އެމެރިކާއިން އެކްސްޕޯޓްކުރާ މުދަލުން އީޔޫގެ ގައުމުތަކުން ހުކުރު ދުވަހުން ފެށިގެން ޓެރިފެއް ނަގަނީ

އެމެރިކާގެ ކިބައިން ބަދަލުހިފުމަށް އެ ގައުމުން އެކްސްޕޯޓްކުރާ މުދަލުގެ ބާވަތްތަކުން ނަގަން ފަށާ ޓެރިފް ހުކުރު ދުވަހުން ފެށިގެން ނެގުމަށް ނިންމާފައިވާ ކަމަށް ވިލާތުގެ އިއްތިހާދުގެ އޮފިޝަލަކު ވިދާޅުވެއްޖެއެވެ.

މި ފިޔަވަޅު އަޅަން ނިންމީ ވިލާތުގެ އިއްތިހާދުގެ ގައުމުތަކުން އެމެރިކާއަށް އެތެރެކުރާ އެލުމިނިއަމާއި އެކަތައިގެ ބާވަތްތަކުން ޑިއުޓީއެއް ނެންގެވުމަށް ރައީސް ޑޮނަލްޑް ޓްރަމްޕް މި މަހުގެ ކުރީކޮޅު ނިންމެވުމާއި ގުޅިގެންނެވެ.

ވިލާތުގެ އިއްތިހާދުގެ ޓްރޭޑް ކޮމިޝަނަރ ސެސިލިއާ މެލްމްސްޓްރޯމް ވިދާޅުވީ އެމެރިކާއިން އެކްސްޕޯޓްކުރާ ބާވަތްތަކުގެ ތެރެއިން ބްލޫ ޖިންސާއި، ސައިކަލާއި، އަދި ރަލުގެ ބާވަތަކުންވެސް ޓެރިފް ނެގުމަށް ވިލާތުގެ އިއްތިހާދުން އަމާޒުހިފާފައިވާކަމަށެވެ.

އެކަމަނާ ވިދާޅުވީ އެކަމަކީ އެގޮތަށް ކުރަން ބޭނުންވާ ކަމެއް ނޫންކަމަށެވެ.

އޭނާ ވިދާޅުވީ ޔޫރަޕްގެ ގައުމުތަކުން އެމެރިކާއަށް އެކްސްޕޯޓްކުރާ އެކަތައާއި އެލުމިނިއަމުން އެެއްވެސް ހަމައެއް ނެތި އެމެރިކާއިން އަމިއްލަ އަމިއްލައަށް ޓެރިފެއްނަގަން ނިންމުމުން އެ ޖަމާއަތަށް އިތުރުގޮތެއް ނެތުނީކަމަށެވެ.

ކެނެޑާ އާއި މެކްސިކޯ އާއި އެނޫންވެސް އެމެރިކާގެ ގާތް ބައެއް ގައުމުތަކުން އެމެރިކާއަށް އެތެރެކުރާ އެކަތައިގެ ބާވަތްތަކުން %25 އަދި އެލުމިނިއަމްގެ ބާވަތްތަކުން %10 ގެ ޓެރިފެއް ނެގުމަށް އެމެރިކާގެ ރައީސް މާޗް މަހު ހުށަހެޅުއްވުމާ އެކު ބްްރަސަލްސްއިން ވަނީ ލިސްޓެއް އެކުލަވާލާފައެވެ.

އެމެރިކަގެ އުފެއްދުންތަކުގެ ތެރެއިން ދެން ޔޫރަޕުން އަމާޒުކުރާނެ އުފެއްދުންތަކުގެ ތެރޭގައި ކްރޭންބެރީސްއާއި،އޮރެންޖް ޖޫހާއި،ޒުވާރިއާއި ޕީނަޓް ބަޓަރ ހިިމެނެއެވެ.

