އަތޮޅުތެރޭގެ ރަށްތަކުގައި ބްރޯކަރ ފާމްސްތައް ޤާއިމުކުރުމުގެ ފުރުޞަތު މޯލްޑިވްސް ސްޓޮކް އެކްޗޭންޖުން ހުޅުވާލައިފިއެވެ.

ރާއްޖެޓީވީގެ ފަލަ ސުރުޚީ ޕްރޮގުރާމުގަ ސްޓޮކް އެކްސްޗޭންޖްގެ ފަރާތުން ލީޑް ސޮފްޓްވެއަރ ޑިވެލޮޕަރ އިބްރާހިމް ހައިޝަމް ވިދާޅުވީ 2020 ވަނަ އަހަރު ބްރޯކަރުންގެ ޙަރަކާތްތައް އިތުރުކުރުމަށް ވަރަށް ބޮޑަށް ޕްލޭން ކުރެވިފައިވާ ކަމަށެވެ.

ހައިޝަމް ވިދާޅުވީ ބްރޯކަރުންގެ ޚިދުމަތް މިހާރު ދެމުން އަންނަނީ، އެންމެ ދެކުންފުނިންކަމަށެވެ. އަދި މިދެކުންފުނިވެސް ޤާއިމުކޮށްފައިވަނީ ވެރިރަށް މާލޭގައިކަމަށް ވުމާއެކު، އަތޮޅު ތެރޭގެ ބޭފުޅުންނަށް ސެކަންޑްރީ މަރކެޓްގައި ބައިވެރިވުމުގެ ފުރުޞަތު ގެއްލޭ ކަމަށެވެ.

އެހެންކަމުން މޯލްޑިވްސް ސްޓޮކް އެކްސްޗޭންޖުގެ ވިސްނުން ހުރީ ރާއްޖޭގެ އެކި ޞަރަޙައްދުތަކުގައި ބްރޯކަރ ފާމްތައް ގާއިމްކުރުމަށް ކަމަށެވެ. މިކަމަށް ޙައްލެއް ހޯދުމުގެ ބޭނުމުގައި އެކުންފުނިން ވަނީ އިތުރު ކުންފުނިތަކުން އަތޮޅުތެރޭގެ އިތުރު ރަށްތަކުގައި ބްރޯކަރ ފާމްތައް ޤާއިމު ކުރުމަށް ފުރުޞަތު ހުޅުވާލާކަމަށެވެ.

ރާއްޖޭގެ ހިއްސާގެ ބާޒާރު އެހައި ޙަރަކާތްތެރި ނޫންކަމަށާއި، ހިއްސާގެ ބާޒާރަކީ ޙަރަކާތްތެރި، ގިނަ މުޢާމަލާތް ކުރެވޭ ބާޒާރަކަށް ހެދުމަށް މިކަމާ ބެހޭ މަޢުލޫމާތު ފަސޭހައިން ލިބޭނެ އިންތިޒާމު ހަމަޖައްސަމުން ދާކަމަށް ހައިޝަމް ވިދާޅުވިއެވެ. އެގޮތުން، ސްޓޮކް އެކްސްޗޭންޖުގެ އިންފިނިޓީ ޕޯޓަލް މެދުވެރިކޮށް އޮންލައިންކޮށް ޓްރޭޑް ކުރެވޭނެ ގޮތް ހެދުމަށާއި، އޮންލައިންކޮށް ސްޓޮކް އެކްސްޗޭންޖުގެ ފަރާތުން ދޭ ޚިދުމަތްތައް ދިނުމަށް މަސައްކަތް ކުރަމުން އަންނަ ކަމަށެވެ. އަދި އިންފިނިޓީ ޕޯޓަލް މެދުވެރިކޮށް ސްޓޮކް އެކްސްޖޭންޗްގެ ފަރާތުން ދޭ ޚިދުމަތްތައް ފުޅާކުރުމަކީ ޕްލޭނެއް ކަމަށެވެ. އިންފިނިޓީ ޕޯޓަލްއަކީ އިންވެސްޓަރުންގެ މެދުގައި މިހާރުވެސް މަޤުބޫލު ޕޯޓަލްއެއްކަން ހައިޝަމް ފާހަގަކުރެއްވިއެވެ.

ރާއްޖޭގެ ހިއްސާގެ ބާޒާރުގައި ލިސްޓުކޮށްފައިވާ ކުންފުނިންތަކުން ހިއްސާ ބައްލަވައިގަނެފައިވާ ފަރާތްތަކުން އޭގެ ބޭނުން އެންމެ އެދެވޭ ގޮތުގައި ހިފަމުން ނުދާކަން ފާހަގަކުރައްވާ، ހައިޝަމް ވިދާޅުވީ، ޢާންމުން މިކަމަށް ހޭލުންތެރިކުރުމުގެ ގޮތުން އަންނަ އަހަރު މީޑިއާގެ ފަރާތްތަކަށް ޚާއްޞަ ތަމްރީނު ޕްރޮގުރާމުތަކެއް ރާވާފައިވާކަމަށެވެ. ހޭލުންތެރި ކުރުވުމަށް މިޑިއާ އިޚުތިޔާރު ކުރެއްވީ، މީޑިއާ އަކީ ޢަންމުންނާއި ހިސާބަށް މިފަދަ މަޢުލޫމާތު ގެނެސްދިނުމުގައި އެންމެ އެކަށީގެންވާ މިންވަރެއްގައި މިކަން ކުރެވޭނެ ވަޞީލަތުގެ ގޮތުގައި ދެކޭތީ ކަމަށެވެ.

ރާއްޖޭގައި ރަޖިސްޓްރީކޮށްގެން ހިންގާ ކުންފުނިތަކުގެ ޢަދަދު ގިނަ ނަމަވެސް މީގެތެރެއިން ސްޓޮކް މާރކެޓުގައި ލިސްޓުކޮށްފައިވަނީ ނިޞްބަތުން ވަރަށް މަދު ކުންފުނިތަކަކެެވެ. ހައިޝަމް ވިދާޅުވީ ކުންފުނިތައް ލިސްޓުކުރުމުގައި ސަރުކާރުގެ ފަރާތުން އެއްބާރުލުން ބޭނުންވާ ކަމަށާއި، ކުންފުނިތަކަށް ސަރުކާރުން ލުއިދޭން ޖެހޭ ކަމަށެވެ.

ހައިޝަމް ވިދާޅުވީ ސްޓޮކްމާރކެޓްގައި ލިސްޓްކުރުމުގެ މާނައަކީ ކޮންމެ ކުންފުންޏެއްގެ ހިއްސާ ވަކި ޢަދަދެއް ޢާންމު ރައްޔިތުންނަށް ވިއްކާލަން ހުޅުވާލުން ކަމަށެވެ. ޙިއްސާ ގަންނަ ފަރާތްތަކަށް މީގެ ސަބަބުން ލިބޭ ފައިދާތަކުގެ ތެރޭގައި، ކުންފުނީގެ ހިއްސާދާރަކަށް ވުމުގެ އިތުރުން، ހިއްސާގެ ފައިދާ ލިބި، އަދި އަހަރީ ޢާންމު ޖަލްސާގައި ބޭނުންވާ ހުށަހެޅުންތައް ހުށަހެޅޭނެއެވެ. އަދި ކުންފުނީގެ ބޯޑަށް އައުމުގެ ފުރުޞަތުވެސް ލިބެއެވެ.