އެއްޗެއް ގޮއްވާލައިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ހަމަލާ އެންމެ މަތީ ދަރަޖައިން ފުލުހުން ތަހުގީގު ކުރަމުންދާނެ ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
މިނިސްޓަރު އިމްރާން ވިދާޅުވީ ރައްޔިތުން މަޖިލީހުގެ ރައީސް ނަޝީދަށް އަމާޒުކޮށް ބުރާސްފަތި ދުވަހުގެރޭ ދެވުނު ހަމަލާ ހަރުކަށި އިބާރާތުން ކުށްވެރިކުރާ ކަމަށެވެ. މިމައްސަލަ އެންމެ މަތީ ދަރަޖައިގެ އަހައްމިއްޔަތުކަން ދީގެން ދިވެހި ފުލުހުން ތަހުގީގު ކުރާނެކަން ކަށަވަރު ކަމަށް މިނިސްޓަރު އިމްރާން ވިދާޅުވިއެވެ.
މަންޒަރުދުށް ރާއްޖެޓީވީގެ ކެމެރާމަން ކިޔާދިން ގޮތުގައި އެއްޗެއް ގޮވީ 8:39 ގައި އަތަމާ ޕެލެސް ހޮޓެލް ކުރިމަތީ ގައި އޮންނަ ގޯޅިއެއްގެ ތެރޭގައި ރައީސް ނަޝީދު އުޅުއްވާ ގެކޮޅު ކައިރީގައި ޕާކު ކޮށްފައިވާ ސައިކަލެއްގައެވެ.
މިނިސްޓަރު އިމްރާން ވަނީ އެއްޗެއް ގޮވި ސަރަހައްދަށް ވަޑައިގެން އެސަރަހައްދު ބައްލަވާލައްވާފައެވެ. އެސަރަހައްދު ބައްލަވާލައްވައި ރާއްޖެޓީވީއަށް ހޯމް މިނިސްޓަރ އިމްރާން އަބްދުﷲ ދެއްވި ޚާއްސަ އިންޓަވިޔުއެއްގައި ވިދާޅުވީ މި ހާދިސާ ތަހުގީގު ކުރުމުގައި ސިފައިންނާއި ފުލުހުން އަދި ބޭރުގެ ބޭފުޅުން ހަރަކާތްތެރިވަމުންދާ ކަމަށެވެ.
