ރިސޯޓުތަކާއި ރާއްޖޭގެ ހުރިހާ ރަށެއް ހިމެނޭހެން އެކްޓިވް ކޭސްތައް 72 ރަށެއްގައި
5 މެއި 2021 | ބުދަ 07:51އަންގާރަ ދުވަހު 601 މީހުން ވަނީ ބައްޔަށް ޕޮޒިޓިވްވެފައި
އަތޮޅުތެރޭގެ 27 ރަށެއް މިހާރު ވެސް ވަނީ މޮނިޓަރިންގެ ހާލަތުގައި
ކޮވިޑް-19ގެ އެކްޓިވް ކޭސްތައް 6،000ން މައްޗަށް އަރާފައިވާ އިރު ރިސޯޓުތަކާއި، ސިނާއީ ރަށްރަށާއި، ރާއްޖޭގެ ހުރިހާ ރަށެއް ހިމެނޭހެން މިވަގުތު އެކްޓިވް ކޭސްތައް ޖުމްލަ 72 ރަށެއްގައި ވާކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)ގެ އެންމެ ފަހުގެ ތަފާސްހިސާބުތައް ދައްކައިފިއެވެ.
އަންގާރަ ދުވަހު ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް މިކަން ހާމަ ކުރައްވާފައިވާއިރު އެކްޓިވް ކޭސްތަކުގެ އަދަދު ވަނީ 6،508ށް އަރާފައެވެ. މުޅި ރާއްޖެއިން ދުވާލަކަށް ޕޮޒިޓިވްވާ މީހުންގެ އަދަދު 600ށް މައްޗަށް ގޮސްފައިވާއިރު އަންގާރަ ދުވަހު 601 މީހުން ވަނީ ބައްޔަށް ޕޮޒިޓިވްވެފައެވެ.
ރާއްޖޭގެ އެކި ކަންކޮޅުތަކުގައި ކޮވިޑް-19 ހަލުވިކަމާއެކު ފެތުރެމުން އަންނަ އިރު އަތޮޅުތެރޭގެ އެކި ރަށްރަށުން ވެސް ޕޮޒިޓިވް ކޭސްތައް ދަނީ ފެންނަމުންނެވެ. އެޗްޕީއޭގެ އެންމެ ފަހުގެ ތަފާސްހިސާބުތައް ދައްކާ ގޮތުން މާލެ ސަރަހައްދުން 440 މީހުން ޕޮޒިޓިވްވެފައިވާއިރު އަތޮޅުތެރޭގެ އެކި ރަށްރަށުން 141 މީހުން، ރިސޯޓްތަކުން 19 މީހުން ސިނާއީ ރަށްތަކުން 11 މީހުން ވަނީ ޕޮޒިޓިވް ވެފައެވެ.
ކޮވިޑާ ދެކޮޅަށް މުޅި ރާއްޖޭގައި އެކިއެކި ފިޔަވަޅު އަޅަމުން އަންނައިރު އަތޮޅުތެރޭގެ ރަށްރަށުގައި ބަލި ފެތުރުން ކޮންޓްރޯލު ކުރުމަށް ޕޮޒިޓިވް ކޭސްތައް ފެންނަ ރަށްރަށް ދަނީ މޮނިޓަރިންއަށް ލަމުންނެވެ. އެގޮތުން އަތޮޅުތެރޭގެ 27 ރަށެއް މިހާރު ވެސް ވަނީ މޮނިޓަރިންގެ ހާލަތުގައެވެ. އެ ހާލަތުގައި ރަށުގައި އެ ވަގުތަކު ތިބި އެއްވެސް މީހަކު އެޗްޕީއޭއިން ވަކިގޮތެއް އަންގަންދެން ރަށުން ފޭބުމާއި، ހުއްދަނެތި އެއްވެސް މީހަކު ރަށަށް އެރުން މަނާ ވާނެއެވެ.
މީގެ އިތުރުން މާލެ ސަރަހައްދުގައި ވެސް ފިޔަވަޅުތައް ވަރުގަދަ ކޮށްފައިވާއިރު ވަކި ގަޑިތަކުގައި ކަރފިއު ހިންގުމާއެކު ސްކޫލުތަކާ ސަރުކާރުގެ އޮފީސްތައް ވެސް ވަނީ ބަންދު ކޮށްފައެވެ. މިކަމާ ގުޅިގެން މަބްރޫކް ވިދާޅުވީ މި ފިޔަވަޅުތަކާއެކު ފުލުހުން ހަރަކާތްތެރިވާ މިންވަރު އިތުރުވާނެ ކަމަށެވެ. އަދި ގާތުން ހުރިހާ ކަމެއް ވެސް މޮނިޓަރ ކުރެވިގެން ދާނެ ކަމަށާއި ފިޔަވަޅުތައް ތަންފީޒު ކުރެވެމުން ދޭތޯ ބައްލަވާނެ ކަަމަށެވެ.
