މަދަނީ އިޖުރާއަތުގެ ބިލް ގާނޫނަކަށްވެފައި ނުވުމަކީ ބަދަލުދިނުމުގެ މައްސަަލަތަކުގައި އިންސާފު ލިބުމަށް އޮތް ހުރަހެއް ކަމަށް މޭރުންވާގޮތަށް ރައީސުލްޖުމްހޫރިއްޔާގެ ލީގަލް އެޑްވައިޒަރު އަހުމަދު އަބްދު ﷲ އަފީފު ދެއްކެވި ވާހަކައަށް ރައްޔިތުންގެ މަޖިލީހުގެ ޖުޑިޝަރީ ކޮމިޓީގެ މުގައްރިރު، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) ރައްދު ދެއްވައިފިއެވެ.
ހޯމަ ދުވަހު ޖުޑިޝަރީ ކޮމިޓީގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އިންތި ވިދާޅުވީ މި ބިލު އެންމެ ފުރަތަމަ ކޮމިޓީއަށް ލިބުނީ 2 ފެބްރުއަރީ 2020ގައި ކަމަށާއި ނަމަވެސް އެއީ އެންމެ ރަނގަޅަށް ހުށަހެޅިފައި އޮތް ބިލެއް ނޫން ކަމަށް ބުނެ ސަރުކާރުން އިތުރު ވަގުތަށް އެދުނު ކަމަށެވެ. ބިލުގެ މަސައްކަތް ނިންމުމަށް އެކި ފަހަރުމަތިން ތަކުރާރުކޮށް އިތުރު ވަގުތު ދިނުމަށް ސަރުކާރުން އެދުނު ކަމަށް ވެސް އިންތި ވިދާޅުވިއެވެ.
އިންތި ވިދާޅުވީ މި ބިލުގެ މަސައްކަތް ނިންމުމަށް އޭޖީއަށް ދިން ސުންގަޑިތައް ފަހަނައަޅައި ދިއުމުގެ ސަބަބުން ބިލު މަޖިލީހުން ބޭރުކޮށްލުމަށް ވެސް ކޮމިޓީން ނިންމި ކަމަށެވެ. ނަމަވެސް އޭގެ ސަބަބުން ނުކުމެދާނެ ނަތީޖާއަކަށް ވިސްނުމަށްފަހު އެކަން ނުކުރީ ކަމަށް ވިދާޅުވިއެވެ.
ކޮމިޓީން މި ބިލު ބޭރުކޮށްލަން ނިންމިއެއް ކަމަކު ތަޅުމަށް ގޮސްފިނަމަ އަނެއްކާ ބަހުސެއް ފެށޭނެ. ސަރުކާރު 'އެންބެރެސްމަންޓަކަށް' ގޮސްފާނެ ކަމަށްޓަކައި އެހިސާބަށް އެކަން ނުގެންދިޔައީ.ޖުޑިޝަރީ ކޮމިޓީގެ މުގައްރިރު، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި)
އިންތި ވިދާޅުވީ އޭގެ ފަހުން ވެސް އޭޖީ އޮފީހަށް ދިން ސުންގަޑިތައް ފަހަނައަޅައި ގޮސްފައިވާ ކަމަށާއި އެތައް ފަހަރެެއްގެ މަތިން ބިލުގެ މަސައްކަތް ކުރުމަށް ތާވަލު ކުރެވިގެންދިއަ ކަމަށެވެ. އެންމެ ފަހުން ބިލުގެ ރަނގަޅު ވަރޝަން މަޖިލީހަށް ފޮނުވާފައިވަނީ 4 ނޮވެމްބަރު 2020ގައި ކަމަށް ވިދާޅުވިއެވެ.
ވަކިވަކި ޗެޕްޓަރުތަކަށް ބިލު ފޮނުވާފައިވުމާއެކު އޭގެ ސަބަބުން ކޮމިޓީއަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށް ވެސް އިންތި ފާހަގަ ކުރެއްވިއެވެ. އަދި މިއީ އެކަން ކުރަން ޖެހޭ ގޮތެއް ނޫން ކަމަށް ވެސް ވިދާޅުވިއެވެ.
މަދަނީ އިޖުރާއަތުގެ ބިލަކީ މަދަނީ ދައުވާތަކާބެހޭ އުސޫލުތަކާއި ޝަރީއަތަށް މައްސަލަ ފޮނުވުމުގެ ކުރިން މައްސަލަ ހައްލުކުރުމުގައި އަމަލުކުރާނެ އުސޫލުތަކާއި ޝަރީއަތަށް ހުށަހެޅޭ މައްސަލަތަކުގެ ޝަރީއަތް ހިންގުމުގެ އުސޫލުތަކާއި ހެއްކާބެހޭ ބައެއް އުސޫލުތައް ބަޔާން ކުރާ ބިލެކެވެ.
މީގެ އިތުރުން ރާއްޖެއިން ބޭރުގެ ކޯޓުތަކުގައި ކޮށްފައިވާ ހުކުމްތައް ދިވެހިރާއްޖޭގައި ތަންފީޒުކުރުމާގުޅޭ އުސޫލުތަކާއި ހުކުމް ތަންފީޒުކުރުމާގުޅޭ އުސޫލުތަކާއި އިސްތިއުނާފު ކުރުމާގުޅޭ އުސޫލުތަކާއި އެނޫންވެސް މަދަނީ އިޖުރާއަތާގުޅޭ އާންމު އުސޫލުތައް މި ބިލުގައި ބަޔާންވެގެންވެއެވެ.
