ޔޫރަޕއަން ޔޫނިއަން (އީޔޫ) އިން ދަނީ އެ އިއްތިހާދުގެ ގައުމުތަކުގެ "ސޭފް ކޮވިޑް-19 ވެކްސިން" ނަމުގައި ކެމްޕެއިނެއް ހިންގަމުންނެވެ. ކާމިޔާބު ކަމާއެކު ހިންގާ މި ކެމްޕެއިންގައި އިޔޫގެ އާބާދީގެ 25 އިންސައްތަ މީހުން މިހާރު ވަނީ ވެކްސިންގެ ފުރަތަމަ ޑޯޒް ފުރިހަމަ ކޮށްފައެވެ.

ޔޫރަޕްގެ ހުރިހާ ރައްޔިތުންްނަށް ވެކްސިން ދިނުމަށް ފެށި ކެމްޕެއިނާ އެކު ވެކްސިން ލިބުުގެ ކަނބޮޑުވުންތައް ވެސް އެ އިއްތިހާދުން ފާހަގަކޮށްފައިވެއެވެ. ވެކްސިން އުފައްދާ ކުންފުނިތަކާއެކު އެއްބަސްވުންތައް ހަދާ ޔޫރަޕަށް ވެކްސިން ހޯދުމުގެ މަސައްކަތް އެ އިއްތިހާދުން ފެށިއެވެ.

އީޔޫގެ އާބާދީގެ 25 އިންސައްތަ މީހުންނަށް ވެކްސިންގެ ފުރަތަމަ ޑޯޒް ދެވުން މިއީ އެ އިއްތިހާދުން ފެށި ވެކްސިނޭޝަން ޕްރޮގްރާމް ފުޅާކުރުމުގެ ނަތީޖާއެވެ. މިއީ އީޔޫ ގައުމުތަކަށް ކޮވިޑް-19ގެ ތިންވަނަ ރާޅެއް އައިސްދާނެ ކަމުގެ ބިރު ހީވުމާ ގުޅިގެން އެ ގައުމްތަކުން އެޅި ފިޔަވަޅެކެވެ.

2021 ވަނަ އަހަރުގެ ފުރަތަމަ ކުއާރޓަރގައި 90 މިލިއަން ވެކްސިން, އީޔޫގެ ގައުމުތަކަށް ފޯރުކޮށްދޭނެ ކަމަށް އެސްޓްރަޒެނެކާ އިން ކުރިން ވަނީ ބުނެފައެވެ. އެހެންނަމަވެސް އަދި ފޯރުކޮށްދީފައިވަނީ އޭގެ 30 އިންސައްތައެވެ.

އީޔޫގެ ގައުމުތަކަށް ވެކްސިން ފޯރުކޮށްދިނުމުގައި ލަސްކަމެއް ކުރިމަތިވި ނަމަވެސް، އެސްޓްރަޒެނެކާއިން އަންނަނީ އީޔޫގެ ޕްރޮޑަކްޝަން ފެސިލިޓީ ތަކުގައި އުފައްދާ ވެކްސިންގެ ބައެއް، އިނގިރޭސިވިލާތަށް ވެސް ފޯރުކޮށްދެމުންނެވެ. އެހެންނަމަވެސް، އިނގިރޭސިވިލާތުގެ ޕްރޮޑަކްޝަން ފެސިލިޓީ ތަކުގައި އުފައްދާ ވެކްސިން އީޔޫގެ ގައުމުތަކަށް ފޯރުކޮށް ނުދޭ ކަމަށްބުނެ އެ ގައުމުތަކުން ވަނީ ނުރުހުން ފާޅުކޮށްފައެވެ.

