ފުރަތަމަ ޑޯޒް ޖެހި މީހުންގެ އަދަދު ތިން ލައްކައަށް ވުރެ މައްޗަށް
7 މެއި 2021 | ހުކުރު 18:37އަތޮޅު ތެރެއިން 3.184 މީހަކު ވެކްސިންގެ ދެވަނަ ޑޯޒް ޖަހާފައިވޭ
ވެކްސިން ޖެހުމުގެ ގައުމީ ކެމްޕޭނުގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދެނީ
ރާއްޖެއިން ކޮވިޑް-19 ގެ ފުރަތަމަ ޑޯޒް ޖެހި މީހުންގެ އަދަދު ތިންލައްކައަށް ވުރެ މައްޗަށް އަރައިފިއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އާންމު ކޮށްފައިވާ ފަހުގެ ތަފާސްހިސާބުތަކަށް ބަލާއިރު، ބުރާސްފަތި ދުވަހު 249 މީހަކު ވެކްސިންގެ ފުރަތަމަ ޑޯޒް ޖަހާފައިވެއެވެ. އަދި 3،209 މީހަކު ވެކްސިންގެ ދެވަނަ ޑޯޒް ޖަހާފައިވެއެވެ. އެގޮތުން މާލެ ސަރަހައްދުން 46 މީހަކު ވެކްސިންގެ ފުރަތަމަ ޑޯޒް ޖަހާފައިވާއިރު އަތޮޅުތަކުން 203 މީހުންް ވަނީ ފުރަތަމަ ޑޯޒް ޖަހާފައެވެ. އަދި މާލެ ސަރަހައްދުން 25 މީހަކު ވެކްސިންގެ ދެވަނަ ޑޯޒް ޖަހާފައިވާއިރު އަތޮޅު ތެރެއިން 3.184 މީހަކު ވެކްސިންގެ ދެވަނަ ޑޯޒް ޖަހާފައިވެއެވެ.
މިއާއެކު މިހާތަނަށް ރާއްޖެއިން ވެކްސިންގެ ފުރަތަމަ ޑޯޒް ޖެހި މީހުންގެ އަދަދަކީ 300،438 އެވެ. ދެވަނަ ޑޯޒް ޖެހި މީހުންގެ އަދަދު ވަނީ 126،790ށް އަރާފާއެވެ.
މާލެ ސަރަހައްދުގައި ކޮވިޝީލްޑް ވެކްސިންގެ ދެވަނަ ޑޯޒު ޖެހުން ހުއްޓާލާފައިވާއިރު އެ ވެކްސިންގެ މިވަގުތު ބާކީ ހުރީ 1700 ޑޯޒް ކަމަށް އެޗްޕީއޭއިން ބުނެފައިވެއެވެ.
އެޗްޕީއޭއިން ބުނީ ހަމަ އެއް ފޯމިއުލާއެއްގެ އެސްޓްރަޒެނެކާ ވެކްސިން ވަރަށް އަވަހަށް ލިބޭނެ ކަމަށާއި ކޮވިޝީލްޑް ގެ ފުރަތަމަ ޑޯޒު ޖެހި މީހުންނަށް އެ ވެކްސިން ބޭނުންކުރެވޭނެ ކަމަށެވެ.
