ސީން ހަލާކުނުވަނީސް ބޭރުގެ އެކްސްޕާޓުން ގެންނަން ޖެހޭ: އާޒިމް
7 މެއި 2021 | ހުކުރު 01:06ތަހުގީގަށް މީހުން ހައްޔަރުކުރުމުން އެއީ ސިޔާސީ ކަމަކަށް ނުހެދުމަށް ގޮވާލި
އަލީ އާޒިމް - އެމްޑީޕީގެ ޕީޖީ ލީޑަރު އަދި މެދު ހެންވޭރު ދާއިރާގެ މެންބަރު
ރައީސް ނަޝީދަށް ދިން ހަމަލާގެ މައްސަލަ ބެލުމަށް ބޭރުގެ އެކްސްޕާޓުން ގެނަންނަން ޖެހޭނީ އެ ކްރައިމް ސީން ހަލާކު ނުވަނީސް ވީހާވެސް އަވަހަށް ކަމަށް އެމްޑީޕީގެ ޕީޖީ ގްރޫޕްގެ ލީޑަރު އަލީ އާޒިމް ވިދާޅުވެއްޖެއެވެ.
ރާއްޖެޓީވީ އަށް މައުލޫމާތު ދެއްވަމުން އާޒިމް ވިދާޅުވީ މި މައްސަލައިގެ ތަހުގީގަށް މީހުން ހައްޔަރުކުރުމުން އެއީ ސިޔާސީ ކަމަކަށް ނުހެދުމަށް ގޮވާލާ ކަމަށެވެ. އަދި މި ތަހުގީގު ރަނގަޅަށް ދާ ނަމަ މިހާރު ވެސް ފުލުހުންގެ ބެލުމުގެ ދަށުގައި ތިބެން ޖެހޭ މީހުން އެބަތިބި ކަމަށާއި، އޭގެ ތެރޭގައި ރާއްޖޭގެ ބައެއް ޝޭހުން ވެސް ހިމެނޭ ކަމަށް ވިދާޅުވިއެވެ.
އާޒިމް ވިދާޅުވީ މިކަންކަން މިހިސާބަށް ބޮއްސުންލައިގެން ދަނީ ގާނޫނު ރަނގަޅަށް ތަންފީޒު ނުކުރެވޭތީ ކަމަށެވެ. އަދި ގާނޫނުގައި މައްސަލައެއް ހުރި ނަމަވެސް މަޖިލީހަށް އެންގުމުން ވީ އެންމެ އަވަހަކަށް އެކަމެއް ކޮށްދެއްވާނެ ކަމަށެވެ. އެކަމަކު މިހާރު ވެސް އެފަދަ ބަދަލެއް ގެނެސްފައިވާނެ ކަމަށާއި، އެކަމަކު އަދިވެސް ގާނޫނުތައް ރަނގަޅަށް ތަންފީޒު ނުވާ ކަމަށެވެ.
އެހެންވީމާ މިފަދަ ކަންކަން ހައްލުކުރުމަށް ޒިންމާދާރު މުއައްސަސާތަކުން ހަރުދަނާ މަސައްކަތެއް ކުރަން ޖެހޭ ކަމަށް ވިދާޅުވިއެވެ.
ރައީސް ނަޝީދަށް ދިން ހަމަލާ ވަރަށް ސީރިއަސްކޮށް ނަގާ ކަމަށާއި، އަވަސް ތަހުގީގެއް ކުރިއަށްގެންދާނެ ކަމަށް ހޯމް މިނިސްޓްރީން ބުނެފައިވާއިރު، އެ ހަމަލާ ތަހުގީގުކުރުމަށް އޮސްޓްރޭލިއަން ފެޑެރަލް ޕޮލިސް މި ހޮނިހިރު ދުވަހު ރާއްޖެ އަންނާނެ ކަމަށް ރައީސް މުހައްމަދު ސޯލިހު ވަނީ ވިދާޅުވެފައެވެ.
