ސްކޮލަރޝިޕްތަކަށް ފުރުސަތު އޮންނާނީ އޮކްޓޯބަރ/ނޮވެމްބަރ އިމްތިހާނުގައި ބައިވެރިވާ ދަރިވަރުންނަށް: އެޑިޔުކޭޝަން
3 މެއި 2021 | ހޯމަ 14:16ހުރިހާ ދަރިވަރުން ވެސް އޮކްޓޯބަރ/ނޮވެމްބަރ އިމްތިހާނު ހަދަން ދިއުމަށް އިލްތިމާސްކުރެއްވި
ހޯމަ ދުވަހު އެޑިޔުކޭޝަން މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި އެޑިޔުކޭޝަން މިނިސްޓަރު ޑރ.އައިޝަތު އަލީ ވާހަކަދައްކަވަނީ
ސަރުކާރުން ދޭ ސްކޮލަރޝިޕް ތަކަށް ފުރުސަތު އޮންނާނީ މިއަހަރުގެ އޮކްޓޯބަރ/ނޮވެމްބަރ އިމްތިހާނުގައި ބައިވެރިވާ ދަރިވަރުންނަށް ކަމަށް އެޑިޔުކޭޝަން މިނިސްޓްރީން ބުނެފިއެވެ.
ހޯމަ ދުވަހު އެޑިޔުކޭޝަން މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި އެޑިޔުކޭޝަން މިނިސްޓަރު ޑރ.އައިޝަތު އަލީ ވިދާޅުވީ ޕޭޕަރުތައް ލީކުވަމުންދާތީ އޭއެސް/އޭލެވެލް އިމްތިހާނު ކުރިއަށް ނުގެންދިއުމަށް ނިންމީ ގިނަ މަޝްވަރާތަކެއް ކުރުމަށްފަހު ކަމަށެވެ.
ހުރިހާ ދަރިވަރުން ވެސް އޮކްޓޯބަރ/ނޮވެމްބަރ އިމްތިހާނު ހަދަން ދިއުމަށް އިލްތިމާސްކުރައްވަމުން މިނިސްޓަރު ވިދާޅުވީ ހާލަތު ހުރިގޮތުން ބައެއް ދަރިވަރުން އޭޕްރިލް/މޭއި ގައި އިމްތިހާނު ހަދަން ބޭނުންވާ ކަމަށެވެ. ނަމަވެސް އެ ދަރިވަރުންނަށް ވެސް ދެރަ ގޮތެއްވިޔަ ނުދެއްވާނެކަމުގެ ޔަގީންކަން މިނިސްޓަރު ވަނީ ދެއްވާފައެވެ.
މިހާރު އިމްތިހާނު ހަދައި ނިންމާލަން ބޭނުންވާ ދަރިވަރުންނަށް ޓީޗަރ ބޭސްޑް އެސެސްމެންޓަކަށް ދިއުމުގެ ފުރުސަތު ވަނީ ހުޅުވާލާފައެވެ. ޓީޗަރ ބޭސްޑް އެސެސްމަންޓްގައި ޕޭޕަރު ތައްޔާރުކުރަނީ އެސްކޫލަކުން ކަމަށްވާއިރު މޮކް އިމްތިހާނުގެ ނަތީޖާއަށް ވެސް ބަލާނެއެވެ. އަދި އެ އިމްތިހާނު އޮންނާނީ އެޑްއެކްސެލްގެ މިންގަނޑަށެވެ.
އޭއެސް/އޭލެވެލް އިމްތިހާނު ފަށާފައިވަނީ އޭޕްރީލް މަހުގެ 26 ވަނަ ދުވަހުއެވެ.
