ވެކްސިނުގެ ދެވަނަ ޑޯޒު ޖެހި މީހުންގެ އަދަދު ލައްކައަކަށް
30 އެޕްރީލު 2021 | ހުކުރު 18:245285 މީހުން ބުރާސްފަތި ދުވަހު ރާއްޖެއިން ވެކްސިން ޖަހާފައިވޭ
ވެކްސިން ޖެހުމުގެ ގައުމީ ކެމްޕޭނުގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
ކޮވިޑް-19އާ ދެކޮޅަށް ރާއްޖޭގައި ވެކްސިނުގެ ދެވަނަ ޑޯޒު ޖެހި މީހުންގެ އަދަދު އެއް ލައްކައަށް އަރައިފިއެވެ.
އެޗްޕީއޭގެ ތަފާސްހިސާބުތައް ދައްކާގޮތުން 5285 މީހުން ބުރާސްފަތި ދުވަހު ވެކްސިން ޖަހާފައިވެއެވެ. އޭގެ ތެރެއިން 4،007 މީހުން ވަނީ ވެކްސިނުގެ ދެވަނަ ޑޯޒު ޖަހާފައެވެ. ފުރަތަމަ ޑޯޒު ޖެހީ 1،278 މީހުންނެވެ.
ދެވަނަ ޑޯޒު ޖެހި މީހުންގެ ތެރެއިން މާލެ ސަރަހައްދުން ވެކްސިން ޖެހީ 2،083 މީހުންނެވެ. އަތޮޅުތެރެއިން ޖެހީ 1924 މީހުންނެވެ. ފުރަތަމަ ޑޯޒު ޖެހީ މާލެ ސަރަހައްދުން 526 މީހުންނާއި އަތޮޅުތެރެއިން 752 މީހުންނެވެ.
މިއާއެކު ވެކްސިން ޖެހި މީހުންގެ ޖުމްލަ އަދަދު ވަނީ 296،529ށް އަރާފައެވެ. އޭގެ ތެރެއިން ދެވަނަ ޑޯޒު ޖެހީ 101،346 މީހުންނެވެ.
މިދިޔަ ފެބްރުއަރީ މަހުގެ 1 ވަނަ ދުވަހުން ފެށިގެން ރާއްޖޭގައި ވެކްސިނޭޝަން ޕްރޮގްރާމް ކުރިއަށްގެންދާއިރު ދެވަނަ ޑޯޒު ޖަހަން ފަށާފައި ވަނީ މި މަހު ކުރީކޮޅުއެވެ. ދެވަނަ ޑޯޒު ޖަހަނީ ކޮވިޝީލްޑް ވެކްސިންއާއި ސިނޮފަރމް ވެކްސިންގެއެވެ.
ހަލުވިކަމާއެކު ވެކްސިނޭޝަން ޕްރޮގްރާމް ކުރިއަށްދާއިރު ރާއްޖޭގެ އާބާދީގެ ބޮޑު އިންސައްތައަކަށް ވެކްސިން ދެވުމާއެކު ބަލި ކޮންޓްރޯލް ކުރެވޭނެ ކަމަށް ކަމާބެހޭ ފަރާތްތަކުން ވަނީ ލަފާކޮށްފައެވެ.
ވެކްސިން ޖެހުމުގެ އުސޫލުތަކަށް ދާދި ފަހުން ބަދަލުތަކެއް ގެނެސްފައިވާތީ އެ ބަދަލުތައް ގެނައީ ރާއްޖެއިން ވެކްސިން ހުސްވާތީ ކަމަށް ބައެއް މީހުން ބުނެއެވެ. އެކަމަކު ހެލްތު މިނިސްޓްރީން ވަނީ އެކަން ދޮގުކޮށްފައެވެ.