އީޔޫން ވަނީ އެމެރިކާގެ ފާމަސޫޓިކަލް ކުންފުނި މޮޑާނާ އިން ކޮވިޑް-19 އަށް އުފެއްދި ވެކްސިނަށް ހުއްދަ ދީފައެވެ. ބުދަ ދުވަހު އީޔޫ އިން މޮޑާނާގެ ވެކްސިނަށް ހުއްދަ ދިނުމާ އެކު އެ އިއްތިހާދުގެ 27 ގައުމަށް ކޮވިޑް-19 ގެ ދެ ވަނަ ވެކްސިނެއް ބޭނުންކުރުމުގެ ފުރުސަތު ވަނީ ލިބިފައެވެ.

އެގޮތުން ކޮންޑިޝަނަލް މާކެޓިން އޮތޮރައިޒޭޝަންގެ ދަށުން މޮޑާނާގެ ވެކްސިނަށް އީޔޫ އިން ހުއްދަ ދީފައިވާ އިރު، ދެ ވަނަ ވެކްސިނަކަށް ހުއްދަ ދެވިގެން މި ދިޔައީ ވިލާތުގެ ގިނަ ގައުމުތަކެއްގައި ކޮވިޑް-19 ގެ ކޭސްތައް ބޮޑުތަނުން އިތުރުވަމުންދާ ދަނޑިވަޅެއްގައެވެ.

ޔޫރަޕިއަން ކޮމިޝަންގެ ރައީސް އުރްސެލާ ވޮން ޑަރ ލެޔެން ވަނީ މޮޑާނާގެ ވެކްސިނަށް ހުއްދަ ދެވިގެން ދިއުމާ އެކު އީޔޫގެ ގައުމުތަކަށް ވެކްސިންގެ އިތުރު 160 މިލިއަން ޑޯޒް ލިބިގެންދާނެ ކަމަށް ވިދާޅުވެފައެވެ. އަދި ކުރިއަށް އޮތްތާގައި އިތުރު ވެކްސިންތައް ލިބިގެންދާނެ ކަމަށް ވެސް ވިދާޅުވިއެވެ. މިހާރު ހުއްދަ ދީފައިވަނި ފައިޒަރ، އެސްޓްރަޒެނެކާ، މޮޑާނާ އަދި ޖޯންސަންސް އެންޑް ޖޯންސަންސް ވެކްސިނަށެވެ. އިތުރު ދެ ވެކްސިނެއްގެ ހުއްދަ ހޯދުމަށް އެ އިއްތިހާދުން އަންނަނީ މަސައްކަތް ކުރަމުންނެވެ.

އީޔޫ އިން މިހާރު މޮޑާނާގެ ވެކްސިންގެ 80 މިލިއަން ޑޯޒަށް އޯޑަރު ކޮށްފައިވާ އިރު، އިތުރު 80 މިލިއަން ޑޯޒަށް އޯޑަރު ކުރުމުގެ ފުރުސަތު އެ އިއްތިހާދަށް ލިބޭނެއެވެ.

އީޔޫ އިން އެންމެ ފުރަތަމަ ހުއްދަދިން ވެކްސިނަކަށް ފައިޒަރ އަދި ބައޯއެންޓެކް އިން އުފައްދާފައިވާ ވެކްސިންވެފައިވާއިރު، އީޔޫ އިން ވަނީ މި ވެކްސިންގެ 300 މިލިއަން ޑޯޒް ގަތުމަށް އެއްބަސްވުމަކަށް ގޮސްފައެވެ. އެގޮތުން މިހާރު ވެސް އެ ވެކްސިންގެ 200 މިލިއަން ޑޯޒް އޯޑަރު ކޮށްފައިވާއިރު، ބާކީ ހުރި 100 މިލިއަން ޑޯޒް ގަތުމާއި ނުގަތުމުގެ ބާރު އީޔޫ އަށް ވަނީ ދީފައެވެ.

އީޔޫގެ ގައުމުތަކަށް މިހާތަނަށް 192.7 މިލިއަން ޑޯޒްގެ ވެކްސިން ފޯރުކޮށްދީފައިވެއެވެ. މިއާއެކު 155 މިލިއަން މީހުން މިހާރު ވަނީ ފުރަތަމަ ޑޯޒް ފުރިހަމަ ކޮށްފައެވެ.