ކޮވިޑް-19 ހުއްޓުވުމަށް އަޅާފައިވާ ފިޔަވަޅުތައް ހަރުކަށި ކޮށްފިއެވެ.
ހޯމަ ދުވަހުގެ ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ ކޮވިޑް-19ގެ ކޭސްތައް އިތުރުވުމާއި ގުޅިގެން މަޝްވަރާ ކުރުމަށްފަހު އިތުރު ފިޔަވަޅުތައް އަޅަން ނިންމާފައިވާ ކަމަށެވެ. އެގޮތުން މިމަހުގެ 5 ވަނަ ދުވަހުން ފެށިގެން 15 ވަނަ ދުވަހުގެ ނިޔަލަށް ޖުމްލަ 08 ފިޔަވަޅެއް އަޅަން ނިންމާފައިވާ ކަމަށް މަބްރޫކް ވިދާޅުވިއެވެ.
ކޮވިޑް-19 ކޮންޓްރޯލް ކުރުމަށް އެޅި ފިޔަވަޅުތައް
- ސްކޫލުތައް ބަންދުކުރަން ނިންމުން. ( ސްކޫލުތަކުގެ ކިޔެވުން ދެން ކުރިއަށް ގެންދާނީ އޮންލައިންކޮށް) ނަމަވެސް އޯލެވެލްއާއި އޭލެވެލްގެ މިހާރު ކުރިއަށްދާ އިމްތިހާނުތައް ކުރިއަށްދާނެ.
- ސަރުކާރުގެ އޮފީސްތައް ބަންދުކުރުން. ނަމަވެސް ގޭގައި ތިބެގެން ކުރެވޭ ހުރިހާ މަސައްކަތެއް ކުރުމަށް ވަނީ ނިންމާފައި.
- ޕާކުތަކާއި މައިދާންތަކާއި، ކުޅިވަރު ކުޅޭ ތަންތަނާއި މުބާރާތްތައް ހުއްޓުވާފައިވާއިރު، ދުވާ ޓްރެކް އަދި ސްވިމިން ޓްރެކް ބަންދުކުރަން ވަނީ ނިންމާފައި.
- މިސްކިތްތަކުގައި ގައިދުރުކުރުމާއި މާސްކް އެޅުމާއެކު އަމިއްލަ މުސައްލަ ގެންދަން ޖެހޭ.
- ރަށްރަށަށް ދަތުރުފަތުރު ކުރުމުގައި ހުއްދަ ނަގައިގެން ޒަރޫރީ ބޭނުމެއްގައި މެނުނީ އެއްރަށުން އަނެއް ރަށަށް ދަތުރުނުކުރެވުން.
- މާލެ ސަރަހައްދުން ޒަރޫރީ ބޭނުމަކަށް ވެސް ދަތުރުކުރާނަމަ 10 ދުވަހުގެ ކަރަންޓީނު މުއްދަތު ފުރިހަމަ ކުރުން (ސިނާއީ މަސައްކަތް ކުރާ ރަށަކަށް ދަތުރުކުރި ނަމަވެސް ކަރަންޓީނުގެ މުއްދަތު ފުރިހަމަ ކުރަން ޖެހޭ) އަދި ވެކްސިންގެ ދެޑޯޒާއެކު ދީފައިވާ ލުއިތައް މި 10 ދުވަހަށް ވަގުތީ ގޮތުން މެދުކަނޑާލުން.
- ވެހިކަލް ދުއްވުން ރޭގަނޑު 12:00 ފަތިހު 4:00ށް މަނާކުރުން.
- އިންޑިއާއިން އަންނަ ދިވެހިން 14 ދުވަހުގެ ކަރަންޓީނު ފުރިހަމަ ކުރުމާއެކު ޕީސީއާރު ޓެސްޓުގެ ނެގެޓިވް ނަތީޖާ ހުށަހެޅުން. ( އިންޑިއާއިން ރާއްޖެއަށް އަންނަ ފަތުރުވެރިން ރާއްޖޭގެ ހުރިހާ ގެސްޓްހައުސްތަކާއި ސިޓީހޮޓާތަކަށް ޗެކްއިން ވުން ވަނީ ހުއްޓުވާފައި)
މަބްރޫކް ވިދާޅުވީ 10 ދުވަހުގެ މުއްދަތަށް މިއެޅުނު ފިޔަވަޅުތަކާއެކު ހާލަތު ވަރަށް ގާތުން މޮނިޓަރ ކުރެވެމުންދާނެ ކަމަށާއި އިތުރަށް ފިޔަވަޅު އަޅަންޖެހޭނަމަ އެކަން ވެސް ކުރާނެ ކަމަށެވެ. އަދި އަބަދުވެސް މަސައްކަތް ކުރަމުންދަނީ ބަލި ކޮންޓްރޯލްކޮށް ލުއިތައް ދިނުމަށް ކަމަށް މަބްރޫކް ވިދާޅުވިއެވެ.
