މަސައްކަތުގެ މާހައުލުގައި ދިމާވާ އެކިކަހަލަ ޖިންސީ ފުރައްސާރައާ ދެކޮޅަށް ޒުވާނުންތަކެއް އިސްނަގައިގެން ސުލްހަވެރި އެއްވުމެއް ބާއްވަން ނިންމައިފިއެވެ.
"ރައިޒް އަޕް އެމްވީ މޫމަންޓް" އިން އިންތިޒާމުކޮށްގެން ކުރިއަށްގެންދާ މި ހަރަކާތަކީ މަސައްކަތްތެރިންގެ ދުވަހާ ގުޅިގެން ކުރިއަށްގެންދާ ހަރަކާތެކެވެ. އެއްވުން ބޭއްވުމަށް ހަމަޖެހިފައިވަނީ ހޮނިހިރު ދުވަހުގެރޭ 8:45 ގައި މާލޭގެ ރަސްފަންނު ސަރަހައްދުގައި ކަމަށް އިންތިޒާމުކުރާ ފަރާތްތަކުން މައުލޫމާތު ދެއެވެ.
އެއްވުން ކުރިއަށްދާނީ އެޗްޕީއޭގެ ގައިޑްލައިންތަކާ އެއްގޮތަށް ކަމަށްވެސް އެ މޫމަންޓުން ވަނީ ބުނެފައެވެ.
ރައިޒް އަޕް އެމްވީން މައުލޫމާތު ދޭ ގޮތުގައި އެއްވުމުގެ އަމާޒަކީ މަސައްކަތުގެ މާހައުލުގައި އާންމުވެފައިވާ ޖިންސީ ފުރައްސާރައާއި ޖިންސީ ގޯނާގެ އެކިކަހަލަ މައްސަލަތަކަށް އިންސާފު ހޯދައިދިނުމަށް ގޮވާލުމެވެ. އަދި ރައްކާތެރި މަސައްކަތުގެ މާހައުލެއް ޤާއިމުކޮށްދިނުމަށް މުއައްސަސާތަކަށް ގޮވާލުމެވެ.
އެއްވުން އިންތިޒާމުކުރާ ފަރާތްތަކުން ވަނީ ވީހާވެސް ގިނަ މީހުންގެ ބައިވެރިވުމަށް އެދިފައެވެ.
