އިންޓަރނެޓް އަގުތަކާ ގުޅޭ ގޮތުން މީޑިއާތަކުގައި ދައުރުވަނީ ތެދު މައުލޫމަތުތަކެއް ނޫން- މިނިސްޓަރ ފައްޔާޒު
އިންޓަނެޓުގެ އަގު ހެޔޮކުރަން ސަރުކާރުން މުހިންމު ބަދަލުތަކެއް ގެނައުމުގެ މަސައްކަތް ދަނީ ކުރަމުން
އިކޮނޮމިކް މިނިސްޓަރު ފައްޔާޒު އިސްމާއިލް
އިންޓަރނެޓް އަގުތަކާ ގުޅޭ ގޮތުން މީޑިއާތަކުގައި ދައުރުވަމުން ދަނީ މުޅިން ތެދު މައުލޫމާތުތަކެއް ނޫން ކަމަށް ކޮމިއުނިކޭޝަން މިނިސްޓްރީއާ ހަވާލުވެވަޑައިގެން ހުންނެވި އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
މިނިސްޓަރ ވިދާޅުވީ އިންޓަރނެޓުގެ އަގު ހެޔޮކުރަން ސަރުކާރުން މުހިންމު ބަދަލުތަކެއް ގެނައުމުގެ މަސައްކަތް ކުރިއަށް ދާ ކަމަށާއި އެކި ފަރާތްތަކާއެކު މަޝްވަރާ ބައްދަލުވުންތައް ވެސް ކުރިއަށް ދާ ކަމަށެވެ. ނަަމަވެސް އަދި ވަކި ގޮތެއް ނިންމަވާފައި ނުވާނެ ކަމަށް މިނިސްޓަރ ވިދާޅުވިއެވެ.
ޖުލައި މަހުން ފެށިގެން ސަރުކާރުން އިންޓަރނެޓްގެ އަގުތަކަށް ބޮޑެތި އަދި ހެޔޮ ބަދަލުތަކެއް ގެންނަން އުޅޭ ކަމަށް ބުނެ ބައެއް މީޑިއާތަކުގައި އެ ޚަބަރު ދަނީ ފެތުރެމުންނެވެ. އަދި ބައެއް އަގުތައް ވެސް ހިއްސާ ކޮށްފައިވާއިރު މިނިސްޓަރ ވަނީ އެ ޚަބަރުތައް ދޮގު ކުރައްވާފައެވެ.
އިންޓަނެޓުގެ އަގުހެޔޮކުރުމަކީ މި ސަރުކާރުގެ ރިޔާސީ ވައުދެކެވެ. މިދިޔަ ފެބްރުއަރީ މަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މަބްރޫކް އަބްދުލްއަޒީޒް ވިދާޅުވެފައިވަނީ ކުރިއަށް އޮތް ދެ އަހަރެއްހާ ދުވަސްތެރޭގައި އިންޓަނެޓުގެ އަގަށް ހެޔޮ ބަދަލުތަކެއް ގެނެވޭނެކަމަށެވެ.
ކޮމިއުނިކޭޝަން މިނިސްޓަރު ކަމުގައި ހުންނެވި މުހައްމަދު މަލީހު ޖަމާލުގެ އިތުބާރުނެތްކަމަށް ރައްޔިތުންގެ މަޖިލީހުން ފާސްކޮށް މިނިސްޓަރުކަމުގެ މަގާމުން މަލީހު ވަކިކޮށްފައި ވަނީ މާޗް މަހުގެ 1 ވަނަ ދުވަހުއެވެ. އޭގެފަހުން އެ މިނިސްޓްރީ ވަގުތީ ގޮތުން ހިންގަމުން އަންނަނީ އިކޮނޮމިކް މިނިސްޓަރު ފައްޔާޒެވެ.
ކުރިން އެ މިނިސްޓްރީ އުވާލާން އުޅޭ ކަމަށް ވާހަކަ ދެކެވިފައިވެއެވެ. ނަމަވެސް ސަރުކާރުން ވަނީ އެ މިނިސްޓްރީ އުވާނުލުމަށް ނިންމާފައެވެ.