ޔޫރަޕްގެ މި ފިޔަވަޅުތައް އައިސްފައި މިވަނީ އެމެރިކާާއާއި އެގަމުގެ ވިޔަފާރީގެ ބައިވެރިންނާއިމެދު އުފެދިފައިވާ ވިޔަފާރީގެ ހަނގުރާމަ ފުޅާވަމުންދާ ދަނޑިވަޅެއްގައެވެ.

އަންގާރަ ދުވަހު ވެސް ރައީސް ޑޮނަލްޑް ޓްރަމްޕް ވަނީ ޗައިނާއިން އެމެރިކާއަށް އެތެރެކުރާ މުދަލުން އަނެއްކާ ވެސް އިތުރު 200 ބިލިއަން ޑޮލަރުގެ ޓެރިފެއް ތައާރަފްކުރަން ޖެހިދާނެ ކަމަށް އިންޒާރުކުރައްވާފައެވެ.

އެމެރިކާއިން އެކްސްޕޯޓްކުރާ ބާވަތްތަކުން ޓެކްސްތައް ތައާރަފްކުރަން ގައުމުތަކުން ފަށާފައިވަނީ ގައުމީ ސަލާމަތަށް ކަމަށް ވިދާޅުވެ އެހެން ގައުމުތަކުން އެމެރިކާއަށް އެތެރެކުރާ އެކަތައާއި ދަގަނޑުގެ ބާވަތްތަކުން ޓެރިފެއް ނަގަން ނިންމާފައިވާކަމަށް ރައީސް ޓްރަމްޕް މާޗް މަހު އިއުލާނުކުރެއްވުމާއިއެކުއެވެ.

ޓްރަމްޕްވަނީ ޗައިނާގެ ސަބަބުން ދުނިޔޭގައި އެލުމިނިއަމްގެ ސަޕްލައި ބޮޑުވެ އެމެރިކާގައި އެކަތަ އާއި އެލުމިނިއަމް އުފައްދާ ފަރާތްތަކަށް ބިރަކަށް ވެފައިވާކަމަށް ވިދާޅުވެފައެވެ.

އެ އިއުލާނާ އެކު ދެކުނު ކޮރެއާ،އާޖެންޓީނާ،އޮސްޓްރޭލިއާ އަދި ބްރެޒިލްއިން ވަނީ ޓެރިފެއް ނެގުމުގެ ބަދަލުގައި އެ ގައުމުތަކުން އެމެރިކާއަށް އެކްސްޕޯޓްކުރާ މިންވަރު ވަކިވަރެއްގައި ހިފެހެއްޓުމަށް އެއްބަސްވެފައެވެ.

ކެނެޑާއިންވަނީ އެމެރިކާގެ ކިބައިން ބަދަލުހިފުމުގެ ގޮތުން ޖުލައި މަހުގެ 1 ވަނަ ދުވަހުން ފެށިގެން އެމެރިކާއިން އެ ގައުމަށް އެތެރެކުރާ މުދަލުން 16.5 ބިލިއަން ކެނޭޑިއަން ޑޮލަރުގެ ޓެރިފެއް ނަގަންވަނީ ނިންމާފައެވެ.

އަދި މެކްސިކޯއިންވަނީ އެމެރިކާއިން އެ ގައުމަށް އެތެރެކުރާ އެކަތައާއި އޫރުމަހާއި ރަލުގެ ބާވަތްތަކުން 3 ބިލިއަން އެމެރިކާ ޑޮލަރުގެ ޓެރިފެއް ނަގާނެކަމަށް އިއުލާނުކޮށްފައެވެ.

މީގެ އިތުރުން އެމެރިކާއިން އަޅަން ފެށި ފިޔަވަޅުތަކާ ގުޅިގެން އިންޑިއާ އާއި ނޯވޭފަދަ ގައުމުތަކުން ވަނީ ވަރލްޑް ޓްރޭޑް އޯގަނައިޒޭޝަންގައި މައްސަލަ ޖައްސާފައެވެ.