އެމްއެމްޕީއާރްސީ ޚިޔާނާތާއި ގުޅިގެން މަޖިލީހުން ހޯދަން އެދުނު މައުލޫމާތު ލިބިއްޖެ
6 މެއި 2021 | ބުރާސްފަތި 12:26ހުރިހާ އިދާރާއަކުން ވަނީ ސުންގަޑި ހަމަވިއިރު މަޢުލޫމާތުތައް މަޖިލީހާއި ހިއްސާކޮށްފައި
ރައްޔިތުންގެ މަޖިލިސް
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ ޚިޔާނާތާއި ގުޅިގެން މަޖިލީހުން ހޯދަން އެދުނު މައުލޫމާތުތައް ލިބިއްޖެ ކަމަށް ރައްޔިތުންގެ މަޖިލީހުން ބުނެފިއެވެ.
މަޖިލީހުން ބުނީ އެމްއެމްޕީއާރްސީގެ ޚިޔާނާތާއި ވައްކަމުގެ މައްސަލައިގައި ހިމެނޭ ފަރާތްތަކުގެ ޖިނާއީ ތަޙްޤީޤު ގޮސްފައިވާ ހިސާބު އޮޅުން ފިލުވުމަށާއި އެ ތަޙްޤީޤުތައް އެކަށީގެންވާ ގޮތަށް ކުރިއަށް ނުދާ ސަބަބު ސާފުކޮށް ދެއްވުމަށްއެދި ރައްޔިތުންގެ މަޖިލީހުގެ މެންބަރަކު ހުށަހަޅުއްވާފައިވާ މައްސަލައާ ގުޅިގެން މަޢުލޫމާތު ސާފުކުރުމަށް ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ އާއި އެންޓި-ކޮރަޕްޝަން ކޮމިޝަނާއި ޕްރޮސިކިއުޓަރ ޖެނެރަލްގެ އޮފީސް އަދި ދިވެހި ފުލުހުންގެ ޚިދުމަތުގައި އެދުމުން އެ ހުރިހާ އިދާރާއަކުންވެސް ސުންގަޑި ހަމަވިއިރު އެ މަޢުލޫމާތުތައް މަޖިލީހާއި ހިއްސާ ކޮށްފައިވާކަމަށެވެ.
އަދި ވައްކަމާއި ޚިޔާނާތުގެ މައްސަލައިގައި ތުހުމަތުކުރެވޭ ފަރާތްތަކުގެ ލިސްޓު ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓްރިކަވަރީ އިން މަޖިލީހަށް ހިއްސާކޮށްފައިވާކަމަށް ވަނީ ބުނެފައެވެ.
