ކޮވިޑް-19ގެ ހާލަތު ގޯސްވެ އަތޮޅުތެރޭގައި ޕޮޒިޓިވްވި ކޭސްތަކުގެ އަދަދު ދެހާހާ ގާތްކޮށްފިއެވެ.

ކޮވިޑް-19 ގެ ހާލަތު ވަރަށް ބޮޑަށް ގޯސްވެ އަތޮޅުތެރޭގައި ބަލި ޖެހިފައިވާ 1902 މީހަކު އެބަތިއްބެވެ. މުޅި ރާއްޖެއިން ބަލި ޖެހިގެން ރެކޯޑު ކުރާ އަދަދު 300 އިން މަތީގައި އޮންނަތާ، ހަފުތާއެއް ވަނީ ވެފައެވެ.

މިހާރު އަދަދުތައް 500އަށްވުރެ މައްޗަށް މިވަނީ އަރާފައެވެ. އާދީއްތަ ދުވަހުގެ ތަފާސް ހިސާބުތަކަށް ބަލާއިރު ކޮވިޑް ބަލި ޖެހުނު މީހުންގެ ތެރެއިން 276 މީހުންނަކީ މާލޭ ސަރަހައްދުން ބަލި ޖެހުނު މީހުނެވެ. އާދީއްތަ ދުވަހު ޕޮޒިޓިވި މީހުންގެ ތެރެއިން 185 މީހުން ޕޮޒިޓިވްވީ އަތޮޅުތަކުގެ ތެރެއިންނެވެ. ރިސޯޓްތަކުން 12 މީހަކު ޕޮޒިޓިވްވެފައިވެއެވެ. އިންޑަސްޓްރިއަލް މަސައްކަތް ކުރާ ރަށްތަކުންވެސް 32 މީހަކު ޕޮޒިޓިވްވިއެވެ.

މިއާއެކު ޕޮޒިޓިވްވީ މީހުންނާއެކު އަތޮޅުތެރޭގައި ބަލި ޖެހިފައިވާ މީހުންގެ އަދަދު ވަނީ 1،902 އަށް އަރާފައެވެ. މީގެ ތެރޭގައި ހިމެނެނީ، 1،342 ދިވެހިންނާއި 560 ބިދޭސީންނެވެ. އެންމެ ގިނައިން ބަލި މީހުން ތިބީ ޅ. ނައިފަރާއި ކ. މާފުށި އަދި އއ. މަތިވެރީގައެވެ. މާފުށީގައި ބަލި ޖެހިފައިވާ 350 މީހުން އެބަތިއްބެވެ. ނައިފަރާއި މަތިވެރީގެ އިތުރުން މާންދޫގެ ނަންބަރުތައް ހުރީ 250 އިން މަތީގައެވެ.

ކޮވިޑްގެ ހާލަތު އެންމެ ގޯސް ރަށްތައް

މާފުށި - 350 ކޭސް

ނައިފަރު - 272 ކޭސް

މާންދޫ - 253 ކޭސް

މަތިވެރި - 218 ކޭސް

އޭދަފުށި - 146 ކޭސް

ހިންމަފުށި - 104 ކޭސް

ވޭމަންޑޫ - 74 ކޭސް

އުކުޅަސް - 73 ކޭސް

ގުޅި - 44 ކޭސް

މާމިގިލި - 38 ކޭސް

ކޮވިޑް ކޭސްތައް ފެނިގެން މިވަގުތުވެސް 25 ރަށެއްވަނީ މޮނިޓަރިންގައެވެ. އެއީ ޅ. ނައިފަރު، އދ. މާމިގިލި، ތ. ވޭމަންޑޫ، އެ އަތޮޅު މަޑިފުށި، އއ. ބޮޑުފުޅަދޫ، ކ. ހިންމަފުއްޓާއި، ގުޅި އަދި މާފުށީގެ އިތުރުން އއ. މަތިވެރި، ލ. މާންދޫ އާއި ގަމާއި ފޮނަދޫ، ގދ. ތިނަދޫ، އއ އުކުޅަސް، ކ. ތުލުސްދޫ، ލ. ދަނބިދޫ، އއ. ރަސްދޫ، މ. ކޮޅުފުށި، އައްޑޫ ސިޓީ، އދ. ދަނގެތި، އަދި ހއ. ދިއްދޫ އެވެ. ހޯމަ ދުވަހު ވަނީ ކުޅުއްފުއްޓާއި ހިމަންދޫވެސް މޮނިޓަރިންއަށް ލާފައެވެ. ކޮވިޑް ކޭސްތައް ފެނުން އިތުރުވާތީ އަންގާރަ ދުވަހުން ފެށިގެން އެއް ރަށުން އަނެއް ރަށަށް ދަތުރު ކުރެވޭނީ ހަމައެކަނި ޒަރޫރީ ބޭނުން ތަކަށް ކަމަށް އެޗްޕީއޭއިން ވަނީ ކަނޑައަޅާފައެވެ.