ޑްރައިވިން ލައިސަންސް ދިނުން ވަގުތީ ގޮތުން މެދުކަނޑާލައިފި
5 މެއި 2021 | ބުދަ 06:29މީގެ ކުރިން ވެސް ވަނީ ކޮވިޑްގެ ކޭސްތައް ގިނަވުމުން މިގޮތަށް ޚިދުމަތް ހުއްޓާލައިފައި
އަލަށް ލައިސަންސް ދޫކުރުން ހުއްޓާލާފައި، އެހެނިހެން ޚިދުމަތްތައް އޮންލައިންކޮށް ލިބޭނެ
އެއްގަމު އުޅަނދު ދުއްވުމުގެ ލައިސަންސް ދިނުން ވަގުތީ ގޮތުން މެދުކަނޑާލައިފިއެވެ،
ޓްރާންސްޕޯޓް މިނިސްޓްރީން ބުނީ، ކޮވިޑް-19ގެ ހާލަތު މާލެ ސަރަހައްދުގައި އިތުރަށް ގޯސްވަމުން އަންނާތީވެ، އެއްގަމުގައި ދުއްވާ އިންޖީނުލީ އުޅަނދުތަކުގެ ޑްރައިވިން ލައިސަންސަށް އަލަށް އެދޭ ފަރާތްތަކަށް ވަގުތީ ގޮތުން ޚިދުމަތް ދިނުން ހުއްޓާލާފައިވާ ކަމަށެވެ.
އެހެންނަމަވެސް ހުއްޓާލީ ކިހާ މުއްދަތަކަށް ކަމެއް މިނިސްޓްރީން ހާމައެއް ނުކުރެއެވެ. މީގެ ކުރިން ވެސް ވަނީ ކޮވިޑްގެ ކޭސްތައް ގިނަވުމުން މިގޮތަށް ޚިދުމަތް ހުއްޓާލައިފައެވެ.
އަލަށް ލައިސަންސް ނަގަން ބޭނުންވާ މީހުންނަށް އެ ހިދުމަތް ހުއްޓާލި ނަމަވެސް މުއްދަތު ހަމަވެފައިވާ ލައިސަންސް ކާޑު އާ ކޮށްދިނުމުގެ އިތުރުން ޓްރާންސްޕޯޓް އޮތޯރިޓީން ދެމުންދާ އެހެނިހެން ހިދުމަތްތައް އޮންލައިންކޮށް ލިބޭނެ ކަމަށްވެސް އެ މިނިސްޓްރީން ބުންޏެވެ.
މިއަހަރުގެ ކުރީކޮޅު ވެސް ވަނީ ކޮވިޑްގެ ހާލަތު ގޯސްވެފައިވާތީ ލައިސަންސަށް އަލަށް އެދޭ ފަރާތްތަކަށް އެ ހިދުމަތް ދިނުން ވަގުތީގޮތުން ހުއްޓާލައިފައެވެ. އަލަށް ލައިސަންސް ދޫކުރުން ހުއްޓާލުމާގުޅިގެން އާއްމުންވަނީ ޓްރާންސްޕޯޓް މިނިސްޓްރީ ކައިރިއަށް އެއްވެ ކަންބޮޑުވުން ފާޅުކޮށްފައެވެ. އެމީހުންގެ ކަންބޮޑުވުމަކަށް އޭރުވީ ލައިސަންސް ނަގާނެ ގޮތެއް ނެތި، ޖޫރިމަނާ ކުރަމުންދިޔުމެވެ.
އޭގެ ފަހުން، ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންތަކެއް ހަދައި ފަހުން ލައިސަންސް ނަގަން ފުރުސަތު ދިނެވެ.
