ކޮވިޑް-19 ހުއްޓުވުމަށް އަނެއްކާވެސް ހަރުކަށި ފިޔަވަޅުތަކެއް
3 މެއި 2021 | ހޯމަ 18:56މުޅިއެކު 08 ފިޔަވަޅެއް ވަނީ އަޅާފައި
މާލެސިޓީ، ރޭގަނޑު 12:00ން ފަތިހު 4:00ށް އެއްގަމު އުޅަނދު ދުއްވުން ވަނީ މަނާކޮށްފައި
ކޮވިޑް-19 ހުއްޓުވުމަށް އަޅާފައިވާ ފިޔަވަޅުތައް ހަރުކަށި ކޮށްފިއެވެ.
ހޯމަ ދުވަހުގެ ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ ކޮވިޑް-19ގެ ކޭސްތައް އިތުރުވުމާއި ގުޅިގެން މަޝްވަރާ ކުރުމަށްފަހު އިތުރު ފިޔަވަޅުތައް އަޅަން ނިންމާފައިވާ ކަމަށެވެ. އެގޮތުން މިމަހުގެ 5 ވަނަ ދުވަހުން ފެށިގެން 15 ވަނަ ދުވަހުގެ ނިޔަލަށް ޖުމްލަ 08 ފިޔަވަޅެއް އަޅަން ނިންމާފައިވާ ކަމަށް މަބްރޫކް ވިދާޅުވިއެވެ.
މަބްރޫކް ވިދާޅުވީ 10 ދުވަހުގެ މުއްދަތަށް މިއެޅުނު ފިޔަވަޅުތަކާއެކު ހާލަތު ވަރަށް ގާތުން މޮނިޓަރ ކުރެވެމުންދާނެ ކަމަށާއި އިތުރަށް ފިޔަވަޅު އަޅަންޖެހޭނަމަ އެކަން ވެސް ކުރާނެ ކަމަށެވެ. އަދި އަބަދުވެސް މަސައްކަތް ކުރަމުންދަނީ ބަލި ކޮންޓްރޯލްކޮށް ލުއިތައް ދިނުމަށް ކަމަށް މަބްރޫކް ވިދާޅުވިއެވެ.
