އެންމެ ފަހުން ހިންގި ކަރފިއުގައި ފުލުހުން ދޫކުރި ފާސް ބޭނުން ކުރެވޭނެ
5 މެއި 2021 | ބުދަ 03:02ކުރިންވެސް އަމަލު ކުރަމުން އައިގޮތަށް ހުއްދަ އަށް އެދުމުގެ ފުރުސަތު އެބައޮތް
ރޭގަނޑު 8ން ފަތިހު 5ށް އެއްގަމު އުޅަނދު ދުއްވުން މަނާކޮށް ކުރިއަށް ގެންދިޔަ ކަރފިއުގެ ތެރެއިން
މާލެ ސަރަޙައްދުގައި ވަކި ގަޑިތަކެއްގައި އެއްގަމު އުޅަނދު ދުއްވުން މަނާކޮށްފައިވާއިރު، އެންމެ ފަހުން ހިންގި ކަރފިއުގައި ބޭނުން ކުރުމަށް ފުލުހުން ދޫކުރި ފާސް ބޭނުން ކުރެވޭނެކަމަށް ފުލުހުން ބުނެފިއެވެ.
މި މަހުގެ 15 ވަނަ ދުވަހުގެ ނިޔަލަށް ރޭގަނޑު 12:00ން ފަތިހު 4:00ށް އެއްގަމު އުޅަނދު ދުއްވުން މަނާކޮށްފައިވާއިރު، ތަންފީޒް ކުރުމަށް ފުލުހުން ހާއްސަ މަސައްކަތްތަކެއް ކުރަމުން ގެންދާނެކަމަށް ވަނީ ބުނެފައެވެ. ފުލުހުން ބުނީ، އެ މަސައްކަތް ކުރަމުންދާއިރު، އެންމެ ފަހުން ހިންގި ކަރފިއުގައި ބޭނުން ކުރުމަށް ދިވެހި ފުލުހުންގެ ހިދުމަތުން ދޫކޮށްފައިވާ ދާއިމީ ފާސްތައް ވަކި ގޮތެއް އަންގަންދެން ބޭނުން ކުރަމުން ގެންދެވޭނެ ކަމަށެވެ. އަދި ވެހިކަލް މަނާ ގަޑިތަކުގައި ކުރިންވެސް އަމަލު ކުރަމުން އައިގޮތަށް ހުއްދަ އަށް އެދުމުގެ ފުރުސަތު އޮތްކަން ފުުލުހުން ވަނީ ފާހަގަކޮށްފައެވެ. އެކަމާ ގުޅޭގޮތުން މައުލޫމާތު ހޯދުމަށް ފުލުހުންގެ ޕާރމިޓް ސެންޓަރަށް ގުޅޭނެ ނަންބަރަކީ 1665 އެވެ.
ފުލުހުން ވަނީ ބަލި ފެތުރުން ކޮންޓްރޯލް ކުރުމަށް، ކަމާބެހޭ އިދާރާތަކުން އަންގާ އެންގުންތަކަށް ފުރިހަމައަށް ބޯލަނބައި، ފަރުދީ ހައިސިއްޔަތުން ކުރެއްވެންހުރި އެންމެހައި ކަންކަން ކުރުމަށް ރައްޔިތުންނަށް ގޮވާލާފައެވެ.
ރާއްޖެއިން ރެކޯޑު އަދަދުތަކުން ޕޮޒިޓިވް ކޭސްތައް ފެންނަމުންދާއިރު، އަންގާރަ ދުވަހުވެސް 601 މީހަކު ކޮވިޑް-19 އަށް ޕޮޒިޓިވްވެފައިވެއެވެ. ކޮވިޑުގެ ޙާލަތަށް ބަލައި ރާއްޖޭގައި މިހާރު އިއުލާނު ކޮށްފައިވާ ސިއްޙީ ކުއްލި ނުރައްކަލުގެ ޙާލަތުވެސް ވަނީ ދިގުދަންމާލާފައެވެ.
