްޓްރޭލިއަން ފެޑެރަލް ޕޮލިހުންގެ ޓީމެއް ހޮނިހިރު ދުވަހުގެ 11:00ގައި މައްސަލަ ތަހުގީގު ކުރަމުން ގެންދާ ޓީމާ ގުޅިފައިވާ ކަމަށެވެ. އަދި އިތުރު ޓީމެއް އާދިއްތަ ދުވަހު ގުޅުމަށް ހަމަޖެހިފައިވާ ކަން ވެސް ހާމަ ކޮށްފައިވެއެވެ.
