ފިިޝަރީޒް މިނިސްޓަރު ކަމަށް ޑރ ހުސައިން އައްޔަން ކުރައްވައިފި
5 މެއި 2021 | ބުދަ 06:34ޑރ ހުސައިނަކީ މަސްވެރިކަމާބެހޭ ދާއިރާއަކުން މަތީ ތައުލީމު ހާސިމް ކުރައްވާފައިވާ ބޭފުޅެއް
ޑރ ހުސެއިން ރަޝީދު ހަސަން - މިއަދާ ހަމައަށް ހުންނެވީ އެންވައިރުންމަންޓް މިނިސްޓަރުކަމުގެ މަގާމުގައި
މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގަރިކަލްޗަރ ގެ މަގާމަށް ޑރ ހުސައިން ރަޝީދު ހަސަން މިއަދު އައްޔަން ކުރައްވައިފިއެވެ.
ފިޝަރީޒް މިނިސްޓަރު ކަމާ ހަވާލުވެވަޑައިގަތުމުގެ ކުރިން ޑރ ހުސައިން ހުންނެވީ އެންވައިރުންމެންޓް މިނިސްޓަރު ކަމުގެ މަގާމުގައެވެ. ޑރ ހުސައިނަކީ މީގެ ކުރިންވެސް އެ މިނިސްޓްރީގެ ސްޓޭޓް މިނިސްޓަރުކަން ކުރައްވާފައިވާ ބޭފުޅެކެވެ. އެއީ ރައީސް ނަޝީދުގެ ދައުރުގައެވެ.
ޑރ ހުސައިން ރަޝީދު ހަސަން ފިޝަރީޒް މިނިސްޓަރަކަށް އައްޔަން މި ކުރެވުނީ ކުރިން އެމަގާމުގައި ހުންނެވި ޒަހާ ވަހީދު "އިސްތިއުފާ" ދެއްވުމުންނެވެ. ރައީސް އޮފީހުން ބުނެފައިވަނީ ޒަހާގެ އިސްތިއުފާގެ ސިޓީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަށް ލިބިވަޑައިގަތުމާ ގުޅިގެން ރައީސުލްޖުމްހޫރިއްޔާ ވަނީ "ވަޒީރުކަމުގެ މަގާމުގައި ހުންނަވައިގެން ޒަހާ ވަހީދު ކޮށްދެއްވި އިޚްލާސްތެރި ޚިދުމަތްތަކަށް" ޝުކުރުއަދާކުރައްވާފައި ކަމަށެވެ.
ޒަހާ "އިސްތިއުފާ" ދެއްވީ ކެބިނެޓާއި ސިޔާސަތުތަކަށް ބަދަލު ގެނެސް ސަރުކާރު ހިންގުން ހަރުދަނާކުރުމުގެ ވިސްނެވުންތަކެއް ރައީސް ގެންގުޅުއްވާ ކަން ރައީސް އޮފީހުން އިއުލާންކޮށްފައި ވަނިކޮށެވެ. ބޭނުމަކީ ރައީސް ވެވަޑައިގެންފައިވާ ވައުދުތައް އަވަހަށް ފުއްދަވައި ރައްޔިތުން އެދޭ ފަދަ ނަތީޖާއެއް ނެރެދެއްވުމެވެ.
މަސްވެރިންގެ ޝަކުވާތައް ބޮޑުއިރު، މައްސަލަތައް ހައްލު ނުކުރެވުމުގައި ޒަހާގެ އިހުމާލު ދައްކައި ރައްޔިތުންގެ މަޖިލީހުގެ ބައެއް މެމްބަރުން ވެސް ވަރަށް ބޮޑަށް ފާޑުކިއުން އަމާޒުކުރެއްވިއެވެ.
މި ތުހުމަތުތަކަށް ޖަވާބުދާރީވެވަޑައިގަންނަވާ ކޮންމެ ފަހަރަކު ޒަހާ ވިދާޅުވަމުން ގެންދަވަނީ ހަވާލުކުރައްވާފައިވާ މަސައްކަތްތައް ބަރާބަރަށް ތަންފީޒުކުރައްވާ ކަމަށެވެ. މައްސަލަތަކުގައި ހައްލު ހޯދައި އެ ދާއިރާ އިން އެދެވޭ ނަތީޖާތަކެއް ވެސް ނެރެވިފައިވާ ކަމަށް އޭނާ ވިދާޅުވެއެވެ.
