ޔޫރަޕުގެ ގައުމުތަކުގެ ފުޓްބޯޅަ މުބާރާތް ޔޫރޯ 2020 ކުރިއަށް އޮތް ޖޫން މަހުގެ އެގާރަ ވަނަ ދުވަހު ފަށާނެއެވެ. މުޅިއެކު ސައުވީސް ޓީމު ވާދަކުރާ މި މުބާރާތް ކުރިއަށް ދާނީ ޖޫން އެގާރައިން ޖުލައި އެގާރައަށެވެ. ޖުމްލަ އެގާރަ ސިޓީއެއްގައި މެޗުތައް ކުޅުމަށް ވަނީ ހަމަޖެހިފައެވެ.

މިއަހަރު ބާއްވާ މުބާރާތަކަށްވާއިރު ޔޫރޯ 2020 އޭ ކިޔަނީ ކީއްވެހޭ ބަޔަކު ސުވާލު ކުރުން އެކަށީގެންވެއެވެ. ހަގީގަތުގައި މިއީ ހުސްވި ދެހާސްވިހީގައި ބޭއްވުމަށް ހަމަޖެހުނު މުބާރާތެވެ. ކޮވިޑަކާ ޖެހިގެން އެއް އަހަރަށް ފަސް ކުރެވުނީއެވެ. އެގޮތަށް ފަސް ކުރިއަސް މުބާރާތުގެ ނަމަށް އެއްވެސް ބަދަލެއް ނުގެންނަން ޔޫރަޕުގެ ފުޓްބޯޅައާ ބެހޭ މައި އިދާރާއިން ނިންމީއެވެ. ކޮވިޑާއި ހެދި ފަސްކުރި މުބާރާތް ހަގީގަތުގައި އެންމެ ފަހުން ބާއްވަން މިޖެހުނީވެސް ކޮވިޑުގެ ބިރުވެރިކަމުގެ ތެރޭގައެވެ. މެޗު ކުޅެން ޖެހެނީ ސަޕޯޓަރުން ނުވައްދައި ފަޅު ސްޓޭޑިއަމްތަކެއްގައެވެ.

މި އަހަރުގެ ޔޫރޯއަކީ އެހެން ހުރިހާ ޔޫރޯއަކާ ތަފާތު މުބާރާތަކަށް ވާނެއެވެ. އޭގެ ސަބަބަކީ މުބާރާތް ބާއްވަނީ އެގާރަ ގައުމެއްގައި ކަމަށް ވުމެވެ. މިގޮތަށް މުބާރާތް ބާއްވަނީ ޔުއޭފާއިން ބުނާ ގޮތުން ޔޫރޯއަށް ފަސްދޮޅަސް އަހަރުވުމުގެ މުނާސަބަތުގައި ވީހާވެސް ގިނަ ގައުމަކަށް ޔޫރޯގެ ކޭކުކޮޅެއް ދިނުމުގެ ބޭނުމުގައެވެ.

ޔޫރޯގެ މެޗުތައް މިފަހަރު ކުޅޭނެ އެގާރަ ސިޓީއަކީ އަޒަބައިޖާނުގެ ބާކޫ، ރަޝިޔާގެ ސެއިންޓް ޕީޓަރސްބާގް، ރުމޭނިޔާގެ ބުކަރެސްޓް، ހަންގޭރީގެ ބުޑަޕެސްޓް، ޖާރމަނީގެ މިއުނިކް، ޑެންމާކުގެ ކޯޕަންހޭގަން، ހޮލެންޑުގެ އެމްސްޓެޑަމް، އިޓަލީގެ ރޯމް، ސްޕޭނުގެ ސެވިއްޔާ، ސްކޮޓްލެންޑްގެ ގްލާސްގޯ އަދި އިންގްލެންޑުގެ ލަންޑަނެވެ.

މިހާ ގިނަ ސިޓީތަކުގައި މުބާރާތް ކުޅުނަސް އެއް ސްޓޭޑިއަމުގައި ވަރަށް ގިނަ މެޗު ކުޅޭނެއެވެ. އެއީ ލަންޑަނުގެ ވެމްބްލީ ސްޓޭޑިއަމެވެ. ފައިނަލާއި ސެމީ ފައިނަލްގެ ދެ މެޗުވެސް ހިމެނޭ ގޮތުން ޖުމްލަ 8 މެޗެއް ވެމްބްލީގައި ކުޅޭނެއެވެ. އެހެންވީމާ މުބާރާތް ބާއްވާ ގައުމަކީ އިންގްލެންޑޭ ނުވަތަ މުބާރާތުގެ މައިގަނޑު ސިޓީއަކީ ލަންޑަނޭ ބުނުމަށް ފުރުސަތު އެބައޮތެވެ. 

