ފައިނަލުގައި ޔުނައިޓެޑާއި ވިޔަރެއާލުގެ ކުރިމަތިލުމެއް

ޔުއެފާ ޔޫރޮޕާ ލީގުގެ ފައިނަލުގައި މެންޗެސްޓާ ޔުނައިޓެޑާއި ވިޔަރެއާލް ބައްދަލުކުރަން ޖެހިއްޖެއެވެ.

ފައިނަލުން ޔުނައިޓެޑް ޖާގަ ހޯދީ ސެމީ ފައިނަލުގައި ރޯމާ އަތުން 8-5 ގެ އެގްރިގޭޓް ނަތީޖާއަކުން މޮޅުވެގެންނެވެ. ސެމީގެ ދެވަނަ ލެގުގައި ބުރާސްފަތި ދުވަހުގެރޭ އަމިއްލަ ދަނޑުގައި ރޯމާއިން 3-2 ގެ ނަތީޖާއަކުން ޔުނައިޓެޑް ބަލިކުރި ނަމަވެސް، މިދިޔަ ހަފުތާގައި ޔުނައިޓެޑުގެ ދަނޑުގައި ކުޅުނު ފުރަތަމަ ލެގުން އެ ޓީމު ވަނީ 6-2 ގެ ނަތީޖާއަކުން މޮޅުވެފައެވެ.

ބުރާސްފަތި ދުވަހުގެރޭ ކުޅުނު މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، ފުރަތަމަ ހާފުގައި ޔުނައިޓެޑުން ވަނީ ލީޑު ނަގާފައެވެ. މެޗުގެ 39 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އެޑިންސަން ކަވާނީއެވެ. އެކަމަކު ދެވަނަ ހާފުގެ ކުރީކޮޅު އެޑިން ޒެކޯ އާއި ބްރަޔާން ކްރިސްޓަންޓޭ ވަނީ ދެ ލަނޑު ޖަހައި، ރޯމާ ކޮޅަށް ނަތީޖާ އަނބުރާލާފައެވެ. އޭގެ ފަހުން މެޗުގެ 68 ވަނަ މިނެޓުގައި ކަވާނީ ޔުނައިޓެޑަށް ނަތީޖާ އެއްވަރުކޮށްދިން ނަމަވެސް، މެޗުގެ 83 ވަނަ މިނެޓުގައި އަލެކްސް ޓެލޭސް އަތުން ބައިކޮޅަށް ވަން ލަނޑުން ރޯމާއިން ވަނީ އަލުން ލީޑު ނަގާފައެވެ.

މި ނަތީޖާއާއެކު ފައިނަލުގެ ޖާގައެއް ޔުނައިޓެޑުން ހޯދިއިރު، މިއީ 2018 ވަނަ އަހަރު ޔުނައިޓެޑުގެ ކޯޗުގެ މަގާމާ ހަވާލުވި އޮލެ ގުނަ ސޯލްޝެއާ، އެ ޓީމު ގޮވައިގެން ނުކުންނާނެ ފުރަތަމަ ފައިނަލެވެ.

މީގެ އިތުރުން މި މުބާރާތުގެ ފައިނަލަށް ވިޔަރެއާލް ދަތުރުކުރީ 2-1 ގެ އެގްރިގޭޓް ނަތީޖާއަކުން އާސެނަލް ބަލިކުރުމަށްފަހުއެވެ. މިދިޔަ ހަފުތާގައި ވިޔަރެއާލުގެ ދަނޑުގައި ކުޅުނު ފުރަތަމަ ލެގުން 2-1 ގެ ނަތީޖާއަކުން އާސެނަލް ބަލިވިއިރު، ބުރާސްފަތި ދުވަހުގެރޭ ކުޅުނު ދެވަނަ ލެގުގެ މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

މި ނަތީޖާއާއެކު ފައިނަލުގެ ޖާގައެއް ވިޔަރެއާލުން ހޯދިއިރު، މިއީ ސެވިއްޔާ ގޮވައިގެން ޔޫރޮޕާ ލީގުގެ ޗެމްޕިއަންކަން ތިން ފަހަރު ހޯދާފައިވާ އުނާއި އެމެރީ ޔޫރޮޕާ ލީގުގެ ފައިނަލަށް ގެންދިޔަ ތަފާތު ތިންވަނަ ޓީމެވެ. އެމެރީ ވަނީ 2019 ވަނަ އަހަރުގެ ފައިނަލުގައި އާސެނަލް ގޮވައިގެން ވާދަކޮށް، ޗެލްސީ އަތުން ބަލިވެފައެވެ. އެއަށްފަހު އެމެރީ އާސެނަލުގެ ކޯޗުގެ މަގާމުން ވަކިކުރީ 2019 ވަނަ އަހަރު ފަހުކޮޅުގައެވެ.

ޔޫރޮޕާ ލީގުގެ ފައިނަލުގައި ޔުނައިޓެޑާއި އާސެނަލް ބައްދަލުކުރާއިރު، އެ މެޗު ކުޅޭނީ މި މަހު 26 ވަނަ ދުވަހު ޕޮލެންޑުގެ ގަޑާންސްކްގައެވެ. ޔުނައިޓެޑުން ވަނީ 2017 ވަނަ އަހަރު މި މުބާރާތުގެ ޗެމްޕިއަންކަން ހޯދާފައެވެ.