ކޮވިޑަށް ފަރުވާ ހޯދަމުންދިޔަ 39 އަހަރުގެ މީހަކު ނިޔާވެއްޖެ
މިއީ ރާއްޖޭގައި މިބަލީގައި ނިޔާވި 74 ވަނަ މީހާ
ދަރުމަވަންތަ ހޮސްޕިޓަލް
ދަރުމަވަންތަ ހޮސްޕިޓަލްގައި ކޮވިޑް-19ށް ފަރުވާ ހޯދަމުންދިޔަ އުމުރުން 39 އަހަރުގެ މީހަކު ނިޔާވެއްޖެއެވެ.
މިކަމާއި ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ ނިޔާވެފައިވަނީ އިންޑިޔާގެ ފިރިހެނެއް ކަމަށެވެ. މިއީ ރާއްޖޭގައި މިބަލީގައި ނިޔާވި 74 ވަނަ މީހާއެވެ. ނިމިގެން ދިޔަ މަހުގައި އެކަނި ވެސް 6 މީހަކު ނިޔާވެފައިވެއެވެ. މީގެ ތެރޭގައި ހިމެނެނީ އިންޑިއާ މީހަކާއި 6 ދިވެހިންނެވެ.
ރާއްޖޭގައި މިފަހަކުން އަންނަނީ ކޮވިޑްގެ ހާލަތު ގޯސްވަމުންނެވެ. އެގޮތުން އެކްޓިވް ކޭސްތަކުގެ އަދަދު މިހާރު ފަސް ހާހުން މައްޗަށް އަރާފައިވާއިރު ވައިރަސް ޖެހުނު މީހުންގެ ޖުމްލަ އަދަދު ވަނީ ތިރީސްހާހުން މަތިވެފައެވެ.
އޭޕްރީލް މަހުގެ މެދެއްހާ ހިސާބުން ފެށިގެން ރާއްޖޭގައި ކޮވިޑްގެ ކޭސްތައް ރިޕޯޓްކުރެވޭ މިންވަރު ވަނީ އިތުރުވެފައެވެ.
ރާއްޖޭގައި ކޮވިޑްގެ ކޭސްތައް އިތުރުވަމުން އަންނައިރު ވެކްސިންގެ ދެވަނަ ޑޯޒް ޖެހި މީހުންގެ އަދަދު ވަނީ ލައްކައަކަށްވުރެ މަތިވެފައެވެ.