މުބާރާތް ބެހިގެންވަނީ ހަ ގްރޫޕަކަށެވެ، ކޮންމެ ގްރޫޕެއްގައިވެސް ހިމެނޭނީ ހަތަރު ޓީމެވެ. ގްރޫޕް އޭ ގައި ހިމެނެނީ ތުރުކީ، އިޓަލީ، ސުވިޒަލެންޑް އަދި ވޭލްސްއެވެ. މި ގްރޫޕުގެ މެޗުތައް ކުޅޭނީ ބާކޫ އާއި ރޯމްގައެވެ. ގްރޫޕް ބީ ގައި ހިމެނެނީ ބެލްޖިއަމް ރަޝިޔާ، ޑެންމާކް އަދި ފިންލެންޑެވެ. މި ގްރޫޕުގެ މެޗުތައް ކުރިއަށް ދާނީ ކޯޕަންހޭގަނާއި ސެއިންޓް ޕީޓާސްބާގުގައެވެ.

ގްރޫޕް ސީ ގައި ހިމެނެނީ ހޮލެންޑް، ޔުކްރޭން، އޮސްޓްރިއާ އަދި އުތުރު މެސެޑޯނިއާ އެވެ. މި ގްރޫޕުގެ މެޗުތައް ކުޅޭނީ އެމްސްޓެޑަމާއި ބުކަރެސްޓްގައެވެ. ގްރޫޕް ޑީ ގައި ހިމެނެނީ އިންގްލެންޑް، ކްރޮއޭޝިއާ، ސްކޮޓްލެންޑް އަދި ޗެކް ރިޕަބްލިކެވެ. މި ގްރޫޕުގެ މެޗުތައް ކުރިއަށްދާނީ ލަންޑަނާއި ގްލާސްގޯގައެވެ.

ގްރޫޕް އީ ގައި ހިމެނެނީ ސްޕޭން، ސުވިޑަން، ޕޮލެންޑް އަދި ސްލޮވާކިއާއެވެ. މި ގްރޫޕުގެ މެޗުތައް ކުޅޭނީ ސެވިއްޔާ އާއި ސެއިންޓް ޕިޓާސްބާގުގައެވެ. ގްރޫޕް އެފްއަކީ މަރުގެ ގްރޫޕެވެ. ވާދަވެރިކަން އެންމެ ބޮޑުވާނެ ކަމަށް ބެލެވޭ ގްރޫޕެވެ. މި ގްރޫޕްގައި ހިމެނެނީ ޖާރމަނީ، ފްރާންސް، ޕޯޗުގަލް އަދި ހަންގޭރީއެވެ. މި ގްރޫޕުގެ މެޗުތައް ކުޅޭނީ ބުޑަޕެސްޓާއި މިއުނިކްގައެވެ.

ޔޫރޯގެ މެޗުތައް ރާއްޖޭގެ ގަޑިޔަށް މިފަހަރު ބަރާބަރަށް ފިޓްވެޔޭ ބުނެވިދާނެއެވެ. އެކަމަކު ނިސްބަތުން ތަންކޮޅެއް އަވަސް މެޗުތައް އެބަހުއްޓެވެ. މިސާލަކަށް ވޭލްސް އާއި ސުވިޒަލެންޑް ޖޫން ބާރަ ވަނަ ދުވަހު ކުޅޭ މެޗު ފަށާނީ މާލޭގަޑިން ހަވީރު ހަޔެއް ޖަހާއިރުއެވެ. ރަޝިޔާ އާއި ފިންލެންޑު ޖޫން ސޯޅަ ވަނަ ދުވަހު ކުޅޭ މެޗުވެސް ފަށާނީ މާލޭގަޑިން ހަވީރު ހަޔެއްގައެވެ. ރަޝިޔާގެ ސެއިންޓް ޕިޓާރސްބާގުގައި ކުޅޭ މެޗުތަކާއި އަޒަބައިޖާނުގެ ބާކޫގައި ކުޅޭ މެޗުތަކުގެ ގަޑި ތަންކޮޅެއް އަވަހީއެވެ.

ދެން ގިނަ މެޗުތައް ހުރީ ރޭގަޑު ނުވަޔަކާއި މެންދަމު ބާރައިގައެވެ. މެންދަމު ބާރައިގައި ފަށާ މެޗުތައް ނިމޭނީ ގާތަގަޑަކަށް މެންދަމުން އަނބުރާ ދޭއްގައެވެ. މިފަހަރުގެ ޔޫރޯ ކުރިއަށްދާއިރު ކޮޕާ އެމެރިކާވެސް އެކުއެކީގައި ކުރިއަށް ދާނެއެވެ. ކޮޕާގެ ބައެއް މެޗުތައް ފަށާ ގަޑިޔަކީ މެންދަމުން އަނބުރާ ދޭކެވެ. އެހެންވީމާ ޔޫރޯގެ ބައެއް މެޗުތައް ނިމޭތަނުން ދެން ކޮޕާގެ މެޗުތައް ފަށަން ޖެހޭ ރޭރޭވެސް އަންނާނެއެވެ.