ޕެސިފިކު އޭޝިއާ ޓްރެވަލް އެސޯސިއޭޝަން (ޕާޓާ)ގެ އެގްޒެކެޓިވް ބޯޑަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް އިންތިޚާބު ވެވަޑައިގެންފިއެވެ.

ޕާޓާއަކީ ފަތުރުވެރިކަމުގެ ސިނާއަތުގައި އަމިއްލަ ފަރާތްތަކާއި ގައުމުތަކުގެ ޓޫރިޒަމް އިދާރާތައް ބައިވެރިވާ އޭޝިއާ ޕެސިފިކުގެ ފަތުރުވެރިކަން ދެމެހެއްޓެނިވި ގޮތަށް ކުރިއަރުވަން މަސައްކަތްކުރާ ބައިނަލްއަގްވާމީ ޖަމިއްޔާއެކެވެ.

ޕާޓާގެ ވޯޓުލާ މެންބަރުންގެ މެދުގައި އޮންލައިންކޮށް ކުރިއަށް ގެންދިޔަ ވޯޓުން ޑރ. މައުސޫމް އެގްޒެކެޓިވް ބޯޑަށް އިންތިޚާބު ކޮށްފައިވަނީ 29 އޭޕްރީލް 2021ން ފެށިގެން ދެ އަހަރުގެ ދައުރަކަށެވެ.

ކޮވިޑް-19 ޕެންޑަމިކުން އަރައިގަތުމުގެ ގޮތުން ޕާޓާއިން ހިންގަމުން ގެންދާ ހަރަކާތްތަކުގައި ދިވެހި ސަރުކާރާއި ފަތުރުވެރިކަމުގެ ސިނާއަތުގެ އަމިއްލަ ފަރާތްތަކުންވެސް ދަނީ ބައިވެރިވަމުންނެވެ.

ޕާޓާގެ ޕްރޮގްރާމްތައް ހިންގުމުގައި ބައިވެރިވެ އެހީތެރިކަން ފޯރުކޮށްދޭ 32 ޗެޕްޓަރު އޭޝިއާ ޕެސިފިކް ސަރަހައްދުގައި ހިމެނޭއިރު ޕާޓާ މޯލްޑިވްސް ޗެޕްޓަރުގެ ޗެއަރއަކީ ފަތުރުވެރިކަމުގެ ދާއިރާގައި އިސްދައުރެއް އަދާކުރައްވަމުން ގެންދަވާ ހ.ލޭޑީބާރޑް އާގެ އަބްދު ﷲ ގިޔާސެވެ.

ޕާޓާގެ މިހާރުގެ ޗީފް އެގްޒެކެޓިވް އޮފިސަރ ޑރ. މާރިއޯ ހާރޑްގެ ދައުރު މި މަހު ނިމުމުން ދެން ޕާޓާގެ ސިއީއޯ އަކަށް ހަމަޖައްސަން ނިންމާފައިވާނީ ލިޒް އޯރޓިގިއުރާއެވެ. އެކަމަނާއަކީ 1951 ވަނަ އަހަރު ޕާޓާ އުފެދުނީއްސުރެ އެޖަމްއިއްޔާއަށް އައްޔަން ކުރާ ފުރަތަމަ އަންހެން ޗީފް އެގްޒެކެޓިވް އޮފިސަރެވެ.

ޕާޓާގެ އެގްޒެކްޓިވް ބޯޑުގެ މިހާރު ޗެއަރއަކީ ސިންގަޕޫރުގެ އޭޝިއާ ޗައިނާ ޕްރައިވެޓް ލިމިޓެޑްގެ ސީއީއޯ ސޫންވާ ވޮންގެވެ.