ސްރީލަންކާ އިން އިސްރާއީލު މީހުންނަަށް ވިސާ އާ ނުލައި އާދެވޭ ގޮތް ހަދައިދީފި، ސަރުކާރުން ތާއީދު ކުރަނީ އިސްރާއީލަށް: އިދިކޮޅު
ސްރީލަންކާގެ ސަރުކާރުން އިސްރާއީލަށް ތާއީދު ކުރާ ކަމަށް އިދިކޮޅު ފަރާތްތަކުން ފާހަގަކޮށް، އިސްރާއީލުން ލަންކާގެ މީހުންނަށް ވަޒީފާ ދޭން ފަށާފައިވަނީ ކުރިން ފަލަސްތީނު މީހުން ކުރަމުންދިޔަ މަސައްކަތްތަކަށް ކަމަށް އިދިކޮޅު މެންބަރުން ބުނެފިއެވެ.
ސްރީލަންކާގެ ޕާލިމެންޓުގެ ޖަލްސާ އެއް ހިނގަނީ
ސްރީލަންކާގެ ސަރުކާރުން ތާއީދު ކުރަނީ އިސްރާއީލަށްތޯ އަދި އިދިކޮޅުން ތާއީދު ކުރަނީ ފަލަސްތީނަށްތޯ ސާފު ކުރުމަށް އެ ގައުމުގެ ގާނޫނު ހަދާ މަޖލީހުގައި ކުރެވުނު ބަހުސްގައި ސަރުކާރުން ތާއީދު ކުރަނީ އިސްރާއީލަށް ކަމަށް އިދިކޮޅުން ބުނެފިއެވެ.
ލަންކާގެ ދުވަހު ނޫސް ޑެއިލީ މިރަރ ގައި ރިޕޯޓު ކޮށްފައިވާ ގޮތުގައި، ސްރީ ލަންކާގެ ޕާލިމެންޓުގައި އިދިކޮޅު ފަރާތްތަކަކީ ފަލަސްޠީނަށް ތާއީދުކުރާ ބައެއްތޯ އަދި ސަރުކާރަކީ އިސްރާއީލަށް ތާއީދުކުރާ ބައެއްތޯ ކުރެވުނު ސުވާލަކަށް ޖަވާބު ދެމުން، އިދިކޮޅު މެންބަރު މުޖީބުއް ރަޙްމާން ބުދަ ދުވަހު ވިދާޅުވީ އިދިކޮޅު ފަރާތްތަކުން ގަސްދުކުރަނީ ސްރީ ލަންކާ އިން ޒަމާނުއްސުރެ ގެންގުޅެމުން އައި ވަކި ފަރާތަކަށް ނުޖެހުމުގެ ބޭރުގެ ސިޔާސަތު ދަމަހައްޓަން ކަމަށެވެ.
އެހެން ނަމަވެސް އޭނާ ވިދާޅުވީ، ޖަނަތާ ވިމުކްތި ޕެރަމުނާ (ޖޭވީޕީ) އިސްވެ އޮވެގެން އުފެދިފައިވާ ނެޝަނަލް ޕީޕަލްސް ޕަވަރ (އެންޕީޕީ) ސަރުކާރުން އެ ސްޓޭންޑް ބަދަލުކޮށްފައިވާ ކަމަށް ގަބޫލު ކުރެވޭ ކަމަށެވެ.
"ސަރުކާރުން އިސްރާއީލުގެ ފަތުރުވެރިންނަށް ވިސާ އާ ނުލައި އެތެރެވުމުގެ ހުއްދަ ދިނުމުން ހީވަނީ އެމީހުންގެ ސިޔާސަތު ބަދަލުވެއްޖެ ކަމަށް،" އެ މެންބަރު ވިދާޅުވިއެވެ. އެއާއެކު އޭނާ އިތުރަށް ވިދާޅުވީ، މީގެ ކުރިން ޖޭވީޕީ އަކީ އާންމު ގޮތެއްގައި ފަލަސްޠީނަށް ތާއީދު ކުރި ޕާޓީ އެއް ކަމަށެވެ.
އިސްރާއީލުން ސްރީ ލަންކާގެ ރައްޔިތުންނަށް ވަޒީފާގެ ފުރުސަތުތައް ދިނުމާ ބެހޭ ގޮތުން ކުރެވުނު ސުވާލަކަށް ޖަވާބު ދެމުން އެ އިދިކޮޅު މެމްބަރު ވިދާޅުވީ، ކުރިން ފަލަސްތީނު މީހުން އިސްރާއީލުގައި ކުރަމުން އައި މަސައްކަތްތަކަށް މިހާރު އިސްރާއީލުން ސްރީ ލަންކާގެ މީހުން ވަޒީފާ އަށް ނަގަމުންދާ ކަމަށެވެ.
